Thursday , December 2 2021

GAM No Arte Ritual Hadame Malu Iha Atabae

DILI Post– Ministériu Interiór liu hosi Diresaun Nasionál Prevensaun Konflitu Komunitaria (DNPKK), servisu hamutuk ho g+7 realiza programa diálogu no rekonsiliasaun entre eis Grupu Arte Marsiais (GAM) no Arte Rituál kompostu husi PSHT, IKS, KORK no 77, 55, Kolimau, THS-THM hodi halo mediasaun iha nivel komunitaria ne’ebé hala’o iha Suku Aidaba Leten, Postu Administrativu Atabae, Munisípiu Bobonaro.

Vise-Ministru Interiór, Antonio Armindo, ne’ebé sai sasin ba juramentu Grupu Arte Marsiais no Arte Rituál ne’e hateten, husu atu ema hotu kumpri juramentu ne’ebé halo hodi hadok a’an hosi violénsia.

“Ita sai sasin ba serimónia rituál no dame malu entre Grupu Arte Marsiais no Arte Rituál iha fatin ida-ne’e liuhosi juramentu ba bandeira lulik RDTL no Maromak katak hahú hosi loron ohin 16 novembru 2021 prontu lolo liman ba malu hodi simu no dame malu hanesan maun alin. Tanba ne’e tenke loyál ba komprimisiu ne’ebé halo ona hodi hametin nafatin unidade no fraternidade ida ne’e”, hateten Vise-Ministru Antonio Armido ba partisipante sira iha salaun Postu-Administrativu Atabae, Tersa ne’e.

Nia mos konsidera juramentu ne’e importante no nia husu atu joven sira kumpri akordu ne’e no labele uza tán kroat hodi ameasa malu tanba kualker aktu violénsia sei prosesa tuir lei ne’ebé vigora iha Timór-Leste.

“Ita hotu entende katak modalidade Arte marsiais nia pratika ohin loron iha mundu rai klaran ninia orientasaun ba liu desportivu ho objetivu prinsipál maka kompetisaun enkuantu Artes Rituais iha ninia pratikas maka defeza pesoál liuhusi asaun rituais ho esénsia halo kalma isin (fiziku) no klamar (espirituál). Tanba ne’e Guvernu iha ona inisiativa no buka dalan hodi formaliza no halo reajustamentu ba estrutura GAM nune’e iha futuru bele sai hanesan arte desportu ida”, afirma nia.

Governante ne’e mós husu ba GAM no Artes Rituais sira hotu atu asegura paz no estabilidade hodi kontribui ba prosesu dezenvolvimentu iha Timór-Leste.

“Hanesan ema Bunak oan ha’u sente ita mesak uma mane feto san deit. Entaun ho eventu ida-ne’e fanun ita atu hanoin ona katak unidade tenke hahú iha fatin ida-ne’e. Tanba ne’e ha’u husu ba Grupu Arte Marsiais hotu iha timór laran tomak atu iha hanoin no espiritu joventude nian labele iha tán konfrontasaun maibe buka esforsu a’an atu hadia moris no hametin liután unidade tanba ho nune’e maka bele kria paz no estabilidade iha Suku ida-ne’e nomós nasaun kiik ida-ne’e”, nia sujere.

Serimónia diálogu no rekonsiliasaun entre eis Grupu Arte Marsiais no Arte Rituál ne’e hetan mós partisipasaun hosi Komandante Komandu PNTL Munisípiu Bobonaro, Superintendente Polísia, Antonio Mauluta, Administradór Postu Atabae, Lino Tavares, Diretór Operasionál g7+ Felis Piedade, Prezidente Komisaun Reguladora Arte-Marsiál (KRAM), Octaviano da Conceição.

No mos Diretór Nasionál DNPKK, Antonio Viegas, Komandante Bombeiros Maliana, Vitorino Lopes, Komandante BOP COP C, Rosalino dos Santos, Autoridade lokál, veterano no bainaka importante seluk iha Suku Atabae nia laran. (MrQ)

About dilipost

Check Also

PNTL Prende Kilat Anin No Fugetis Iha Microlete Laran Iha Area Tunubibi

DILI Post- Komandu Polisia Nasional Timor-Leste (PNTL), Munisipiu Bobonaro hosi ekipa Alfa no Forsa Rezerva …

Leave a Reply

Your email address will not be published. Required fields are marked *