Tuesday , October 19 2021

Governu Hato’o Sentidu Kondolensi Ba Saudozu Jorge Sampaio

DILI Post – Primeiru Ministru (PM) Taur Matan Ruak, lori oitavu Governu nia naran hato’o sentidu kondolesia ba saudozu eis-Prezidente Republika Portugeza, Dr Jorge Fernando Barndo de Sampaio.

“Ha’u nia naran rasik no ha’u-nia kaben nia naran, ami hato’o kondolénsia kle’an ba família, kolega no belun sira husi Saudozu Eis-Prezidente Repúblika Portugeza, Dr. Jorge Fernando Branco de Sampaio, ne’ebé derrepente de’it fila hikas ona ba ita-nia Aman Maromak Nia Kadunan Santu,” dehan PM Taur liu husi karta komunikadu ne’ebe Dili Post asesu Domingu ( 12/09) ohin.

Xefi Governu ne’e haktuir durante mandatu rua Eis-Prezidente Jorge Sampaio nian (husi tinan 1996 to’o tinan 2006), katak Mundu konxiente ba represaun Indonézia.

Eis Prezidente Jorge Sampaio, iha tempu ne’ebá aproveita nafatin palku internasionál sira hotu hodi fó apoiu no ativizmu ne’ebé forte ba kauza Timoroan nian iha luta ba Direitu Autodeterminasaun no Independénsia.

Dr. Jorge Sampaio tama iha istória hanesan Prezidente ne’ebé kontribui tebes ba Restaurasaun Independénsia Nasionál.

Nia rasik sai hanesan testemuña, nu’udar konvidadu de onra iha serimónia ne’ebé hala’o iha loron 20 fulan Maiu tinan 2002, iha Dili, Timor-Leste.

Eis-Prezidente Jorge Sampaio ne’e sei lembra iha mundu hanesan figura importante liu ba kauza sira no ba liberdade, no sei rekoñese nu’udar Timor-Leste no Timoroan sira nia Belun Boot ida.

Liafuan laiha atu hato’o iha tempu susar no tristeza, bainhira lakon Belun Doben ida.

“Ita nia pensamentu no orasaun sei hamutuk ho Vosa Exelénsia, Belun doben, Dra. Maria José Rodrigues Ritta, ho Ita-boot-nia família, kolega no belun sira hotu, atu bele iha forsa no fiar nafatin hodi hakat liu momentu difisil ida ne’e, ” tenik PM Taur. (Niki)

About dilipost

Check Also

Antes Lori ba Laleia, Ma’hunu Sei Hatoba Iha Muzeu Rezistensia

DILI Post-Tuir planu Domingu (26/09) aban, saudozu Jose Antonio Gomes da Costa kodiku Ma’hunu Bulerek …

Leave a Reply

Your email address will not be published. Required fields are marked *