Friday , December 3 2021

MÉDIA SAI IMPACTO BO’OT BA IDENTIDADE NAÇIONAL TIMOR-LESTE IHA CONTEMPORÂNEO

I. Introdusaun

            Liu husi publikasaun no iha varanda intelectualidade ida ne’e ho objetivo atu relata uitoan konaba média husi rai liur, liu-liu iha indonezia ne’ebe maka fo interpretasaun barak konaba condisaun iha Timor-Leste. Ida ne’e importante tebes mai ita, atu ita nudar cidadão ida sempre iha interese comum hodi consiente no tau matan ba papel da média nebe maka divulga ona informasaun barak konaba condiҫão no situasaun iha ita nia país. Claro que ida nee afeita tebes ba ita nia identidade nudar nasaun ida.  Nudar Timoroan ita mos presiza fo contribuisaunno halo controlo mos ba situasaun actual nebe maka akontese dadaun iha média social nebe maka relasiona ho ita nia nasaun. Ida nee nudar esperiensia no sai educação ida mai ita hodi bele educa ita sai ema ne’ebe maka hatene crítica hodi responsabiliza no responde ba problema ne’ebe maka afeita husi média. Tamba ita hatene katak média nudar instrumento relativo no autonomia nebe maka ema hotu-hotu iha poder hodi uza no fahe informasaun tuir sira nia hakarak. Tamba nee liu husi escrita badak ida ne’e, hau ata laiha sentido ou objetivo atu hamosu conflitos ruma ou ideia nebe maka atu provoca entre ita ho nasaun seluk. Maibe oinsa ita curiozu nafatin hodi faça informasaun ida nee nudar ferramenta política nebe maka hafanun fila-fali ita foin sae nia sabedoria hodi responde ba problemas actual nebe maka acontese.

A. Protégé no mantein nafatin identidade nasional Timor-Leste.

            Identidade nasional nudar expressao husi valor histórico nasaun ida nebe maka exclusivo no diferente husi nasaun sira seluk. Pecularidade inerente nasaun hotu-hotu nebe asosiado babain hanaran ho termo “identidade nasional”. No entanto prosesu formasaun ba identidade nasional ida la signifika katak remata ona, maibe nudar buat nebe maka sempre mudansa no contextualmente akompanha mos ba desenvolvimento iha tempo naruk nia laran. Ida mos mak ita hanaran nudar identidade nacional país de Timor-Leste. Atu haktuir deit katak ita nia esforso laos luta hodi manan independensia deit, maibe ho independensia ita komesa tama bae etapa nebe maka tem que hasoru ezame oi-oin nudar nasaun nebe maka foin hamrik mesak. Tamba nee ita presija estuda barak no esforsu hodi construir no manter nafatin ita nasaun nia naran iha mundo. Ho analogía badak it bele fo descrição katak klalaok husi identidade nasional Timo-Leste nudar jardim ida ne’ebe maka sempre exige cada ema idadak hamosu idealisme saudavel hodi fo crítico no autocrítico ba nia identidade nacional, hodi haburas liu tan no atualiza comprensaun konaba identidade nacional hodi bele sai significado liu tan.

