Saturday , December 3 2022

Governu Fraku, LH Ezije Sai Sasin

DILI Post-Transparensia no Akontabilidade tuir sosiedade sivil La’o Hamutuk (LH), nia hanoin tenke kontinua sai prioridade iha Governasaun no Estadu ida ne’e. Infelizmente, LH observa frakeza balun iha implementasaun transparensia iha prosesu orsamental ida ne’e.

Signifika Governu ida ne’e, iha planu oioin hodi hasai osan mina rai ho montante ida ke boot na realidade husi ezekusaun orsamentu hirak ne’e, la ezekuta ho didi’ak ou fraku iha ezekusaun.

Bazeia ba razaun hirak ne’e, sosiedade sivil ou LH ezije ba Governu fo oportunidade ba sira hodi sai netik testamuña ou sasin. Lia fuan murak hirak ne’e  deklara husi, Koordenador LH Celestino Gusmão Pereira, liu husi Press konferensia iha Office LH, Bebora-Dili, Kuarta-feira (19/10).

Estadu horiseik, 18 Outubru 2022, ONG LH hato’o submisaun ida ba Deputadu/a sira iha Parlamentu Nasional (PN), konaba proposta Lei Orsamentu Jerál Estadu (OJE) ba tinan 2023.

Pur ezemplu, website husi PN ne’ebé Ia funsiona konaba ‘Audiensia Publiku’ ne’ebé iha realidade Ia loke ba publiku. LH mos sujere atu mantein pratika di’ak balun ne’ebé liu ona hodi produs livru proposta OJE iha Lingua Tetun no Ingles, la’os Portuges de’it.

Hanesan sosiedade sivil, trizte tebes, Ia hetan oportunidade atu fo testemunia iha audiensia ne’ebé Komisaun C PN realiza. Tuir LH nia hanoin prosesu orsamental sai forte liu ho partisipasaun husi sosiedade sivil no enkoraja atu PN bele hadi’ak liu tan espasu ba sira no publiku hodi fornese analiza no hariku liu tan ideia antes debate ho Governu.

Aleinde ne’e, LH mos sujere ba Ministeriu Finansas (MF), presiza klarifika orsamentu FCLN no tenke konsidera FCLN re-apropria husi 2022 ba OJE 2023 atu Ia mosu konfuzaun ba publiku.

Prioridade no Estratéjia, LH kestiona kapasidade Governu atu realiza programa 275 ho kualidade, konsidera nivel ezekusaun iha pasadu no mós realidade tinan oin membru Governu barak no sira nia staff sei ba hala’o Kampaña politika.

Di’ak liu fo prioridade ba programa ne’ebé realistiku tuir kbi’it no rekursu umanu ne’ebé iha atu garante dunik ezekusaun ho kualidade. LH nota katak alokasaun ba seitor ne’ebé liga diretamente ba dezenvolvimentu rekursu umanu, Edukasaun, Saúde, Bee Moss no Agrikultura, hetan de’it 16% husi OJE tomak.

Nune’e, sira enkoraja Deputadu/a sira atu diskute ho kle’an ho Governu durante debate OJE. Atu realiza orsamentu ne’ebé efikas, LH sujere ba PN atu hametin hikas prosesu avaliasaun programa atu asegura dunik benefisiu ba povu no atu revee hikas alokasaun orsamentu balun ne’ebé seidauk iha evidensia konaba benefisiu.

Iha submisaun ne’e, LH sujere rekomendasaun hitu (7) ba PN no Governu atu hadi’ak liu tan OJE 2023 no prosesu orsamental. Organizasaun Non Govermental (ONG), LH Konsidera proposta OJE ba tinan 2023 Ignora realidade situasaun Finansas. Ho submisaun ida ne’e, LH hakarak kontribui ba avaliasaun no diskusaun konaba OJE 2023 hodi bele realiza orsamentu ne’ebé sustentavel no haktuir nesesidade povu nian.

Debate PN durante periodu orsamental kada tinan, tenke sai hanesan oportunidade polítika atu membru PN, Governu no publiku uza ba avalia, diskute no dezeria planeiamentu ne’ebé estratejiku no nesesariu hodi hatan ba problema ne’ebé Povu no Nasaun enfrenta tinan barak.

Pontu importante ne’ebé LH hato’o liu husi submisaun hanesan tuir mai: sustentabilidade realidade situasaun finansiamentu Estadu iha perigu nia laran no LH fo ona avizu iha tinan barak nia laran.

Iha proposta OJE 2023, Governu aprezenta senariu ida hodi prolonga vida util husi Fundu Petroleu ate 2045. Signifika sei iha oportunidade boot ba Governu atu diversifika ekonómia hodi adia krize ne’ebé bele mosu bainhira hasoru rai naruk fizkal ‘fiscal cliff’, ne’ebé bainhira Fundu Petroliferu mamuk ona, bele akontese iha tinan 2034 tuir predisaun MF nian.

Tuir modelu sustentavel liu ida ne’ebé Governu aprezenta iha Livru Relatoriu Proposta OJE 2023, atu prolonga Fundu Petroliferu to’o 2045, presiza redus despeza kada tinan 3X6 to’o 2034.

Maibé, iha tabela balun iha livru OJE hatudu despeza OJE inklui levantamentu Fundu Petroleu sei, sa’e kada tinan to’o 2027. Nune’e, sira hanoin maske Governu rekonese Nasaun ne’e iha perigu ba monu iha rai naruk fizkal, maibé kontinua Ia fo importansia no falta atu responde ba realidade ida ne’e.

LH konsidera Ia iha valor atu diskute de’it modelu sustentavel, se la implementa. LH mós observa projesaun jerál ne’ebé Governu konsege fornese Ia iha konsistensia no sujere atu fornese ba PN no publiku projesaun loloos konaba despeza global no kustu ba kada program ba tinan haat (4) ba oin, atu ajuda kada Deputadu/a sira foti desizaun matenek.

Dependensia ba Petroliu

 Iha submisaun ba PN, LH nota katak agora daudauk Timor-Leste (TL), depende de’it ona ba investimentu Fundu Petroliferu iha merkadu finanseiru internasional, ne’ebé kuaze sofre ou lakon ona biliaun rua resin iha tinan ne’e.

Infelizmente, livru OJE falta atu deskreve ho loos risku sira no senariu sira konaba Fundu Petroliferu kontinua asusme retornu 4.14 ba futuru no falta atu konsidera posibilidade ba retornu investimentu negativu ou ki’ik ba futuru.

Maske, iha tinan barak laran, Fundu Petroliferu Finansia programa no atividade Estadu durante ne’e, maibé infelizmente Ia konsege ka’er oportunidade atu hari’i sistema ekonómiku ida ne’ebé produtivu, sustentavel no diversifikadu.

Governu kontinua mehi reseita industria mina no gas sei ajuda Nasaun ne’e ninia ekonómia ba tempu naruk hodi ignora dezenvolve seitor produtivu no sustentavel.

Ho ida ne’e, LH nia submisaun husu Deputadu/a sira atu rekonese katak seitor petroliu ho hanoin seitor ida ne’e, sei Ia rezolve problema ne’ebé hasoru hela no sei falta atu lori benefisiu ba povu.(che)

About dilipost

Check Also

SEFOPE Suspende Traballadores Tuir Gostu

DILI  Post-Reprezentante povu iha Uma Fukun Parlamentu Násional (PN), fo kritika maka’as ba Sekretáriu Estadu …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement