Friday , May 20 2022

Governu Extende Kofinamentu Obrigatóriu Iha Dili Ba Loron 14

Dili Post — Governu liu husi reuniaun konsellu ministru aprova rezolusaun governu ne’ebé mantein impozisaun konfinamentu obrigatóriu jeral iha munisípiu Dili ba loron 14 tan.

“Konsellu ministru aprova rezolusaun governu kona-ba serka sanitária, iha munisípiu Dili, munisípiu Bobonaru no munisípiu Covalima ita impoin serka sanitária loron 14. Iha munisípiu Baucau no munisípiu Vikeke ita renova serka sanitária ho durasaun loron 7 de’it,” dehan Ministru Prezidénsia Konsellu Ministru, Fidelis Magalhães, hafoin somuturu extra-ordinária konsellu ministru,Segunda (31/05) iha Ministériu Finansas.

Ba munisípiu Baucau ho Vikeke governante ne’e esplika, númeru infesatun covid-19 iha munisípiu rua refere komesa di’ak ona kompara ho munisípiu sira seluk.

No husu populasaun sira atu kontribui halo esforsu hodi hakotu lalais korrente transmisaun virus SARS-CoV-2 iha ida-daik nia munisípiu, nune’e normaliza fali situasaun sira.

“Vírus laiha ain no semo ba mai, vírus ne’e so da’et ba mai liu husi ita ema mak pasa ba mai, tanba ne’e mak husu ba ita-nia maluk sira, tanba ne’e mak husu ba ita-nia maun-alin sira iha munisípiu Covalima, Bobonaru no Dili, atu kontribui ba esforsu hotu par halo kotu tiha kadeia transmisaun ne’e,” tenik Ministru Fidelis.

Nia hatutan, maske konfinamentu obrigatóriu, maibé governu mós fó fleksibilidade ba sidadaun sira atu halo kartaun eleitral hodi partisipa iha eleisaun prezidensial 2022 nian.

“Iha rezolusaun konfinamentu obrigatóriu ne’e mós introdús pontu ida, atu garante movimentu sidadaun sira nian ne’ebé mak presiza atu halo resenseamentu eleitoral. Konforme lei, antes eleisaun tenke halo resenseamentu atu valida hirak ne’ebé mak elijível hola parte iha votasaun, no sira ne’ebé mak hakarak sai kandidatu,” tenik nia.

Nune’e mós, tuir dadus ne’ebé Sentru Integradu Jestaun Krize sala situasaun revela, husi loron 14 ikus ne’e, husi 17 to’o loron 30 fulan-maiu, rejísta infetadu total hamutuk 2.432 ho virus SARS-CoV-2.

Husi númeru ida-ne’e hamutuk kazu 2.043 rejísta iha Dili, iha munisípiu Bobonaru hamutuk kazu 131, Kovalima kazu 81, Baucau kazu 55, vikeke kazu 53.

Kona-ba implementasaunn vasina kontra covid-19, to’o ohin loron Timor-Letse simu ona doze rihun 60 husi vasina AstraZeneca ne’ebé ofrese husi Austrália, no doze rihun 24 proveniente husi mekanizmu covax.

Dezde inisípiu kampaña vasinasan kontra covid-19 iha loron 7 fulan-abríl, simu ona vasina husi doze dahuluk total 76.587 iha nasaun tomak korresponde 10% husi populasaun ho idade liu husi 18 ba leten, munisípiu Dili vasina ona ema hamutuk 64.005 ne’ebé korresponde husi 30% husi idade 18 ba leten iha kapital.(ajo)

About dilipost

Check Also

Virgilio Reativa Dispensaun Prezidente KI

DILI Post–Prezidente Konsellu Imprensa (KI), Virgilio Guteres halo reativasaun ba dispesaun durante fulan tolu nia …

Leave a Reply

Your email address will not be published.