            Iha contexto identidade ida nee sempre relasiona mos perguntas ne’ebe maka mosu konaba; hau husi ne’ebe? no hau nia obrigatorio nudar cidadão, saida maka hau bele halo buat ruma ba nasaun? Perguntas modelu hanesan ne’e nudar tipo existensial ida. Ita labele ignora pergunta ida nee tamba sei relaciona ho status ou posicao, pessoalmente hnesan mos cidadaos nebe maka iha sociedade nia laran. Se karik ita rasik labele responde ba perguntas hirak nee, maka laos ema seluk deit maka questiona konaba ita nia identidade, maibe ita rasik confusão hodi questiona rasik konaba ita nia identidade. Hodi evita perguntas erroneas hirak ne’e, ita presija halo motivasaun hodi hadomi no tane as ita identidade iha mundo. Laos atu hadomi deit, maibe ita rasik mos presiza reconhese no kuidadu trajetoria histórica nasaun nian. Tamba ita labele hadomi buat ruma ne’ebe maka ita rasik labele kuinese ho diak e profundo. Portanto iha parte ida ne’e cada pessoa iha dever hodi sai ema ne’ebe maka sabedoria no nudar volante ida ne’ebe maka lori ita hodi ba conheҫimento nebe maka klean konaba história pais ninian. Iha caso ida nee, significa katak ita iha dever hodi proteze, hadomi, no buka tuir lialos husi ita identidade nasional konaba política, religião, cultura no estratificação social nebe maka transmite ona husi gerasaun ba gerasaun iha ita nia pais. Pensador libanes Amin Maalouf husi nacão francesa afirma katak “a caracterizacao horizontal é o aspeto que determina quem somos ou quem somos nos? Signifika katak caracterização horizontal maka identidade nebe sai canal ida mai ita nia gerasaun atraves husi política, etnia, cultura, religião, estratos sociais, etc. Finalmente sei akompanha ita ba diversidade afiliasaun ou alianças. Diversidade afiliasaun nebe maka babain hanaran expreção híbrido identidade propria, nebe maka dalaruma hanesan mos nudar identidades puras. Ho conhecimento hanesan nee sei sai nudar alicerce basico ba ita nia nasaun atu ita bele firme nafatin hodi protégé ideología nebe maka destrutivas. Liu-liu ba ideologia proseletísmo no apologética ne’ebe maka koko atu hafoer ita nia nasaun.

B.Média barak informa noticia fictício konaba kondisaun Timor-Leste.

            Doping nudar analogia nebe maka diak hodi ita descreve ambiente husi média nebe maka ho plano oi-oin bobar lia konaba Timor-Leste. Condisaun actual, principalmente iha Youtube halo ema husi rai liur sira questiona konaba condicão Timor-leste. Noticias hirak ne’e sira produz no planejadas atu nunee bele sai interesante hodi sira bele utilija nudar material ba consumidor sira iha público. Trasa dadaun ona mos conhecimento nebe fictícias nebe maka halo ema ema barak mak fiar ba informasaun nebe maka sira pasa, até mesmo ema barak mos maka sai vítima hodi consumo informasaun falsa hirak nee. Ikus mai hípnotico ema barak husi rai liur nebe maka fo sira nia hanoin nebe diferente tebes konaba situasaun Timor-leste. Actualmente viral dadaun iha redes sociais no pública ona Informasaun konaba situasaun iha Timor-leste nebe maka divulga ona ho lingua indonezia liu husi youtube ho título ne’be maka bombástico no hiperbóla mak hanesan; (Timor-leste nudar nasaun ne’ebe maka kiak liu iha mundo, Timor-Leste arepende wainhira fahe malu ho Indonezia, Mina rai Timor-Leste komesa maran, etc).  Ate sira mos halo comparasaun ba capital Dili ho capital sira seluk ne’ebe maka iha rai liur, liu-liu iha Indonezia. Parte seluk, iha mos blafemias iha coluna comentario nebe maka provocado.  Ironia liu tan wainhira ita hare sira uza dados uluk nian hodi haforsa sira nia argumento iha média social.

            Ita mos lahatene objetivo saida husi informasaun hirak ne’ebe maka sira fahe, será que iha relasaun ho problema pasado nian ou sira nia objetivo hodi hetan beneficio financeiro liu husi informasaun ne’ebe maka sira pública iha média. Ita hare katak informasaun oi-oin nebe maka sira pública ona sai afeita tebes, na realidade hatudu katak ema barak husi rai seluk maka fiar ona ba informasaun falsa hirak ne’e.  Mesmo ita hatene momos katak buat nebe maka sira halo nudar mal educado no inmoral teb-tebes, tamba gosta julga nasaun seluk ho dados nebe maka incertos. Ema hirak nee ita bele hatete katak iha comprensaun no conhecimento nebe maka limitada konaba radicalismo, fanatismo, no justificativa ne’be maka erros no laiha base.  Sira komesa manobra atu hatudu iha média katak sira nia ideia no viasaun hirak ne’e laos mai husi imazinasaun ruma ou razao nebe maka ficticio, maibe nudar husi dados real ne’ebe maka sira hetan.

