Sunday , November 27 2022

Komandu PNTL Munisipiu Dili Koloka Efetivus Nain 660 Asegura Seguransa ElPre

DILI Post– Komandu Polisia Nasional Timor-Leste (PNTL), Munisipiu Dili, koloka efetivus hamutuk 660 asegura seguransa Eleisaun Prezidensial (ElPre) iha Dili.

Liu husi formatura deslokasaun forsa seguransa hosi eskuadra 6 hamutuk ho Unidade Kuartelada tolu, UEP, UPM no UPF hodi apoiu Komandu Munisípiu fó seguransa ba ElPre iha loron 19 fulan Abril 2022 la’o ho hakmatek no seguru.

Komandante Komandu PNTL Munisipiu Dili, Superintendente Xefi Polisia, Henrique da Costa hateten, formatura ne’e atu fo orientasaun ba membrus sira hodi servisu diak liutan.

“Ohin dader depois sua exelencia Komandante Jeral PNTL dirije formatura jeral iha Kurrtel Jeral PNTL, loraik ida ne’e ita kontinua formatura Komandu Munisipiu nian atu hare’e preparasaun no fo orientasaun hodi sai hanesan bukae ida ba membrus sira atu ezekuta servisu ho diak iha terenu”, dehan Henrique da Costa, liu husi diskursu iha Komandu PNTL Munisipiu Dili.

Nia dehan, durante semana rua nia laran PNTL kontinua fo seguransa ba atividade kampaña segunda ronde ba kandidatu prezidente nian no agora kontinua tama ona ba loron importante mak hanesan loron votasaun nian.

“Imi hotu sei desloka ba sentru votasaun iha Dili laran hodi asegura sidadaun tomak bele ezerse sira nia diretu demokratiku nian livre hodi hili kandidatu prezidente. PNTL nia servisu mak ida ne’e duni tuir konstituisaun tanba iha konstituisaun rasik mos hatete katak PNTL ne apartidaria, signifika ita la bele inklina an iha partidu maibe ita iha direitu ba vota”, subliña nia.

Iha okajiuan ne’e nia husu atu membru hotu tau responsabilidade masimu hodi akompaña material sensitivu husi STAE ba Sentru Votasaun sira ho seguru.

“Husu ba membru sira asegura material sensitivu to’o dader hodi kontinua ba eleisaun, depois eleisaun remata sei akompanha material sira ne’e fila mai STAE Dili. Husu mos atu imi labele lori transporte privadu ba fatin STAE nian ka labele lori ba sentru votasaun sira, transporte imi nian sei rai hela iha Esquadra PNTL ne’ebe besik no kareta patrulla Esquadra nian sei tula imi ba STAE depois imi sei sae tuir hodi asegura kareta ne’ebe lori material sensitivu ba Sentru Votasaun to’o prosesu votasaun remata no lori hikas material fila mai STAE”, alerta Henrique.

Iha biban ne’e nia fo hanoin nafatin ba membru sira atu alerta masimu, karik asuntu tekniku ruma husi atu komunika ho polling staff sira ka husu ekipa apoiu komandu nian ne’ebe alerta 24 horas.

Ne’e duni, nia fo atensaun iha terrenu kuandu suspeita ema ruma halo provokasaun ba instabilidade tenke foti medidas halo prevensaun ka hapara maibe respeitu nafatin direitus humanus, karik imi nia kbit la to’o atu atende, relata urjente mai Delta Base ka komandante esquadra tutela sira hodi responde ho lais buka solusaun.

“Imi hatene sentidu hosi SINTUPE! Ne’e katak isin lolon mak PNTL Munisipiu Dili, ain sanak sira ne’e mak hanesan Esquadra 6, Seksaun 6 no Unidade kuartelada sira ne’ebe apoio ita. Kuandu ain sanak balun kanek, sintupe ne’e labele lao. Entaun mai ita apoio malu atu PNTL Dili hodi garante eleisaun ne’e susesu ita hotu nian, ba PNTL hotu no-mos ba Timor-Leste”, nia hakotu.

Seremonia deslokasaun ne’e Komandu PNTL Dili hetan apoiu efetivus nain 40 husi UEP hodi apoio kontrola no responde ba situasaun ne’ebe mosu no-mos sei iha apoio rekursu balu tan hosi kontijente jerál departamentu, servisu no Unidade iha Komandu Jerál UPM, UPF no Sentru Formasaun Polisia no total rekursu ne’ebe Komandu PNTL Dili hatun hodi asegura Eleisaun Prezidensial segunda ronda hamutuk 660. (pogo)

About dilipost

Check Also

Membru PNTL Ida Mate Iha Hotel Laran

DILI Post -Timoroan ida ho naran inisial SB nudar membru Polisia Nasional Timor Leste (PNTL), …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Advertisement