Thursday , May 19 2022

Entre Assanami Ho Loromau, PD Sei Hili Ida Kompete Iha ElPre


DILI Post – Partidu Demakratiku (PD) sei hili manu aman nain rua, entre Mariano Assanami Sabino ho Adriano do Nascimento ‘Loromau’ liu husi konvensaun Nasional kompete iha Eleisaun Prezidensial (ElPre).

Figura nain rua ne’e anunsia ona ba Publiku, iha Komferensia Imprensa, Segunda (10/01) ohin.

Sekretariu Jeral (SekJer) PD,Antonio da Conceição ofisialmente deklara sira identifika ona kandidatu nain rua atual Prezidente PD, Assanami no Prezidente CPN, Loromau ne’ebe sira sei prepara avansa ba ElPre.

“Kandidatus PD rua ne’e sei halao sira nia debate iha loron 15 de Janeiru, hodi aprezenta sira nia vizaun nudar Prezidente da Repúblika ba partisipantes konvensaun Nasional molok hili demokratikamente ida nudar Kandidatu Nasional atu kompete ho kandidatu seluk ba Elpre 2022-2027,” dehan Sekjer PD ne’e, iha sede Kolmera-Dili, ohin.

Ne’e duni, nia dehan atu haburas no hametin demokrásia iha Timor-Leste maka PD hakarak ofisialmente anunsia Partisipasaun PD ho nia kandidatus preparadus atu konkore iha ElPre.

Iha fatin hanesan Prezidente PD Mariano Assanami Sabino afirma PD iha responsabilidade nudar Partidu tuan ne’ebe iha mos dever prontu atu servi.

“PD nia Kandidatura ne’e responsavel, ne’e duni PD tenke prontu ba Estadu , kandidatura husi PD sei sai Kandidatura povu nian hodi sai prezidente ba Povu, “tenik Assanami.

Nune’e mos Prezidente CPN PD, Adriano do Nascimento hateten líder PD mai ho prinsipiu ida ne’ebe atu servi tuir mekanismu Demokratizasaun nasaun nian.

“Ami mai hanesan lider ida ho prinsipiu atu servi. Maibe, tenke taes liu husi mekanismu Demokratiku, nune’e demokratizasaun iha nasaun ne’e bele lao tuir ita Nia hakarak,” subliña Loromau.

Enkuantu PD sei Submete lista kandidatura nasional ba Tribunal Rekursu iha loron 4 Feverreiru ne’e hafoin iha ona dezisaun liu husi konvensaun nasional ba kandidatu loloos kompete iha ElPre ne’ebe sei akontese tempu badak.(JAVEL)

About dilipost

Check Also

Virgilio Reativa Dispensaun Prezidente KI

DILI Post–Prezidente Konsellu Imprensa (KI), Virgilio Guteres halo reativasaun ba dispesaun durante fulan tolu nia …

Leave a Reply

Your email address will not be published.