Saturday , December 3 2022

Deskonfia Liman Kroat Na’ok Karau

DILI Post-Akontesimentu ne’ebe foin lalais, akontese iha baze. Riku soin povu hanesan animal haki’ak karau deskonfia hetan tiru husi membru seguransa ou liman kroat povu nian.

Bainhira investigasaun hala’o no deteta ou indika membru seguransa ou nu’udar liman kroat povu nian balun maka hala’o dunik. Signifika ka’er kilat hodi proteze riku soin povu, la’os ba kasa hikas povu ninia animal haki’ak entaun povu ta’u laran ba se loos.

Depois ida ne’e, tenke fó sansaun, tenke multa ba komunidade sira nia animal. Atu liberta komunidade sira ninia moris husi ki’ak no mukit. Agora ba na’ok fali sira nia animal fuik. Asosiasaun HAK husu hela ba Provedoria Direitus Humanus no Justisa (PDHJ), Parlamentu Nasionál (PN) Komisaun B, Ministériu Interiór (MI) atu hala’o investigasaun, tenke hari’i ona ekipa independente ida atu hala’o investigasaun ba kazu ne’e.

Hatan ba preukupasaun hirak ne’e, Diretór Asosiasaun HAK, Sisto dos Santos, foin lalais iha ninia kna’ar fatin Farol-Dili hateten, iha Lei ne’ebé regula ema iha armas só Instituitusaun rua hanesan F-FDTL ho PNTL. Bainhira komunidade sira nia karau ne’ebé hetan tiru klaru mai husi Instituisaun rua refere.

Tanba ne’e MI, tenke hala’o investigasaun ba kartus musan ne’ebe Institutusaun uza. Unidade ne’ebé PNTL ou F-FDTL só iha rua de’it. Nia hatutan, hanesan akontesimentu iha Maliana, Suai no Oekussi bele deskonfia ema sira iha mota sorin ne’eba. Maibé, ida ne’e akontese iha Natarbora tenke investiga ho sériu, sé mak uza kartus musan ne’e.

Nia klarifika MI seidauk seriu, tuir loloos semana rua (2) laran iha kbi’it ne’ebé estraordináriu atu bele deskobre lalais. Nusa iha tempu defisil bele hetan lalais se-se mak komete hela kazu ruma.

Nia haktuir, ohin ne’e animal komunidade nian. Aban bainrua bele komunidade sira maka sai alvu ba unidade ne’ebé malandru ba estraga hela komunidade sira nia animal.

Asosiasaun HAK ezije ba MI atu hala’o investigasaun kartus musan ne’ebé agora daudaun komunidade sira rekolla hela. Hein hela MI iha seriédade liu husi akompañamentu PN Komisaun B, tenke anunsia ba públika katak kilat ida ne’ebé unidade uza hodi tiru animal mai husi F-FDTL ou Polisia Nasional Timor-Leste (PNTL).

Maibé, tanba saida iha situasaun ida ne’ebé agora ordinariu, instrumentu hotu-hotu bele uza tanba saida fulan ida mós seidauk deskobre, signifika MI seidauk sériu.

Asosiasaun HAK konsidera MI seidauk sériu no PN la konsege hala’o fiskalizasaun ba MI ninia servisu. PDHJ moa la sériu atu tau matan, ba saida maka akontese ne’e nu’udar problema Direitus Humanus.

Responde ba kestaun hanesan tuir Vise Ministru Interiór António Armindo hateten, Komandu Polísia Nasionál Timor Leste (KPNTL), hala’o ona rekolla bala musan ne’ebé tiru komunidade nia karau iha Aldeia Fehuriin, Suku Uma Boco, Postu Administrativu Natarbora, Munisípiu Manatuto.

Normalmente iha ona identifikasaun, atu kontinua investigasaun no imbloku ne’ebé uza tiru komunidade ninia karau no agora daudaun iha ona KPNTL, atu hala’o investigasaun no rekolla ona bala musan hirak ne’e. hateten Vise Ministru Interiór António Armindo ba Dili Post, iha Aeroportu Internasionál Nicolão Lobato Komoro, foin lalais.

Tanba ne’e, sei hare relatóriu refere, atu hatene bala musan sira ne’e. Nia esplika, naturalmente bala busan ne’ebé iha Timor ne’e kuaze modellu ida de’it. Depende ba investigasaun la’o lai. Bainhira kompleta ona parese relatóriu sei mai iha MI.

Molok ne’e, Sosiédade sivil liu husi Asosiasaun HAK no Asia Justice And Rights (AJAR) husu ba MI atu hala’o investigasaun ba kartus musan ne’ebé daudaun ne’e komunidade Natarbora rekolla hela.(lx)

About dilipost

Check Also

Deskonfia MJ Iha ‘Mafia’ Ba Rai

DILI  Post—Reprezentante povu iha Uma Fukun Parlamentu Nasionál (PN) deskonfia iha ‘Mafia’ Konaba rai disputa …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement