Tuesday , August 9 2022

KI-UNDP Fasilita Jornalista 19 Akompaña Kampaña ElPre

DILI Post- Konsellu Imprensa (KI) ho United Nations Development Program(UNDP) kontinua fasilita media bus da-ruak ba Jornalista nain 19 hodi akompaña kampaña Eleisaun Prezidensial (ElPre) sengunda volta.

Jornalista media lokal hirak ne’e sei kampaña kandidatura liu husi media bus eleisaun nian, hodi oferese informasaun ne’ebe mak loos no komprovativu antes ba loron eleisaun segunda volta iha loron 19 fulan Abril ne’e.

Tuir Diretór Ezekutivu Konsellu Imprensa (KI) Rigoberto Monteiro haktuir, media bus ka media tour ida-ne’e ba da-ruak tanba antes ne’e atividade ne’e realiza tiha ona loron eleisaun primeiru volta iha dia 19 Marsu ne’e.

Ne’e duni, nia dehan objetivu husi media bus ne’e atu fasilitata kanál média sira atu halo kobertura ba kampaña polítika kandidatu prezidensial no loron eleisaun nian.

“Atividade ne’e hala’o atu ajuda fasilita jornalista sira hodi halo kobertura ba atividade kampaña politika kandidatu sira nian no loron votasaun, sira sei halo kobertura no sei publika notisia iha ida-idak nia mídia, nune’e publiku bele asesu ba informasaun sira kona-ba kampaña politika,”dehan Diretor Ezekutivu KI ne’e iha Salaun KI Kintal Boot, Kuarta (06/04) ohin.

Ihafain hanesan UNDP Officer-in-Charge, Lazima Onta Bhatta hateten eleisaun media bus, nu’udar inisiativa ida ne’ebé maka implementa husi KI no Programa Nasoens Unidas ba Dezenvolvimentu (UNDP) ho fundu ne’ebé suporta husi Governo Japaun.

Atu fahe partisipante jornalista sira ba iha grupu rua, kada grupu sei tuir kampaña prezidensial entre kandidatu Jose Ramos Horta no Fransisco Guterres ‘Lu Olo’ durante sira nia vizita bazeia ba kalendariu kampaña prezidensial.

“UNDP konsiente papel importante husi lala’ok servisu média nian liu husi fahe informasaun ne’ebe maka tuir duni evidensia no imparsial ba sidadaun sira hodi kontribui liu tan informasaun ba sira ne’ebe maka foti desizaun,”tenik Lazima.

Nia hatutan, liu husi Eleisaun Media Bus, sira esforsu hodi fasilita servisu jornalista sira nian hodi komunika ho justu no efetivu iha momentu importante ba Timor-leste, ne’ebe votante sira uza sira nia direitu hodi ezerse ba ElPre iha segunda volta.

Nunee mos reprezentante embaixador Japaun iha Timor Leste, Kazumi Yamada relata maneira diak liu hodi garantia reportajen bazeia ba faktus husi fontes informasaun ne’ebe kredivel.

Papel Jornalista nian iha eleisaun ne’ebe maka relasiona ho reportajen, maka sira ba iha liur hodi hare no rona direta saida maka hateten husi kandidatura sira, ou oinsa prosesu lalaok vota nian iha estasaun de votu.

“Ha’u espera Media Bus ne’ebe maka opera husi Konsellu Imprensa ho nia asistensia husi Governu Japaun no UNDP, sei kontribui hodi fó solusaun iha ikus mai,”dehan Kazumi.

Enkuantu atividade nia objetivu hodi garantia eleisaun ne’ebe informadu, reforsa meius komunikasaun husi media hodi fornese komunikasaun eleisaun ne’ebé efetividade no inovativu no ema nia konsiente ba Covid-19, tan ne’e parte husi projetu Covid-Resilient Elections iha Timor-Leste, ne’ebe hetan suporta finansial husi Governu Japaun.(AnY)

About dilipost

Check Also

PM Taur Simu Vizita Ofisial Husi MNEK Xina

DILI Post-Primeiru Ministru (PM) Taur Matan Ruak, Sesta feira loraik ne’e iha Palásiu Governu, simu …

Leave a Reply

Your email address will not be published.