Friday , August 12 2022

Governu Deside Hapara Serka Sanitária Iha Fatumea, Extende EE Ba Dala-12

DILI Post – Governu liu husi Konsellu Ministru deside hapara ona implementasaun serka sanitária no konfinamentu obrigatóriu iha postu administrativu Fatumea munisípiu Covalima, hafoin aplika durante fulan ida nia laran, tanba identifika kazu transmisaun lokáli iha postu refere.

Desizaun ne’e Konsellu Ministru foti, hafoin rona tiha aprenzentasaun husi ekipa Sentru Integradu Jestaun Krize (SIJK) sala de situasaun ne’ebé lideradu husi, Brigadeiru Jerenál João Miranda “Aluc Descartes”.

Ministru Prezidénsia Konsellu Ministru, Fidelis Manuel Leite Magalhães hateten, tuir relatóriu ne’ebé ekipa SIJK sala situasaun hato’o ba konsellu ministru katak, evolusaun moras surtu Covid-19 no mós nível transmisaun lokál virus corona iha postu administrativu Fatumea kontroladu ona.

“Konsellu ministru mós aprova proposta rezolusaun governu ne’ebé deside atu halo para ona serka sanitária iha postu administrativu Fatumea munisípiu Covallima, tanba tuir relatóriu ne’ebé SIJK hato’o katak, moras iha ne’ebá kontroladu ona, no nível transmisaun mós kontroladu ona, entaun permite konsellu ministru bele disidi hodi halo para ona serka sanitária iha Fatumea. Ho ida-ne’e, munisípiu Covalima tomak laiha ona serka sanitária,” dehan Ministru Fidelis Magalhães ba jornalsita,Kuarta-feira (23/03/31) iha Ministériu Finansas, Díli.

Hapara serka sanitária iha Fatumea ne’e, konsellu ministrus aprova ona projetu Rezolusaun Governu ne’ebé revoga Rezolusaun Governu nu. 13/2021, loron 10 fulan-marsu, ne’ebé impoin Serka Sanitária iha Postu Administrativu Fatumea.

Nune’e, daudaun ne’e rejista kazu esporádiku iha Oekuse no Covalima, propagasaun kazu iha Baukau, Vikeke no Lospalos ho orijen iha ema sira ne’ebé mai iha Dili, molok impozisaun serka sanitária, no propagasaun maka’as liu husi SARS-CoV-2 iha área oin-oin sidade Dili nian.

Nune’e mós, haree ba mudansa preokupante husi situasaun epidemiolójika no proliferasaun ba kazu sira ne’ebé mak rejista ona husi kontájiu Covid-19 nian, tantu iha nivel rejionál, no mós iha nivel mundiál, no atu evita no neutraliza risku sira husi propagasaun SARS-CoV-2, atu nune’e bele proteje saúde públika no iha kbiit atu hatán ba Sistema Nasionál Saúde nian.

“Konsellu ministru mós aprova proposta renovasaun ba estadu emerjénsia husi Primeiru-Ministru, ida-ne’e sei hato’o proposta ba Prezidente Repúblika no sei tuir prosesu korridór konstituisaun nian, depois mak sei hato’o fali ba Parlamentu Nasionál,” dehan Ministru Fidelis.

Fidelis realsa, bainhira Parlamentu Nasionál (PN) autoriza ona Xefe estadu atu dekreta tan estadu emerjénsia ba dala-12 durante loron 30, tamak governu sei aprova mós medidas komplementár sira.

“Hafoin de ida-ne’e, governu sei aprova medida sira, aprovasaun sira-ne’e ba medidas estadu emerjénsia ne’ebé mak sei tama einvigór iha dia 2 de abríl to’o maiu. Iha loron ida ka rua nia laran, señór Primeiru-Ministru sei hato’o liu husi karta pedidu ba PR no PR sei konvoka órgaun konstitusionál sira tuir dalan ne’ebé konstituisaun rasik hatur,” tenik nia.

Governu sei propoin Prezidente Repúblika katak, ho renovasaun estadu emerjénsia nian ne’e, permite atu suspende ka limita direitu no garantia fundamentál balun.

Ne’e mós hanesan prioritáriu hodi prevene transmisaun virus ba munisípiu sira seluk no atu prepara asaun sira mitigasaun nian ne’ebé presiza ba posivel foku transmisaun komunitária ne’ebé bele iha.

Objetivu prioritáriu sira seluk maka mitigasaun kona-ba efeitu sosiu ekonómiku sira COVID-19 nian.(ajo)

About dilipost

Check Also

PM Taur Simu Vizita Ofisial Husi MNEK Xina

DILI Post-Primeiru Ministru (PM) Taur Matan Ruak, Sesta feira loraik ne’e iha Palásiu Governu, simu …

Leave a Reply

Your email address will not be published.