            Relaçiona ho ida nee, ita hare katak ema husi nasaun seluk matenek liu, hodi intepreta konaba situasaun ne’ebe maka akontese iha Timor. Tamba ne’e hau nia sugestão ida oinsa ita bele hamosu sentimento ne’ebe maka foun nudar cidadão Timor nian, atu ita bele eufaría liu tan hodi estuda no bele hatene klean liu tan ita ni historia rasik. Tamba ita nia nasaun presiza tebes ita nia prezensa, hodi bele hamoris liu tan unidade no fraternidade nudar cidadão ida, hodi bele responde ba problemática nebe maka agora dadaun acontese iha ita nia rai laran. Ita nia visão no misão nudar foin sae maka oinsa hari fila-fali ambiente nebe maka construtivo, hodi hetan fila-fali moris nebe maka mudansa ba ita nia rain iha presente no ba futuro oin mai. Buat hirak ne’e ita halo nudar oferta ida ba ita nia heroi hirak ne’ebe maka halo ona sacrifío barak hodi lori ita nia rain ba manan independência.

C. Ita nia responsabilidade hodi hatan ba problema nebe maka acontese iha média.

            Prinsipio husi responsabilidade nudar klalaok ou asaun hodi responde ba situasaun nebe maka iha média. Oinsa ita bele responde no halo clarificação ba problema ne’ebe iha ita nia rain, ne’ebe maka hamosu husi nasaun seluk iha média online. La significa katak ita tem que responde ho agresivo maibe ita koko hamoris fila-fali ita nia emosaun intelectualidade. Oinsa ita expressa ho idealismo ne’ebe maka rasional ho norma ética nudar humano ida, atu labele acontese tan mal-entendido entre ita ho ema seluk. Porque a pasiencia é uma única solucao para os males que não tem a solução. Ita koko prova buat hirak ne’e hoi ta nia intelectualidade no conhecimento     nebe maka ita iha. Tamba hasoru malu ho idealisme nebe maka diferente util tebes hodi bele completa malu liu tan.

            Nudar nasaun ida claro que ita laos hare deit ba liberdade nudar projeto nebe maka hotu ona, ne’ebe maka hein deit ita atu goja no halo comemorasaun, maibe ita mos presija hamoris fila-fali ita nia creatividade ruma hodi hafurak liu tan identidade nasaun nian. Ita presija halo promesa mos ba ita nia-an ho comitmento hodi halo testemunha. Tamba lialos husi testemunha maka valor nebe maka importante ba ita identidade nudar Timoroan.  Atu ita nudar foin sae bele luta hodi hakoak no defende ita nia nasaun husi ema at sira nia hanoin. Dala ida tan ho sinceriedade no humildade husu ba ita foin sae sira hotu, atu labele hare deit problema iha parte interior (problema nebe maka iha nasaun laran), maibe ita presija sai husi zona ida nee hodi hodi responde mos ba problema nebe agora dadaun acontese. Liu-liu média husi rai liur ne’ebe maka interpreta buat barak konaba ita ita nia nasaun. Tamba ho mundo digital ohin loron, fasil atu ema uza oportunidade hodi ataca ita ho maneira nebe maka oi-oin. Tamba ataca ho média nudar assasinato nebe maka abstrato no fo impacto mos ba psicología ema nian. Impacto husi psicología ida ne’e laos ba deit cidadão ne’ebe maka iha rai laran, maibe ba mos cidadao Timoroan ne’ebe maka escola ou serviҫo iha rai liur. Tamba nee nudar cidadão nebe maka hadomi nia nasaun, ita presija estuda barak husi esperiençia hirak ne’e, hodi bele sai guarda atu bele hari ai riin Timor nian metin liu tan.      Testemunha hirak nee importante atu ita bele hetan fila-fali valor nebe maka lakon ona, liu-liu pensamento husi ema rai seluk konaba ita nia nasaun. Ho nune’e ita bele moris hakmatek no optimisme nafatin hoi ta nia rain, no la presija halo tan comparasaun ita nia nasaun ho nasaun seluk. Dala ida tan lalikan atu tauk no moe hodi contra ba informasaun falsa nebe maka iha média, tamba husi uluk kedas ita nia nasaun esforso ho condisaun nebe maka simples. Ita nia heroi sira só uja deit rama, diman, katana no aihan mak hanesan batar no fehuk, maibe sei bele luta hodi hasoru invasor sira. Quanto mais ita ohin loron hetan ona formasaun no educacao barak. Ita mos ativa ona iha sector no meios comunicacao oi-oin. Tamba ne’e ita iha dever hodi contra idealisme ne’ebe maka contrario ho ideologia husi ita nia nasaun.

