Wednesday , June 16 2021

Banku Federál Amérika Rejeita Pedidu Levantamentu BCTL Dala Tolu

DÍLI Post — Banku federál Amérika, rejeita ona pedidu levantamentu Orsamentu Jerál Estadu (OJE) 2021 ne’ebé aprezenta husi Banku Sentrál Timor-Leste (BCTL) dala tolu ona.

Reitór Universidade da Páz (UNPAZ), Adolmando Amaral hateten, fontes balun ne’ebé servisu iha BCTL informa katak, BCTL haruka pedidu levantamentu dala tolu ona ba banku federál Amérika, maibé to’o agora laiha resposta.

“Proposta orsamentu ba foti OJE ne’e tuir informasaun husi fontes balun ne’ebé mak ami asesu husi banku sentrál hateten,proposta ne’e haruka dala tolu ona, mais depois banku federál la fó resposta, signifika ema la fó resposta katak, iha buat ruma ne’ebé ita seidauk rezolve iha ita-nia internál,” dehan Adolmando ba jornalista, iha nia knar fatin UNPAZ Manleuana-Dili, Kinta (11/03).

Reitór UNPAZ ne’e konsidera, banku federál Amérika la fó resposta ba proposta ne’e, tanba iha balun ne’ebé governu halo seidauk loos.

“Levantamentu ba banku federál ne’e proposta haruka dala tolu ona, tansá mak osan banku federál la fó….? Signifika katak, ita halo buat ruma iha ne’e laloos. Laloos ne’e sira tenke esklarese ba povu, agora nafatin buka razaun depois ba hatete ida-ne’e hatete ida ne’ebá,” dehan Adolmando.

Ho kestaun refere, Reitór ne’e husu Primeiru-Ministru, Taur Matan Ruak, ho Ministru Finansas, Rui Gomes, atu esklarese loloos  ba povu, tanba sá governu labele halo levantamentu ba OJE 2021 ne’e.

“Sira labele buka nafatin razaun, tanba wainhira sira buka nafatin razaun, maka sira halo dúvida liu ba povu ida-ne’e, loron-loron Primeiru-Ministru buka razaun, Ministru Finansas buka razaun, ema agora lakohi atu hetan razaun, mais ema buka alternativa buka solusaun,” sujere nia.

Akadémiku ne’e mós husu líder nasionál sira atu tur hamutuk hodi buka solusaun ba problema ne’e, tanba ne’e sériu.

Nia hatutan, bainhira líder sira kontinua sei kotuk ba malu, ida-idak hatudu ninia arogansia, maka povu sei sai vítima nafatin.

“Ha’u hanoin ita-nia líder sira, tempu ona husu deskulpa ba malu, perdua malu ba hodi haree povu ida-ne’e depois haree ba dezenvolvimentu ida ne’ebé la’o hakdasak loos ne’e,” hakotu nia.

Antes ne’e, Primeiru-Ministru, Taur Matan Ruak, ho Ministru Finansas, Rui Gomes hateten, governu seidauk halo levantamentu ba OJE 2021, tanba seidauk nesessidade.

Entretantu, Parlamentu Nasionál (PN) aprova ona proposta lei OJE 2021 hamutuk Billiaun $ 1.8, no hetan ona promulgasaun husi Xefi Estadu iha fulan-dezembru 2020. (**)

About dilipost

Check Also

Komunidade Balun Kontinua Ulun Tos, Halo Uma Iha Mota Ibun

DILI Post- Maske governun bandu ba komunidade sira labele halo uma iha mota ibun no …

Leave a Reply

Your email address will not be published. Required fields are marked *