Tuesday , October 19 2021

Luta Hasoru Covid-19, EUA Apoiu Tan Osan Millaun $2.3 Ba TL

DILI Post – Estadus Unidus Amerika (EUA) apoiu tan orsamentu Millaun $ 2.3 ba Timor Leste (TL) luta hasoru covid-19.

Estadus Unidus kontente hodi anunsia fundu adisionál millaun $2.3 iha asisténsia, ajuda TL luta hasoru Covid-19 no haforsa seguransa saúde nian.

“Fundu foun ne’e sei uza ba harii fasilidade saúde hodi permite ho diak liután Governu TL salva ema nia moris,” relata liu husi karta komunikadu ne’ebe Dili Post asesu husi Ofisiál Asuntus Públikus Embaixada Estadus Unidus, Sesta-feira (10/09) ohin.

Iha komunikadu ne’e sita dezde pandemia hahú, EUA servisu ona hamutuk ho TL hodi luta hasoru Covid -19, fornese ona millaun $ 4 iha asisténsia ne’ebé krítika tebes. 
 
Kompromisu millaun $2.3 ne’e sei fornese finansiamentu hodi hahú servisu ba projetu tolu hanesan tuir mai nee:
 
Harii Fasilidade Izolamentu iha Baucau: harii fasilidade izolamentu sira iha ospitál rejional ida iha Baucau neebé sei ajuda trata pasiente Covid-19 no bele hamenus problema iha fasilidade saúde atuál sira;

Harii Unidade Móvel ida ba Kuidadu Intensivu iha Dili: harii unidade móvel ida ba kuidadu intensivu iha Dili hodi reforsa TL ninia kapasidade atu fornese kuidadu saúde intensivu ba pasiente Covid-19 no populasaun sira seluk neebé ho kondisaun saúde vulneravél

No mos Projetu Fura Bee Matan iha Batugade: dezenvolve projetu fura bee matan hodi aumenta kapasidade fornesimentu bee moos no saneamentu iha sentru kuarentena ida iha Batugade. 
 
Reprezenta esforsu tomak husi Governu Estadus Unidus hodi apoia TL, fundu neebé anunsia iha ohin loron nee fornese husi Misaun Estadus Unidus nian iha TL, liuhusi Ajénsia Estadus Unidus ba Dezenvolvimentu Internasionál (USAID) no Komando Indo-Pasífiku Estadus Unidus kolabora hamutuk ho Korpu ba Paz.

Aspetu sira husi obra nee sei halao liuhusi serbisu hamutuk ho UNICEF.
 
“Estadus Unidus hamriik metin ho TL hanesan amigu no parseiru duradouru hodi hamutuk kombate Covid-19,” hateten Enkaregadu Negósiu Embaixada Estadus Unidus iha Dili, Tom Daley.

Nia hatutan Estadus Unidus adopta abordajen abranjente ida hodi hapára pandemia ida-nee, halo mitigasaun ba estragu hirak neebé Covid-19 kauza ba ema no sosiedade sira, no reforsa rekuperasaun iha nível globál no prontidaun atu hasoru ameasa kauza husi pandemia iha futuru.

“Ami kontinua intensifika ami-nia asaun hodi ajuda TL atu salva ema nia moris tanba ida-nee maka buat loos neebé ami presiza halo,”tenik Tom Daley.
 
Ne’e duni, nia dehan apoiu ohin refleta kompromisu forte Estadus Unidus nian hodi hapára pandemia nee.

“Iha fulan Juñu, Prezidente Biden anunsia katak Estadus Unidus sei fahe doze sira husi ami-nia fornesimentu vasina ba mundu tomak,” haktuir Tom Daley.

Tan ne’e, nia dehan Estadus Unidus fornese no fahe ona doze vasina besik millaun 110 ba nasaun sira hamutuk 60 no nee foin maka hanesan inísiu deit.

Estadus Unidus sei kontinua fornese asisténsia ba TL hanesan parte ida husi EUA nia kompromisu hodi lidera resposta iha nível global hasoru pandemia ida-nee. (**)

About dilipost

Check Also

PM Taur La Partisipa Reuniaun KM Tanba Afetadu Pozitivu Covid-19

DILI Post – Primeiru Ministru , Taur Matan Ruak, la partisipa reuniaun Konsellu Ministru (KM) …

Leave a Reply

Your email address will not be published. Required fields are marked *