Monday , September 27 2021

Governu Haterus Povu Ho SS-KO

DILI Post- Deputadu Bankada Partidu Demokratiku (PD) António da Conceição ‘Kalohan’ rekonese ho desizaun hosi governu extende Estadu Emerjensia (EE).

Lori ninia efeitu pozitivu tanba trava kontazen moras Covid-19.

Maibe, kauza hosi EE ne’e mos ho medidas politika aplika Serka Sanitaria (SS) no Konfinamentu Obrigatoriu (KO) hatodan tebes povu nia vida moris loron – loron.

“Povu kiik, liu liu inan feton sira tenke simu liu todan tanba iha inan feton barak tenke hili kalen mamuk hodi faan, atu hetan netik fos kilo ida,” dehan Kolohan iha plenaria Parlamentu Nasional, Tersa (27/7).

Tuir nia hare iha estrada prinsipal setru kapital besik palasiu governu, hahu hafutar ho vendedores animal.

Inklui vendedore fan aifunan, aifuan no sira seluk hodi halo movimentu iha estrada prinsipal kapital.

Fatin hanesan Deputada bankada CNRT, Maria Terezina Viegas hateten Governu de Faktu no Prezidente da Repúblika la tetu no la konsidera realidade moris povu nian hodi troka malu halo pedidu estensaun ba EE

Tanba, nia dehan Governu ida ne’e dala ruma hanoin katak distribuisaun sesta bázika ba povu ho sasán ne’ebé ho folin menus husi dolar lima nulu ($50), sufisiente ona ba Governu de faktu hodi sai razaun atu kontinua estende EE.

“Governu taka matan tiha ba relatóriu husi ADB katak oras ne’e daudauk ekonomia povu nian hakdasak, Timor-Leste nia ekonomia hasoru kontrasaun menus 8.5 iha 2020 ho projesaun atu sa’e pursentu 3.4 iha 2021, maibé realidade hatudu Governu laiha kapasidade halo ezekusaun ba Orsamentu Jerál Estadu 2021 nian,” nia kestiona.

Nia hatutan, agora dadaun tama ona fulan Agostu 2021, Governu nia ezekusaun real foin mak atinji 31 pursentu.

Tanba, hare ba Governu nia kapasidade ezekusaun ne’ebé mukit halo povu ki’ik laiha kapasidade de kompra, laiha projetu infraestrutura, joven barak laiha servisu, laiha inisiativa atu hamosu programa sira ne’ebé garante ‘cash flow’ ba ekonomia, halo povu terus liután.

Maske povu oras ne’e hasoru hela problema ekonomia, maibé Governu lakohi atu interese, Governu nein iha inisiativa atu halo peskiza ruma kona-ba efeitu sósiu ekonómiku.

Governu taka matan mezmu hare momoos hela katak povu enfrenta situasaun ne’ebé difisil.

“At liu tán, maske Governu de Faktu deklara katak vasina laós obrigatóriu, maibé realidade iha terrenu aplika oin seluk, povu ki’ik ne’ebé seidauk simu vasina labele simu osan idozu, la permite atu tama mai Dili hodi halo atividade ekonómika, polítika ida ne’e halo povu sai vítima dala-rua,” tenik
deputada Terezina.

Reprezentante povu ne’e lamenta tebes ho komunidade labele halo movimentu ho livre, labele simu sira nia direitu ba subsídiu no hetok at liután povu balun mate tanba vasina maibé la simu kompensasaun tuir promesa Governu nian.

Atividade ekonómika iha munisípiu sira paradu, Timoroan sira ne’ebé nia profisaun hanesan xofér bis no transporte públiku sira seluk to’o agora seidauk bele hala’o servisu, barak maka hetan terminasaun kontratu husi sira nia patraun, Timoroan barak maka lakon empregu, realidade ida ne’e hatudu katak família barak maka tenke tara sana no taxu.

Maibé Governu nein hakarak hatene, enkuantu Prezidente da Repúblika kontinua estuda de’it iha fatin.

“Foin lalais ne’e ita rona katak variante foun Covid-19 nian ho naran “Delta” tama ona iha Timor-Leste. Realidade ida ne’e hatudu katak maske ita estende ona estadu emerjénsia ba dala sanulu resin-lima, ohin sei ba dala sanulu resin-neen maibé ita la foti lisaun ruma atu evita importasaun virus Covid-19 nian mai Timor-Leste,” relata nia.(assa)

About dilipost

Check Also

Komunidade Comoro Selebra Loron Falintil Ho atividade Feira Oioin

DILI Post-Komunidade Suku Komoro, Postu Administrativu Don Aleixo, selebra loron ezistensia Falintil ba dala 46 …

Leave a Reply

Your email address will not be published. Required fields are marked *