Friday , July 30 2021

Hahú 1 Janeiru 2022, Ataúro Goza Direitu Munisípiu Espesiál

Ataúro (Dili Post) — Ministru Administrasaun Estatal (MAE), Miguel Perreira de Carvalho hateten, hahú 1 fulan-janeiru tinan 2022, Ataúro sei goza nia direitu hanesan munisípiu espesiál.

Ministru Estatal dehan, daudaun ne’e Parlamentu Nasionál (PN) submete ona dekretu PN nian kona-ba Ataúro sai Munisípiu ba Prezidente Repúblika atu promulga.

“Governu nia justifikasaun ba PN atu Ataúro sai munisípiu mak ida, atu responde ba insulariedade husi área jográfia Ataúro, área ida ne’e área ida izoladu mezmu hola parte ba Dili, maibé difísil tebes atu asesu,” dehan Ministru Miguel, iha intervensaun iha ámbitu diálogu komunitáriu iha salaun administrasaun postu Ataúro, Sesta (11/06).

Proposta lei kona-ba estatutu Ataúro ba munisípiu passa ona iha Parlamentu Nasionál, tanba ne’e loron 1 fulan-janeiru 2022, Ataúro sei hamrik hanesan munisípiu mesak ida.

“Ministériu sentrais sira baibain organizadu de’it iha munisípiu sira seluk, tenki organizadu mós iha munisípiu foun Ataúro nian,” dehan nia.

Fatin hanesan Primeiru Ministru (PM), Taur Matan Ruak hateten, tempu atu pasa responsabilidade Ataúro sai hanesan munisípiu badak tebes.

“Tempu atu passa responsabilidade ba ita-boot sira-ne’e badak loos fulan 6 de’it, ne’ebé ita-boot sira labele ko’alia ona buat ne’ebé seidauk halo, ko’alia ba oin ne’e ita sei halo saida,” dehan PM Taur.

Xefi govrrnu husu MAE atu servisu hamutuk ho autoridade Ataúro, atu mobiliza partisipasaun populasaun nian liu-liu iha kapasitasaun rekursu umanu.

“Kuandu ita ko’alia kona-ba instituisaun ita ko’alia kona-ba ema, ema-nia kapasidade hatene halo sasán, segundu mobilizasaun rekursu finanseirus,” hatete PM Taur.

Nia mós fo hanoin MAE ho autoridade Ataúro servisu hamutuk atu define regra no prosedimentu legál sira atu define kompeténsia ida-idak nian.

Nune’e mos Administradór Postu Administrativu Ataúro, Mateus Belo hateten, sira sente kontente no previléjiu, tanba governu sentrál hakarak muda estatutu Ataúro sai Munisípiu espesiál.

“Tinan ida-ne’e Ataúro oan sente orgullu no previléjiu boot ida, liu-liu estatau Ataúro ne’ebé komplementa ba iha mandatu konstitusionál ne’ebé konsagra ona iha konstituisaun RDTL artigu 5 ho artigu 71 ne’ebé define kona-ba Ataúro sei hetan estatau espesiál,” dehan Mateus Belo.

Administradór postu ne’e dehan, tempu naruk ona mak governu sentrál ladún tau atensaun ba Ataúro, tanba haketak ho tasi.

“Ho estatau espesiál ne’e ami fi’ar katak, governu sei delega kompeténsia lubuk ida ba munisípiu Ataúro servisu atendimentu sei besik liu ba komunidade,” dehan nia.(ajo)

About dilipost

Check Also

Jose Agustinho Sei Simu Pose Iha 16 Agostu

DILI Post – Iha loron 16 Agostu tinan ne’e, Prezidente Komisaun Nasional Elisaun (CNE) Jose …

Leave a Reply

Your email address will not be published. Required fields are marked *