Friday , July 30 2021

Governu Kria Ona Komisaun Interministerial ‘Sobu’ PED Versaun Xanana

DILI Post- VIII Governu konstitusional kria ona komisaun interministerial atu ‘sobu’ Planu Estratéjiku Dezenvolvimentu (PED) 2011-2030 ne’ebé prepara husi governasaun Eis Primeiru-Ministru (PM), Kay Rala Xanana Gusmão nian iha tinan 2011.

Tanba ne’e, konsellu ministru Kuarta (16/06/21), aprova ona projetu rezolusaun governu nian atu estabelese komisaun interministerial ba reajustamentu PED 2011-2030 ne’ebé aprezenta husi Vise PM, José Maria dos Reis.

Ministru Prezidénsia Konsellu Ministru, Fidelis Leite Magalhães esplika, intensaun governu nian atu halo reajustamentu ba PED 2011-2030 ne’e tanba, planu refere aprova iha 2011no mós besik ona atu tama tinan 2030, tanba ne’e presiza haree fila-fali progressu implementasaun husi planu refere.

“Tanba 2011-2030, 2030 besik ona, agora ita iha 2022 ona la kleur 2021 mós hotu ona, ne’ebé ita tenki haree ho matan krítiku katak, PED ne’e ita implementa to’o ona iha ne’ebé.? Objetivu sira dezenvolvimentu nian ne’e sei relevante mai ita ga la’e.? Para ida-ne’e tenki halo reajustamentu,” dehan Ministru Fidelis, Kuarta (16/06/21) iha ministériu finansas.
Governu mós hanoin katak, tempu ona ezekutivu tenki halo duni reajusamentu ba PED ne’e, tanba governu tenki reflete husi impaktu pandemia Covid-19.

Nune’e mós presiza halo diskusaun kle’an kona-ba modelu dezenvolvimentu ne’ebé di’ak liután ba jerasaun sira iha futuru, hafoin 2030-2040 bele benefisia husi PED ne’e.

“Tipu ou dezenvolvimentu saida mak ita hakarak, no fokus ba sidadaun iha forma oinsá.? Se ita hakarak dezenvolvimentu ida sustentavel karik ita tenki halo saida.? Ita tenki altera iha ne’ebé.? Tenki ajusta iha ne’ebé.? Saida de’it mak tenki sai duni prioridade dezenvolvimentu bazeia ba ita-nia kapasidade rai laran,” esplika Fidelis.

Porta-voz governu ne’e hatutan, membru governu sira apresia ho proposta no intensaun husi Vise PM hodi avansa ho planu ba ajustamentu PED ne’e, tanba fi’ar katak, iha faze tuir mai sei halo diskusaun kle’an liután.

Komisaun interministerial ne’e sei lidera diretamente husi Primeiru-Ministru, Taur Matan Ruak, kompostu husi, primeiru Vise PM, Armanda Berta dos Santos, segundu Vise PM, José Reis, ne’ebé mós sai hanasan sekretariadu tékniku, Ministru Prezidénsia Konsellu Ministru, Fidelis Magalgães.

Ministru Koordenadór Assuntus Ekonómikus (MKAE), Joaquim Amaral, Ministru Administrasaun Estatal (MAE), Miguel Perreira de Carvalho no Ministra Negósiu Estranjeiru no Kooperasaun (MNEK), Adaljiza Magno.

Komisaun interministerial ba reajustamentu PED 2011-2030 ne’e, sei halo enkontru fulan-rua dala ida, atu diskusaun ho kle’an kona-ba panu refere.
Nune’e mós, PED 2011-2030 ne’ebé iha ne’e, liu husi esforsu Kay Rala Xanana Gusmão nian nu’udar PM iha kuártu governu konstitusional husi governasaun Aliansa Maioria Parlamentar (AMP) kompostu husi partidu CNRT, PD no PSD periodu tinan 2007 to’o tinan 2012.

Molok aprova PED ne’e, Xanana Gusmão la’o hadulas territóriu Timor-Leste laran hodi sosializa planu ne’e populasaun sira iha postu administrativu 65 iha munisípiu 13.

Nune’e, PED 2011-2030 ne’e konsege hetan aprovasaun husi Parlamentu Nasionál (PN) segunda lejislatura ho votus unanimidade.(ajo)

About dilipost

Check Also

Jose Agustinho Sei Simu Pose Iha 16 Agostu

DILI Post – Iha loron 16 Agostu tinan ne’e, Prezidente Komisaun Nasional Elisaun (CNE) Jose …

Leave a Reply

Your email address will not be published. Required fields are marked *