Monday , June 27 2022

EUA Oferese Tan Ekipamentu Médiku Kaixa 60 Ba MS

DILI POST – Ekipamentu mediku kaixa neen nulu (60) apoiu husi Estadus Unidus Amerika (EUA) ba Ministeriu Saude (MS) luta kontra COVID-19.

Kontribuisaun EUA nian ne’e liu ona millaun $5.9 no doze 100,620 vasina Pfizer.

Tuir karta komunikadu ne’ebe Dili Post asesu husi asuntu publiku embaixada EUA, Tersa (1/02) ohin.

Enkaregadu Negósiu Embaixada EUA Tom Daley entrega tan ekipamentu médiku salva-vida nian kaixa 60 ba MS iha Ajénsia Fornesimentu Médiku no Farmásia Timor-Leste.

Doasaun ba fornesimentu no ekipamentu protesaun pesoál husi Forsa Aérea Pasífiku Estadus Unidus nian (PACAF) sei apoia esforsu Timor-Leste nian hodi luta hasoru COVID-19.

Ho valór hamutuk $20,000, ekipamentu sira ne ‘e inklui ekipamentu sirúrjiku,sapatu botas no ekipamentu médiku esensiál sira seluk nu’udar parte ida husu kontribuisaun ida uluk husi PACAF iha fulan Outubru tinan 2021.

“Estadus Unidus Amérika hamriik ho Timor-Leste hanesan belun no parseiru rohan laek ida tanba ita servisu hamutuk hodi kombate COVID-19,” hatete Enkaregadu Negósiu Embaixada EUA Tom Daley.

Nia hatutan, Estadus Unidus foti hela abordajen abranjente ida hodi hapara pandemia ne ‘e, hodi hamenus risku COVID-19 ba povu no sosiedade sira, no hametin rekuperasaun globál no prontu atu hasoru ameasa pandemia ne’ e iha futuru.

“Ami intensifika apoiu ba Timor-Leste atu salva ema nia vida tanba ida ne ‘e duni mak buat ne’ ebé loos atu halo,”tenik Tom.

Entertantu EUA servisu hamutuk ho Governu Timor-Leste husi kedas inisiu pandemia ne’e hodi fornese vasina Pfizer doze 100,620 no millaun $5.9 iha asisténsia krítiku hodi kombate COVID-19.

Ne’ e inklui fundu millaun $ 2.3 husi Komandu Indo-Pasífiku Estadus Unidus no Ajensia Estadus Unidus ba Dezenvolvimentu Internasionál (USAID) atu harii fasilidade izolamentu iha Baucau, harii unidade kuidadu móvel iha Dili, no hasa ‘e kapasidade bee no saneamentu iha sentru kuarentena iha Batugade.

Esforsu ida ne’ e harii ho valór liu millaun $250 ne ‘ebé USAID kontribui ona hodi apoia dezenvolvimentu inkluzivu no pasifiku iha Timor-Leste dezde 2002. (**)

About dilipost

Check Also

Sofre Tensaun Altu, Don Norberto Baixa Iha HNGV

DILI Post – Bispu Dioseze Maliana Don, Norberto Amaral baixa iha Hospital Nasional Guido Valadares …

Leave a Reply

Your email address will not be published.