Saturday , December 3 2022

Dezenvolve Setór Agrikultura, To’os Na’in Tenke Organiza Aan

MANUFAHI (DILI Post)-Administradór Munisipiu Manufahi, Arantes Isaac Sarmento husu ba kamponezes tomak iha Munisipiu Manufahi atu organiza an iha sumbrina ida nia laran, atu nune’e bele dezenvolve setór agrikultura.

Timor-Leste iha potensia bo’ot ba agrikultura, nune’e mós iha Munisipiu Manufahi. Maibé, potensia hirak ne’e dala barak agrikultór sira utiliza de’it ba konsumu loron-loron nian, ne’e duni liu husi kongresu ida ne’e, oinsá atu organiza agrikultor sira iha sumbrina ida, nune’e bele moderniza agrikultór sira.

“Kongresu hodi halibur malu ne’e importante tebes,tanba iha prosesu luta ba libertasaun povu, estadu no governu mesak de’it labele halo buat ida, maibé presiza ema hotu hotu nia apoiu no kontribuisaun atu kolabora hodi liberta povu ida ne’e,” deklara Administradór Munisipiu Manufahi, Arantes Isaac Sarmento iha kongresu dahuluk Uniaun To’os Na’in Manufahi ne’ebé realiza iha salaun Administrasaun Munisipiu Manufahi, loron 24 Janeiru 2022.

Nu’udar servidor povu iha Munisipiu Munifahi, nia parte apoiu tebes kongresu ne’ebé to’os na’in sira organiza, ne’e duni fiar katak, ita bo’ot sira sei fó rejultadu di’ak no hamutuk hodi dezenvolve setor agrikutura iha rai Manufahi.

Nia haktuir, husi parte administrasaun munisipiu mós ko’alia ona ho Diretur Agrikultura Munisipiu Manufahi atu identifika rai hirak ne’ebé abandona hela, liu-liu iha area Betano, tanba estadu iha obrigasaun atu foti, ne’e duni sei uniaun to’os na’in ida ne’e maka organiza malu ho di’ak, entaun bele fó ba ita bo’ot sira atu jere.

Iha historia luta liberta patria, Dom Boa-Vintura hahú, depois Francisco Xavier do Amaral proklama no kontinua fó tan ninia oan ida Francisco Borja no ohin to’os na’in Munisipiu Manufahi hakerek tan historia foun, tanba liu husi atividade ida ne’e atu liberta povu husi ki’ak no mukit.
Prinsipiu fundamental ida atu liberta povu maka, identifika fatin potensia sira hodi halo atividade agrikultura nian, la’os uza fali hodi hari uma.

Nia esklarese, liu husi atividade hirak ne’e hotu bele garantia soberania aihan no hasae produsaun iha rai laran, nune’e bele halo diversifikasaun iha toos, diversifika rendimentu no diversifika aihan iha meja.
“Ha’u hanoin pontus tolu ne’ebé ohin temi, ida ne’e sai hanesan save ida hodi hasa’e rendimentu ekonomia no garante agrikultura sustentavel,” tenik nia.

Ema kuandu atu loke industria boot ida iha rai Manufahi, presiza hahan, aifuan, manu no produtu lokal sira, maibé se lori fali aihan husi rai liur, ida ne’e moe bo’ot ida ba ita.

Entertantu membru komite konsolidasaun nasional ba reforma agraria Timor Leste, Madalena Bidau Soares “Kasian” hateten, to’o na’in sira hotu tenke hamutuk maka iha forsa hodi luta ba povu nia moris di’ak. Maibé, atu dezenvolve setor agrikultura ita tenke iha rai, ne’e duni husu ba Timor oan atu labele fa’an rai.

“Uluk ita luta ba rai ne’e, la’os atu fa’an fali rai, maibé atu uza rai hodi halo produsaun, hodi nune’e bele dezenvolve ekonomia rai laran, liu-liu hadia ekonomia familia,” informa Veterana Kasian.

Nune’e mós, iha abertura ba kongresu dahuluk uniaun to’os na’in Munisipiu Manufahi, Xefi Kasa Sivil Prezidente Republika, Francisco Maria de Vasconcelos husu ba kamponezes no organizasaun toos na’in sira atu kontinua organiza malu hodi hodi halo servisu iha toos no natar, nune;e bele hasae produsaun iha rai laran.

“Ita tenke han buat ne’ebé ita kuda, nune’e labele dependete ba produsaun iha husi rai liur,” informa Xefi Kaza Sivil. (**)

About dilipost

Check Also

Ular Metan Iha Berlin

DILI  Post-La sente durante ne’e, atividade hotu-hotu iha Ro Berlin Ramelau la’o normal hela. Maibe, …

One comment

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement