Tuesday , June 28 2022

MTK Lansa Komersial Fligth Citilink Iha TL

DILI Post- Ministru Transporte no Komunikasaun (MTK), Jose Agostinho da Silva neebe akompanhadu husi Embaixador Indonezia iha Timor Leste, Okto Dorinus Manik, ofisialmente lansa voo komersial Citilink iha Timor Leste. Aviaun komersial nee sei halo voo entre diresaun Dili-Bali no Bali-Dili.

Tuir Ministru Transporte no Komunikasaun (MTK), Jose Agostinho da Silva hatete, lansamentu voo komersial aviaun Citilink iha Timor Leste ba oin sei fasilita diak liu konektividade entre Indonezia ho Timor Leste.

“Iha semana rua liu ba iha pedidu husi ita nia empreza Citilink Indonezia no empreza Timor oan, oinsa mak atu reativa fali voo komersial iha Timor Leste no iha tempu nee hau aprova kedas, nunee bele organiza ona voo komersial iha Timor Leste,” dehan governu liu husi konferensia imprensa neebe halao iha sala VIP, Aeroportu Internasional Nicolau Lobato Komoro, Dili, Segunda, (13/06).

Governante ne’e agradese ba Prezidente no Diretor PT Citilink no Embaixador Indonezia iha Timor Leste, no setor privadu sira Timor neebe mak durante nee servisu hamutuk, ikus bele ofisializa lansamentu ba voo komersial Citlink iha Timor Leste.

“Tanba nee, ba futuru ita iha serteza konaba orariu voo nian, neebe deklarasaun husi Prezidente Diretor Citilink katak, hafoin lansamentu nee sei hahu husi voo dala rua kada semana,” tenik governante nee.

Iha fatin hanesan, Embaixador Indonezia iha Timor Leste, Okto Dorinus Manik hateten, Timor Leste neebe foin daudaun restaura nia independensia ba dala-20, ba oin Governu Indonezia hakarak servisu hamutuk nafatin iha area oin-oin inklui konektividade.

“Hau senti orgulhu tebes komunikasaun ho Governu Timor Leste fasil tebes, tanba negosiasaun dala ruma informal, maibe ikus mai realiza duni, tanba nee hau husu obrigadu barak ba Governu Timor Leste neebe ho vontade simu ami iha nasaun nee,” tenik Embaixador Indonezia iha Timor Leste, Okto Dorinus Manik.

Nunee mos Diretor Timor Airways, Fernando da Silva hatete, aviaun Citilink neebe sei halo voo husi Dili-Bali ho kustu neebe mak baratu.

“Presu neebe mak ita fo mak husi US$ 250 too US$ 270, nee sura hotu ho han hemu nian,” hakotu nia.(cal)

About dilipost

Check Also

Citilink Sei Voo Hikas Iha Fulan Maiu

DILI Post-Aviasaun Citilink sei hahu hikas ninian voo komersial iha loron 30 fulan Maiu tinan …

Leave a Reply

Your email address will not be published.