II.Conclucão.

            Moris ne’e laiha mudansa se karik ita rasik la halo mudansa. Nudar cidadão ida labele hatoba ita nia intelectualidade hanesan cadavel vivo, hodi husik ita nia poder ba ema seluk mak fo interpretasaun em nome ba sira nia nasaun rasik. Maibe ita tem que barani hodi fo prioridade no comitmento ba ita nia-an rasik hodi salva ita nia identidade nasional Timor nian. Hau privado apresia tebes ho creatividade no talento barak husi foin sa’e ohin loron, nebe maka produz ona buat barak liu husi talento nebe maka sira iha. Buat hirak ne sai nudar rikusoin liu husi joventude sira iha tempo contemporanea. Maibe dificuldade ohin loron maka konaba oinsa ita bele resolve prestígio nasaun nian nebe maka ema husi rai seluk utiliza iha média no konsege kria informasaun falsa hodi hamonu identidade nasaun. Problema hirak nee mos hau sente importante atu ita bele tau matan hodi resolve hamutuk, atu labele influensia mos ba ita nia prezensa iha nasaun seluk. Liu-liu ba nai ulun ne’ebe maka iha timor laran tomak oinsa sira bele tau matan liu tan konaba situasaun Timor nebe maka grave tebes iha média sosial. Tamba nudar nai ulun nebe maka agente sumidade laos deit sai volante hodi resolve problema nasaun nian iha parte interior maibe mos iha parte exterior. Tamba atu hetan mudansa evolusioner ida nee, ita presija serbisu hamutuk entre povu ho nai ulun hodi hari sistema nebe maka diak liu tan hodi alcansa ba plano furak konaba ita nia rain doben. Liu husi média nebe maka viral ona, ita koko atu estuda barak liu tan no hamosu espírito foun ida hodi bele lori Timor mudansa liu tan no hatudo ba mundo katak Timor mos bele… Viva Timor-Leste.

III. Referências:

Budi Kleden, Paul. Bukan Doping Politik. Maumere: Penerbit Ledalero, 2004.

Gusti Madung, Otto. Politik Antara Legalitas dan Moralitas. Maumere: Penerbit Ledalero, 2009.

Baghi, Felix, ed. Pluralisme, Demokrasi, dan Toleransi. Maumere: Penerbit Ledalero, 2012.

Ceunfin, Frans, ed. Hak-Hak Asasi Manusia, Pendasaran dalam Filsafat Hukum dan Filsafat Politik. Jilid 1. Maumere: Penerbit Ledalero, 2004.

Mashitoh, Dwi Nur. “Jadi Negara Termiskin Cadangan Minyak Timor Leste Kering.” UniquediAnd Funny Videos. ˂https://www.google.com/amp/s/sosok gr…˃. Asesu iha dia13 Julho 2020.

Fakta, Data. “Timor-Leste Negara Termiskin di Asia Tenggara.” ˂https://youtu.be/K_krzGNbJKg˃. Asesu iha dia 22 Setembro 2020.

Waktu, Lintas. “Timor-Leste Menyesal Merdeka dari Indonesia.”  ˂https://youtu.be/F6wiwICJB5c˃. Asesu iha dia 13 Abril 2020.

About dilipost

Check Also

CRĺTICA ARTIGO “OINSÁ VALORES CRISTÃOS BELE SAI BASE BA DEMOCRACIA PERSPEKTIVA FILOSÓFICA”

      Husi : Adelino Do Santos Elo (Dino Elo) Introdusaun   Em primeiro lugar …

Leave a Reply

Your email address will not be published. Required fields are marked *