Wednesday , June 16 2021

Kompañia Lokal 22 Asina Termu Aseitasaun Ho MOP

Dili Post — Kompañia lokal 22 asina ona termu aseitasaun ho Ministériu Obras Públikas (MOP), atu implementa projetu manutensaun periódika no rutina ba estrada rural iha munisípiu lima.

Ministru Obras Públikas, Salvador Pires hateten, estrada rural ba dezenvolvimentu ne’e, kapital investimentu husi governu Timor-Leste nian, maibé hetan apoiu asisténsia téknika husi International Labour Organization (ILO).

Nune’e ILO bele fó atu ajuda atu halo planeamentu hanesan dezeñu no mós treinamentu ba ita-nia funsionáriu setor privadu sira.

“Estrada rural ba dezenvolvimentu ne’e programa governu nian kapital investimentu mai husi governu, tinan ne’e ita tau kuaze besik $ 40 ital milloens dolares fahe ba $ 13 pontu ital milloens iha liña ministériu ba manutensaun periódika no mós manutensaun rutinas, reabilitasaun tau iha fundu infraestruturas kuaze $ 35 milloens, ida-ne’e ba pakote estradas 69 pakotes projetus,” dehan Ministru Salvador ba jornalista, Kinta (10/06) iha novu turizmu.

Munisípiu lima ne’e mak hanesan, Dili, Baucau, Vikeke, Manatutu no Likisá mak hetan ona aseitasaun husi MOP atu ezekuta projetu pakote 22 iha munisípiu lima refere.

“Ohin ita mai halo uluk aseitasaun ba munisípiu 5 nian, tanba prosesu verifikasaun ita loke tender ba pakote balun, balun ita foin loke prosesu tenderizasaun, balun tama ona iha prosesu kontratasaun. Ita tama ona iha prosesu aseitasaun, la kleur tan sira bele tama ona iha asina kontratu bele halo mobilizasaun ba manutensaun rutina no mós manutensaun periódika iha liña ministéri nian,” dehan nia.

Fatin hanesan, Diretora Kompañia Rozi Construction, Rosa Maria Hornai hateten, karta aseitasaun ne’ebé sira asina ho ho MOP ne’e, nu’dar responsabilidade husi governu ba sira nu’udar aktu konfiansa atu bele implementa projetu refere tuir kontratu ne’ebé iha.

“Karta aseitasaun ne’ebé ami asina ne’e fó ona responsabilidade ba ami kompañia oinsá atu implementa projetu ne’ebé hetan konfiansa husi governu atu bele implementa projetu tuir regras iha kontratu laran, ami garante kualidade,” dehan Rosa.

Nu’udar emprezária feto, Rosa hakarak kontribui ba prosesu dezenvolvimentu nasional ba rai doben Timor-Leste.

“Ha’u hetan iha pakote rua hamutuk kilómetru 2 resin, montante $ 600.000 resin husi Oso-ala ba to’o iha Loilubu, la’e, tanba ami servisu la’ós primeira ves, maibé hala’o servisu ne’e beibeik,” dehan Rosa.

Entratantu, duransaun tempu ba projetu ERD ne’e normalmente sempre tinan ida tuir tinan fiskal nian, tanba ne’e projetu refere tenki finaliza iha tinan 2021 ne’e.(ajo)

About dilipost

Check Also

PN Sei Uza Kanal RTTL,E.P Transmite Programa

DILI Post- Parlamentu Nasional (PN) sei uza kanal RTTL,E.P hodi transmite programa liu husi Radio …

Leave a Reply

Your email address will not be published. Required fields are marked *