Saturday , December 3 2022

Deputadu ‘Goza’ Povu Nia Sofrementu

DILI Post-Liu husi Estadu ou poder, klase elite bele asesu ba soin Timór nian ho fásil. Nune’e, poder nu’udar xave importante atu klase ida asegura nia interese iha sosiedade.

Maski, agora daudaun povu moris hela iha mukit nia laran ho sofrementu oioin. Realidade, deputadu ne’ebe lori aspirasaun povu iha Uma Fukun Parlamentu Nasional (PN), atraplla sosa karreta Pajero ho Laptop. Ida ne’e, signifika Deputadu sira aproveita tempu hodi goza iha povu ninia sofrementu.

Tuir porta voz Miquel Arcanju hateten, la’os ona buat foun uainhira rona no hare desizaun polítika husi polítiku sira ne‟ebé regulariza de’it interese sira nian ba akumula kapitál rohan la’ek liu husi dalan legál ou Lei.

Ne’e korrupsaun legál eziste iha surat tahan mutin nia leten, tanba ida ne’e, ema hotu hare, iha planu Orsamentu Privativu PN ba tinan fizkál 2023 ne’ebé ta’u iha proposta Orsamentu Jerál Estadu (OJE) 2023.

Liu husi Estadu ou poder, klase elite bele asesu ba soin Timór nian ho fásil. Nune’e, poder nu’udar xave importante atu klase ida asegura nia interese iha sosiedade.

Ida ne’ebé aprova Lei, programa no produtu polítika sira-seluk liu husi desizaun polítika ne‟ebé normalmente kompriende nu’udar interese komún,”hateten porta voz Miquel ba jornalista iha kampuz Sentral Universidade Nasional Timor-Leste (UNTL), Segunda-feira  ne’e

Estadu sai hanesan espasu ba elite hodi deside, kontrola, asegura no hakonu sira nia nesesidade partikulár. Nune’e, Estadu, poder no desizaun sira la’os imparsiál ou neutru.

Nu’udar instrumentu atu klase ida uza hodi asegura nia interese no hanehan klase seluk no institusionalizasaun ne’ebe interese partikulár. Sentidu, Estadu, poder no desizaun sira nu’udar interese partikulár klase ida nian ne’ebé universaliza ona sai interese komún.

Eskrita ida ne’e nu’udar estudu ida ba issue sosa karreta foun no laptop ba Deputadu sira no ninia relasaun ho problema sira seluk. Hatudu produtu polítiku hanesan Lei no programa sne’ebé kria husi elite hodi asegura sirania interese. Aprezenta nia implikasaun ba sosiedade, liu-liu povu Maubere. Ikus liu, eskrita ida-ne’e, hatudu ajizénsia no pozisaun Aliansa Maubere Nasionál nian iha luta kontra injustisa estruturál ne’ebé akontese agora no iha futuru.

Sosa karreta luxu nu’udar tradisaun ukun elite iha Segunda-feira, loron 03 Outubru 2022, PN deskuti no aprova ‘Orsamentu Privativu’ ho montante tokon $ 17 resin. Orsamentu ne’e aprova ho votu afavór 45, kontra 1 no abstensaun 11. Tuir Diretora Finansa PN nia esplika, orsamentu.

Nia esplika, Tokon 17 resin aloka ba bein servisu $ 6.569.466.00. Iha ne’e, aloka purvolta $ 900.000.00 ba promosaun no reforsu lasu diplomátiku Parlamentár no $ 2.577.000.00 ba programa akollamentu indusaun Deputadu sira VI Lejislatura nian no apoiu ba Deputadu ne’ebé hala’o hela funsaun no inklui saláriu ba Asesór Nasionál no Internasionál.

Aleinde ne’e, finansia manuál ba Bankada Parlamentár ho montante $ 1.462.000.00, prevé mós atividade kooperasaun entre PN ho TT ba alargamentu frekuénsia radiu PN nian. Despeza ba kapitál menór inklui akizasaun ba veíkulu mobiliariu no ekipamentu móvel sira seluk, ba tinan 2023 prevé orsamentu hamutuk $ 3.878.687.00.

