Friday , July 30 2021

Kazu Ró Tranship II, Ministru José Agostinho Prontu Hatán Iha Justisa

Dili Post — Ministru Transporte Komunikasaun (MTK), José Agostinho da Silva deklara, nia prontu ba hatán iha justisa relasiona ho polémika kazu ró Tranship II ne’ebé governu aluga.

José Agostinho afirma pozisaun ne’e, relasiona ho polémika kazu governu aluga ró Tranship II, ne’ebé sesta semana kotuk, tula Primeiru-Ministru, Taur Matan Ruak ho komitiva ba postu administrativu Ataúro, maibé susar atu atraka iha Portu Ataúro kuaze besik oras 2 nia laran.

Hatán ba intervensaun Komisaun Anti Korrupsaun (KAK) nian, José Agostinho afirma, nia prontu no disponivel atu ba hatán kualkér momentu.

“Why not.? Tenki, ha’u disponivel kualkér momentu,” hateten Ministru Agostinho, hafoin hasoru malu ho PM Taur Matan Ruak, iha Palásiu Governu, Segunda (14/06).

Governante ne’e afirma, la’ós nia mak halo konkursu aprovizionamentu atu aluga ró Tranship II, tanba nia ema polítiku.

Maibé, prosesu ne’e kestaun tékniku, tanba ne’e, Autoridade Portuáriu Timor-Leste (APORTIL), Diresaun Nasionál Transporte Marítima (DNTM) ho diresaun aprovizionamentu mak halo, nia hein asina de’it.

“Liga ho ida-ne’e, ha’u asume kargu polítiku, ha’u ema polítiku, ha’u la trata aprovizionamentu ne’e problema tékniku, se mak haree.? Iha ne’ebá iha APORTIL, DNTM, iha diresoens sira-ne’ebé mak toma konta ba aprovizionamentu, ha’u la orienta ema ida par viola lei, klaru katak, asaun hotu-hotu tenki la’o iha korridor regra prosedimentu aprovizionamentu,” tenik Ministru Agostinho.

Hatán kona-ba intervensaun KAK ne’ebé suspende ró Tranship II labele halo operasaun.

Nia dehan, nia respeita servisu KAK ho sosiedade sivil nian, órgaun sira-ne’e nia papel importante tebes, maibé husu órgaun independente sira atu halo intervensaun ho proporsional no neutralidade.

“Ha’u hanoin iha regra ne’ebé atu hapara ga la’e.? Órgaun estadu nian pur-ezemplu ita-nia ONG sira, KAK, sira hala’o ida prevene, ita seluk hala’o kontrolu sosiál, sentidu dehan, ita-nia estadu ne’e komesa forte, akontese check and balance, evista rísku no irregulariedade,” afirma José Agostinho.

Nune’e mós governante ne’e reafirma, ho polémika ne’e, governu sei la hapara operasaun ró Tranship II, tanba governu ho parte kompañia asina ona kontratu.

Nune’e, bele mantein hodi asegura konektividade transporte marítima, entre Dili ba Ataúro ho enklave Oe-cusse, hodi transporta nesessidade bázika, ema no seluk tan.(ajo)

About dilipost

Check Also

Sidadaun Indonezia nain 6 iha hela Prizaun Bekora

DILI Post- Sidadaun Indonezia hamutuk nain neen (6) sei iha hela prizaun Bekora. Diretor Prizaun …

Leave a Reply

Your email address will not be published. Required fields are marked *