Monday , September 27 2021

Archebispo: Tinan Rua La Selebra Misa Paskoa, La Halakon Ksolok Paskoa Ba Malu

DILI Post-Archebispo Metropolitanu Dili, Dom Virgílio do Carmo da Silva hateten, tinan rua ona igreja katólika iha Timor-Leste la selebra festa paskoa hamutuk ho sarani sira, tanba pandemia Covid-19.

Maibé, sarani sei la halakon ksolok entre sarani sira-nian iha selebra festa paskoa ida-ne’e.

Dom Virgílio hatutan, maske tinan rua nia laran la selebra misa paskoa hamutuk ho sarani sira, no mós ho implementasaun serka sanitáriu iha Munisípiu Dili, maibé la hamate espíritu paskoa sarani Timor-Leste nian.

“Maske iha tinan rua tutuir malu ita labele selebra festa paskoa hanesan baibain, ida-ne’e la hamate ita-nia espíritu paskoa ninian, no la halakon mós ita-nia dezeju atu fahe, atu haklaken ksolok paskoa ninian ba malu,” dehan Dom Virgílio ba jornalista, liu husi komferénsia imprensa, Tersa (30/03) iha Komferénsia Episkopal Timorense (CET) Lesidere, Dili.

Iha biban ida-ne’e, Archebispo felisita no parabeniza sarani timoroan tomak iha Timor-Leste no mós iha rai li’ur ne’ebé mak selebra festa paskoa ida-ne’e.

” Hakarak hato’o ha’u-nia boas festas paskoa ninian ba sarani tomak iha ita-nia rain Timor-Leste no mós ba timoroan sira ne’ebé iha rai li’ur,” kongratula Dom Virgílio.

Nia hatutan, tinan ida ona mak pandemia Covid-19 la husik povu no sarani timoroan sira.

Tan ne’e, Archebispo hakarak hatutan mensazen ba sarani tomak relasiona ho selebra festa paskoa ida-ne’e ho maka, “Jesus Cristo ressuscitou nia moris hikas duni,”.

“Hanesan naroman foun ida ne’ebé lori mai ita hotu novidade ida ne’ebé iha nakukun kalan nian, nakukun ne’ebé halo mundu tomak hakdasak ho Covid-19, Covid-19 obriga ita hotu atu hela iha ida-idak nia fatin, limita ita hotu nia movimentu no sai duni nakukun ida” hateten nia.

Iha biban ne’e mós, Dom Virgílio haklaken tan katak, liu husi uma kreda nia kakuluk hakarak fó sai ba sarani hotu, lia ida ne’ebé maka’as no lian ida ksolok nian katak.

Tanba, tuir bispu mensazen ida-ne’e la’ós hada’et hanesan Covid-19, maibé da’et husi fuan ba fuan, basa ema barak nia fuan hela novidade ida-ne’e.

“Kristu mak ha’u-nia esperansa, kristu moris hias ona, mensazen ida-ne’e da’et la’ós hanesan Covid-19 nian, nia tranzmite husi fuan ba fuan, basa ema barak nia fuan hein hela novidade ida-ne’e, ne’e novidade ida esperansa nian, kristu mak ha’u-nia esperansa, nia moris hias ona,” haklaken Dom Virgílio.

Archebispo salienta, automátikamente sei la ko’alia kona-ba formula mazia, tanba krstu nia resureisaun la’ós ida-ne’e, maibé kristu nia resureisaun mak vitória domin nian sobre buat aat nia abut.

Maibé la’ós mós vitória ida ne’ebé hases ita ema husi terus sofrementu no mate, maibé liu husi ita-nia terus liu husi ita-nia mate, nia loke dalan iha nakukun nia laran, transforma buat ne’ebé aat ba di’ak.(ajo)

About dilipost

Check Also

Inspetor Xefi Mauclau Hakotu Iss iha HNGV

DILI Post-Ofisial Polisia Nasional Timor-Leste (PNTL), ho diviza Inseptor Xefi Mauclau Marcal Amaral Magno (49) …

Leave a Reply

Your email address will not be published. Required fields are marked *