Medida prinsipál sira ne’ebé konsidera iha alokasaun orsamentu ida ne’e, refere ba akizasaun karreta Pajero ba Deputadu VI Lejislatura hamutuk unidade 30 modernizasaun sistema imformátiku no komunikasaun iha sala plenária liu husi sistema sonoru, prevé orsamentu hamutuk $ 1.000.400.00 no akizasaun laptop 65 ba Deputadu sira VI Lejislatura ho osan $ 162.500.00.

Polítika sosa karreta foun no lelaun karreta luxu periódikamente sai ona tradisaun ba Deputadu/a sira iha PN, la’os ona fenómena foun. Sosa karreta foun kada mandatu Lejislatura la iha relasaun ho ejizénsia ou aspirasaun povu Maubere nian.

La’os mós dalan ba Libertasaun povu. Entaun, hatudu saida? Ida ne’e, atu hakonu de’it interese no kán elite polítiku sira nian, ne’ebé sira goza falisidade iha ki’ak, terus no sofrementu nia leten.

Povu Sofre Deputadu Buka Goza

Sofrementu ne’ebé povu sira hasoru tinan naruk ona no tradisaun ne’e durante sira defende, tanba sira planeia, deside no benefisiariu. Pelu kontráriu povu kada loron moris ho injustisa hare iha Estadu ne’ebé pról ba kapitalizmu be hahoris klase hanesan TL. La iha desizaun neutru ou interese komun. Kualkér desizaun polítika sempre afavór no reprezenta interese klase alta ou minoria nian.

Dezenvolvimentu ba interese ba na’ok rekursu Estadu ho ida-ne’e, kualkér aktu ou desizaun sempre ho karákter interese klase no hamosu kontradisaun antagónika kontradisaun ne’ebé la bele hadame ona.

Tanba ne’e, Repúblika Demokrátika la hala’o buat ida hasoru ou la rezolve kontradisaun entre klase sosiál, pelu kontráriu, nia asegura de’it baze hamosu kontradisaun rasik.

Tanba hare, karákter Estadu klase ne’ebé hari’i liu husi kontradisaun antagónika entre povu Maubere ho Kolonialista. Depoizde Independénsia, reprodús kontradisaun foun entre elite ho povu Maubere, ou entre klase dominante ho dominada.

Estadu sempre hala’o nia an la neutru iha sosiedade, tanba ida-idak luta ba nia interese, iha tempu hanesan Estadu sai hanesan espasu domina no kontrola husi klase dominante. Ho nune’e, klase dominante ukun nain aproveita espasu poder ba akumulasaun kapitál akumula soin.

Estadu hanesan mákina atu jere de’it interese klase burgéz ba elite, atu realiza sira nia interese tenke liu husi dalan foti desizaun. Hala’o programa no aprova Lei. Sira aproveita poder, kria Lei hodi legaliza sira nia aktu na’ok no esplora riku soin povu nian ba sira nia interese ho maneira oioin hanesan liu husi Lei n.º 1/2006 8 Fevereiru, konaba Liberdade ba reuniaun no Manifestasaun.

Artigu 5.º koalia konaba ‘restrisaun’, hanesan sita tuir mai  Bandu atu realiza reuniaun no manifestasaun iha fatin públiku ou nakloke ba públiku menus husi metru 100 husi fatin ne’ebé lokaliza sede Orgaun Soberania nian.

Rezidénsia ofisiál titulár Orgaun Soberania nian, instalasaun militár no militarizada, estabelesimentu prizionál, sede reprezentasaun diplomátika no konsulár no sede partidu polítiku.

No bandu realiza manifestasaun iha fatin ne’ebé menús husi metru 100 husi portu, Aeroportu, Instalasaun telekomunikasaun, sentrál ba produsaun enerjia elétrika, depózitu no fatin armazenamentu bee nian, komustivel no materiál inflamavel.

Lei nu.14/2009 de 21 de Outubru, konaba Estatutu renumeratoriu dos titulares dos cargos políticos, ne’ebé hatu’ur saláriu tuir kargu polítika hanesan PR nia saláriu mensal, $ 5,000.00; PPN, $ 4,500.00; VPPN, $ 3,5000.00; Vise Sekretaria meza, PN $ 2,975.00.

