Tuesday , September 28 2021

Deskonfia RAEOA Halo Diskriminasaun Atoni Oan Sira Ba Oe-cusse

Portavoz Atoni Oan, Zeka Friado

Dili Post — Deskonfia autoridade Rejiaun Administrativa Espesiál Oe-cusse Ambenu (RAEOA) halo diskriminasaun ba estudante atoni oan sira ne’ebé atu tuir teste swab fila bá Oe-cusse.

Portavoz Atoni Oan, Zeka Friado konsidera, diskriminasaun ne’e mosu, tanba naran estudante sira-ne’ebé submete bá tuir teste swab la’ós lista ne’ebé sira hatama, maibé bolu tuir família de’it.

“Diskrimina ne’ebé mak uluk ami hakilar Prezidente Autoridade RAEOA, ohin ne’e ejíste momoos loos iha ami-nia matan laran, konkordánsia entre ami ho pilár 3 ho sira (RAEOA), ami halo ko’alia katak, atu transporta tan ema ba Oe-cusse sei bazeia ba lista ne’ebé ami oferese ba sira, enfelizmente lista ne’ebé sira bolu ne’e, bolu de’it sira-nia família,” dehan Zeca, Segunda (14/06) iha edifísiu ZEESM Farol, Dili.

Lista estudante atoni oan atu fila ba Oe-cusse ne’ebé submete ba autoridade RAEOA hamutuk 187, maibé laiha ema nia naran mak rejista atu tuir teste swab.

“Ne’e 187 tuir konkordánsia entre ami ho sentru integradu, maibé ohin saida mak akontese, bolu de’it família, la bolu totál, bolu de’it nia família nein ida iha,” dehan nia.

Koordenadora Ekipa Forsa Servisu ZEESM Fátima Olga Amaral Hei

Hatán ba preukupasaun ne’e, Koordenadora Ekipa Forsa Servisu ZEESM iha Dili, Fátima Olga Amaral Hei klarifika, autoridade RAEOA la halo diskriminasaun, tanba sira hotu mesak atoni oan de’it.

“Iha ne’e laiha diskriminasaun, tanba lista mai duni husi sira, maibé balun mós mai alista iha edifísiu ZEESM nian, ne’ebé lista hotu-hotu laiha atu halo diskriminasaun, tanba ne’e ema atoni oan sira hotu,” klarifika Fátima.

Autoridade RAEOA sei transporta de’it ema na’in 80 fila ba Oe-cusse, tanba fatin kuarentena ne’ebé autoridade prepara, limite ba ema na’in 80 de’it labele liu.

“Ita haree husi fatin kuarentena RAEOA nian, tanba etapa primeiru 80 pessoas mak ba, iha ne’ebá 80 pessoas kuandu sai, entaun taka fali mós ho 80 iha segundu, maibé ami hein kuarentena fatin sei iha oportunidade atu bele tama tan, sira bele bá,” dehan nia.

Tuir planu, autoridade RAEOA iha Dili, sei transporta tan estudante atoni oan sira iha Dili fila ba Oe-cusse iha kinta semana ne’e, maibé sei hein hela rezultadu teste swab husi laboratóriu nasionál.

Tanba ne’e, bainhira iha sidadaun balun maka konfirmadu pozitivu bá Covid-19, maka autoridade RAEOA sei la admite nia fila bá Oe-cusse.(ajo)

About dilipost

Check Also

Inspetor Xefi Mauclau Hakotu Iss iha HNGV

DILI Post-Ofisial Polisia Nasional Timor-Leste (PNTL), ho diviza Inseptor Xefi Mauclau Marcal Amaral Magno (49) …

Leave a Reply

Your email address will not be published. Required fields are marked *