Friday , July 30 2021

Dader Ne’e, Xanana Gusmao Sei Marka Prezensa Iha MP Ligadu Ho Keixa Mari Alkatiri

DILI Post-Ministeriu Publiku (MP) notifika ona Deputadu nain rua nulu resin ida husi CNRT nudar arguidu ligadu ho keixa husi Sekretáriu Jerál Partidu Frente Revolusionáriu Timor-Leste Independente (FRETILIN), Mari Alkatiri.

Keixa hasoru deputadu nain 21 ne’e rasik hatama iha loron 06 Novembru 2020.

Mari Alkatiri hato’o keixa legal ba MP kontra deputadu bankada CNRT hamutuk na’in-21, hosi xefe bankada to’o kraik, tanba konsideradu ko’alia la loos.

Membru CPN-CNRT lideradu Virgilio Smith ho Deputadu CNRT sira konsideradu liu hosi konferénsia imprensa no mós halo publisidade liuhosi jornais, aprezenta dadus balun kona-ba deskonfia indikasaun subornu hosi kompañia internasionál ConocoPhillips ba Mari Alkatiri ho baze dokumentu hosi kompañia Oceanic Exploration ne’ebé akuza katak ConocoPhillips fó subornu ba Mari Alkatiri hamutuk millaun $2.5.

Mari Alkatiri konsidera katak, akuzasaun sira ne’e la fundamentu nune’e nia parte rekore MP hodi buka lia los, maske antes ne’e hafoin depoitmentu ho MP, Mari Alkatiri la esplika detallu ba públiku kona-ba konteúdu keixa tanba segredu justisa.

Lider masimu Fretilin ne’e fó hanoin katak, keixa ne’e relasiona ho Deputadu Bankada CNRT hala’o deklarasaun ida iha bankada liu hosi konferénsia imprensa temi nia parte ne’ebé laiha fundamentu.

Tuir informasaun Dili Post asesu, prezensa Xanana Gusmao iha MP hanesan sasin ba keixa ne’ebe hato’o.

Ligadu ho ida ne’e, Xanana Gusmao rasik komfirmadu sei marka prezensa, tuir orario tuku sia dadersan.

Observasaun Dili Post iha tereinu, movimentu iha estrada Publiku MP lao normal hela nomos hetan kontrolu husi parte seguransa.

Ligadu ho kazu refere, antes ne’e ba Dili Post, via telefone Xefe Bankada CNRT, Duarte Nunes informa, simu ona notifikasaun husi MP nune’e sei ba hatan nudar arguidu.

“Hau simu ona notifikasaun, no sei hatan iha loron 29 fulan Marsu 2021. Sira seluk hau seidauk hatene, ami sei ba hatan ida-idak. Tuir karta notifikasaun, hau sei ba hatan iha loron 29 fulan Marsu tinan 2021, oras tuku sanulu dadersan,”tenik Duarte.

Xefe Bankada CNRT ne’e hatutan, nia parte konsideradu hanesan arguidu tuir notifikasaun MP, enkuantu Kay Rala Xanana Gusmao atual lider Masimu Partidu CNRT, nudar testamunha.

Kona ba pozisaun Kay Rala Xanana Gusmao, atual Xefe Bankada CNRT ne’e afirma, sei prezensa mos iha MP. (asa)

About dilipost

Check Also

Sidadaun Indonezia nain 6 iha hela Prizaun Bekora

DILI Post- Sidadaun Indonezia hamutuk nain neen (6) sei iha hela prizaun Bekora. Diretor Prizaun …

Leave a Reply

Your email address will not be published. Required fields are marked *