Prezidente Bankada, $ 2,925.00; Vise Prezidente Bankada, $ 2,843,25.00; Prezidente Komisaun Espesializada, $ 2,925.00; Vise prezidente Komisaun, $ 2,843,25.00.

Sekretaria meza ba Komisaun, $ 2,762,50.00; Deputadu restante/la iha kargu, $ 2,681,25.00, Primeiru Ministru, $ 4,300.00; Vise PM, $ 3,600.00; Ministru, $ 3,281,25.00; Vise Ministru, $ 2,975.00, Sekretariu Estadu, $ 2,975.00.

Hirak ne’e, seidauk konta ho direitu regalia oioin, inklui pensaun mensal vitalísia. Direitu prerrogativa ba Deputadu sira kada fulan hanesan tuir Resolução nº. 2/2008 de 15 de Fevereiro, kada fulan membru Deputadu/a sira simu $ 450.00 ba alojamentu; $ 300.00 ba pulsa telekomunikasaun no insentivu viájen sai husi Kapital ba Munisípiu entre $ 20 -50, depende ba distánsia.

Aleinde ne’e, subsídiu ba membru Governu hanesan iha Dekretu Governu no. 14/2008 de 13 de Setembru, konaba subsídiu de habitação dos membros do Governo, ne’ebé iha Artigu 7 nú.4 dehan ‘membru Governu, la iha hela fatin ne’ebé fornese husi Estadu iha direitu atu simu subsidiu mensál ho valór $ 500. No, iha nú. 5 dehan ‘membru Governu simu $ 4.50 ba subsídiu manutensaun no rekuperasaun ba bee no eletrisidade.

Lei n.º 1/2007 de 18 de Janeiro, konaba pensaun mensál vitalisia ba Deputadu sira ho regalia sira seluk, iha ne’ebé membru Deputadu/a sira nia mandatu remata ona, la hala’o ona servisu maibé sei simu salaraiu 100%, regalia sira seluk no subsidiu ba reintegrasaun hanesan iha Artigu 1o, 4o no 5o ba elite klase dominante ou mahukun sira, saláriu mensál rihun ba-rihun seidauk to’o, nune’e, kria tan Lei ba hakonu sira nia interese oioin liu husi subsídiu, direitu regalia, pensaun mensál vitalísia.

Sorin seluk, tinan 2012, Komisaun Nasionál Traballu deside saláriumensál ba traballadores $ 1.15. Ida-ne’e, tuir sira elite polítiku, sufisiente ona ba traballador sira. Ida-ne’e, hatudu ba injustisa boot ba povu iha rai-ne’e. Tanba, distribuisaun rekursu deziguál kontribui ba reprodus klase, kontradisaun no injustisa.

Manifestasaun Labele Foka Ba Karreta

Fatin seluk responde ba kestaun sosa karreta tuir Vice II Prezidente Parlamentu Nasionál Luis Roberto ba jornalista sira iha resintu PN, Segunda-feira ne’e, Hateten, nia hanoin atu sosa karreta la’ós impaktu boot ida, Orgaun Soberania ida PN, presiza dunik transporte atu hala’o servisu.

 Nia hakarak husu ba Alinsa Maubere Nasionál (AMN) ho manifestante sira husi Universitariu sira atu hala’o manifestasaun kuandu dezenvolvimentu la la’o, ida ne’e importante, la’ós hala’o manifestasaun hasoru PN atu sosa kareta ou la sosa, sosa Laptop ou la sosa, tanba la’ós ida ne’e maka sai impaktu boot ba dezenvolvimentu.

Klaru estudante sira husi Universitariu hala’o karik iha razaun. Karik husi dezenvolvimentu fízika la dún la’o, la’o mós lentu loos. Depois hakarak sosa Karreta hela de’it ida ne’e mós impaktu ba fundus.(Che/merjho)

About dilipost

Check Also

UE Kontinua Fo Asisténsia Politika Finanseira Umanitaria Ba Povu Ukrania

DILI Post-Embaixador Uniaun Europeia (UE) iha Timor-Leste, Adrew Jacobs informa sira kontinua fo apoiu asistensia …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement