Monday , September 27 2021

Loron Falintil Sei Prienxe Ho “Tour Falintil Dalan Ba Dame” Iha Ainaro

DILI- Post Xefi Estadu Maiór Jenerál Falintil-Forsa Defeza Timor Leste (F-FDTL) Tenente Jenerál Lere Anan Timur hatete 20 Agostu loron Falintil sei prienxe ho atividade “Tour Falintil Dalan ba Dame” iha Munisípiu Ainaro.

“Ami nia planu ida ne’e atu komemora loron 20 agostu, hanesan uluk nian mak halo eventu loron Falintil ne’e iha munisípiu sira la’ós iha Dili. Atividade mak “Tour Falintil Dalan ba Dame” iha Ainaro,” dehan Tenente Jenerál Lere Anan Timur ba jornalista, hafoin remata enkontru semanal ho Prezidente Repúblika, iha Palásiu Prezidénsial, Bairru Pite, Dili, Kuarta (28/07).

Jeneral fitun tolu ne’e haktuir objetivu hosi atividade ne’e atu la’o haleu hodi identifika fatin ne’ebé uluk partidu ho partidu oho malu.

“Ami nia objetivu atividade “Falintil dalan ba dame”, tanba ita hatene uluk iha funu laran ne’e Timor ho Timor oho malu entre FRETILIN ho FRETILIN no FRETILIN ho Uniaun Demokrátiku Timorense (UDT),” tenik Lere.

Tan ne’e, nia dehan sira hakarak haleu Timor hodi identifika fatin ne’ebe mak tau destaka ne’ebá, nune’e aban bainrua politíku sira mai fó kontinuidade. Maibé, iha obgrisaun katak tenke hatudu fatin sira ne’e mak uluk partidu ho partidu oho malu.

“Ami fó atensaun ba sira katak fatin ida ne’e uluk FRETILIN ho UDT oho malu sein dúvida ke ita seidauk tuur hamutuk halo dame. Mais, ita la’o ba mai ona tanba ita nia kultura no tradisaun Timor ne’e bainhira, ha’u oho ha’u nia maluk nia inan-aman ida mak, lulik sama ain-fatin, sama iha ninia knua no hahan ho hemun mós sai moruk hotu. Ita seidauk halo ida ne’e,”afirma Lere.

Tenente Jeneral ne’e hatutan to’o agora, FRETILIN seidauk halo deklarasaun formalmente ba vítima sira uluk FRETILIN oho no balun ne’ebé mate inosente hela. Ema sira ne’ebé FRETILIN oho ne’e ho nia objetivu no rede ida de’it katak atu ukun-an. (Lya)

About dilipost

Check Also

L7 Vizita Edifisiu PolTranz Hare Kondisaun Ne’ebe Sira Infrenta

Deputadu ,Cornelio da Conceicao Gama “L7” DILI Post- Vise Prezidente Komisaun B trata asuntu defeza …

Leave a Reply

Your email address will not be published. Required fields are marked *