Friday , July 30 2021

Komunidade Ataúro Kontinua Halerik Estrada, Eletrisidade No Bee Moos

Ataúro (Dili Post) — Bee moos, estrada, eletrisidade no seluk tan kontinua sai preokupasaun ba komunidade postu administrativu Ataúro munisípiu Dili.

Administradór postu administrativu Ataúro, Mateus Belo hato’o preukupasaun ne’e, bainhira partisipa diálogu komunitáriu ho Primeiru Ministru (PM), Taur Matan Ruak ho komitiva iha salaun administrasaun postu Ataúro sesta (11/06).

“Bainhira Ataúro sai munisípiu, ami presiza teb-tebes atu hadi’a infraestrutura bázika, problema boot liu iha Ataúro mak sei konsentra iha Bee moos, asesu estrada iha suku mak sei sai problema maka suku Makili ho Makadade, enerjia eletrisidade suku rua mak seidauk hetan Makili ho Makadade,” dehan Mateus Belo.

Postu Ataúro suku Makadade ho Makili mak to’o oras ne’e seidauk asesu ba estrada ho eletrisidade, tanba ne’e difikulta tebes sira atu halo negósiu.

“Atu lori kombustivel mai Ataúro difisil, tanba ró boot laiha, ami halo poupansa ba enerjia ne’e ami sei uza de’it oras lima ba suku suku tolu hanesan suku Villa Maumeta, Beloi ho Bikeli,” informa nia.

Hatán ba preokupasaun ne’e PM, Taur Matan Ruak rekoñese, komunidade Ataúro hasoru problema infraestrutura bázika hanesan estrada, bee moos no eletrisidade.

“Assuntu ne’ebé na’i administradór postu Ataúro levanta, ha’u raisk hatene, tanba kuandu ha’u prezidente ha’u vizita fatin hotu-hotu iha ita-boot sira-nia suku, estrada, bee moos, eletrisidade,” dehan PM Taur.

Atu rezolve problema infraestrutura bázika sira-ne’e maka, governu transforma ona diresaun jerál rua hanesan, EDTL ho SAS ba empreza públika, nune’e bele rezolve problema bázika sira-ne’e ho lalais.

Tanba governu fó ona kompeténsia ba EDTL,EP ho BTL,EP atu jere no halo prosesu aprovizionamentu rasik hodi atende pedidu komunidade nian.

“Ha’u espera ho sira-nia mudansa estatutu ho responsabilidade sira-ne’e, sira bele servisu hamutuk ho komunidade sira par depois bele tau matan ba ahi bainhira ko’alia kona-ba EDTL, tau matan ba bee, kuandu ko’alia kona-ba bee,” tenik PM Taur.

Tinan 2021 ne’e, governu esforsu instala liña distribuisaun eletrisidade ba suku 70 resin iha Timor laran tomak ne’ebé seidauk asesu ba eletrisidade.

Ministériu Obras Públikas (MOP), liu husi EDTL,EP halo ona lansamentu ba projetu eletrifikasaun iha suku 34, no fulan-Setembru sei lansa tan iha suku balun.

Ataúro kompostu husi suku lima mak hanesan, Beloi, Makili Makadade, Bikeli no Vila Maumeta.

Husi suku lima ne’e fahe ba aldeia 19 ho totál populasaun hamutuk 1.744, totál xefe família hamutuk 2.627.

Kuaze maioria populasaun Ataúro moris husi atividade agrikultura no
peskas inklui pekuária no seluk tan.(ajo)

About dilipost

Check Also

MKAE Atualiza Prosesu Adezaun Ba Organizasaun Mundial Komersiu

DILI Post- Ministro Koordenador asustus ekonomiku(MKAE) Joaquim Amaral enkontru ho primeiru Ministro Taur Matan Ruak …

Leave a Reply

Your email address will not be published. Required fields are marked *