Monday , May 17 2021

Dezastre Naturais: Mate Sa’e Ba 42, Governu Deklara Estadu Kalamidade Loron 30

Dili Post — Relasiona dezastre naturais ne’ebé akontese husi udan boot foin lalais rezulta vítima mortal komesa sa’e ba na’in 42.

Inklui estraga mós infraestrutura públika no populasaun sira-nia hela fatin.

Sekretáriu Estadu Protesaun Sivil, Joaquim José Gusmão dos Reis Martins, aprezenta ba Konsellu Ministru kona-ba pontu situasaun husi impaktu inundasaun iha loron 4 fulan-abril tinan 2021, ne’ebé provoka husi siklone tropikál Seroja.

Tuir dadus hirak ne’ebé aprezenta ona iha sorumutuk, inundasaun provoka besik ema rihun sanulu maka lakon uma iha Dili, ne’ebé daudaun ne’e alojadu iha sentru akollimentu ne’ebé espalla iha sidade.

Bee-sa’e ne’e provoka ema 42 maka mate, 22 husi Dili, 10 Ainaro, 5 Manatutu, 3 Vikeke no na’in 2 iha Aileu.

Nune’e, iha reuniaun Konsellu Ministru, governu aprova rezolusaun governu ida hodi deklara, Timor-Leste tama iha estadu kalamidade ba periódu loron 30.

Ministru Prezidénsia Konsellu Ministru, Fidélis Magalhães hateten, dezastre naturais ne’e provoka ema na’in 42 mak lakon sira-nia vida.

“Dezastre naturais ne’e provoka ema na’in 42 lakon sira-nia vida, 22 husi Dili, 10 iha Ainaru, 5 iha Manatutu, na’in 3 iha Viqueque no na’in 2 iha Aileu. Konsellu ministru mós aprova rezolusaun ida kona-ba estadu kalamidade, deklarasaun situasaun kalamidade ba periódu loron 30,” Ministru Fidélis informa ba jornalista, liu husi komferénsia imprensa, hafoin remata enkontru Konsellu Ministru iha Palásiu Governu, Kinta (8/04).

Nia esplika, deklarasaun estadu kalamidade ne’e sei abranje de’it ba munisípiu Dili, maske dezastre ne’e akontese iha munisípiu hotu-hotu iha Timor laran tomak.

“Situasaun kalamidade ida-ne’e ita halo liu-liu, tanba inundasaun iha munisípiu Dili, maske iha munisípiu sira seluk mós sofre, maibé kategoria iha munisípiu sira seluk la hanesan ho situasaun kalamidade iha situasaun munisípiu,” subliña nia.

Ho rezolusaun refere, kria ona grupu servisu tékniku ne’ebé sei responsavel ba identifikasaun infraestrutura no ekipamentu públiku koletivu ne’ebé mak hetan estraga husi inundasaun no hodi prepara proposta sira ba nia rekonstrusaun ka reabilitasaun.

No mós bandu sidadaun sira atu harii uma iha fatin ne’ebé rísku aas ba inundasaun.

“Kria ona grupu servisu tékniku ne’ebé mak sei identifika responsável identifikasaun infraestrutura no ekipamentu públiku koletivu sira, no bandu mós atu harii uma iha fatin sira-ne’ebé rísku aas atu-bele sofre estragus, see derepente udan boot tun tan,” Fidélis afirma.

Tan ne’e, nia dehan governu mós sei bandu atu labele kontinua ho obra hirak ne’ebé bele tau rísku liu seguransa públiku nian iha futuru.

Alem de ne’e, konsellu ministru mós aprova Timor-Leste atu esforsu ba mobilizasaun apoiu internasionál sira hodi rekupera fali danus sira-ne’ebé rezulta husi inundasaun iha loron 4 fulan-abríl foin lalais ne’e.

“Ho ida-ne’e MNEK mak sei koordena ho paíz sira seluk iha li’ur, atu-bele mobiliza apoiu internasionál possível hodi bele apoiu Timor-Leste hodi rekupera,” hakotu nia.(ajo)

About dilipost

Check Also

KNKTI Deklara Apoiu Governu Elimina Traballu Infantil

Dili Post— Komisaun Nasional Kontra Traballu Infantil (KNKTI) deklara sei fó apoiu governu hodi kombate …

Leave a Reply

Your email address will not be published. Required fields are marked *