Thursday , May 19 2022

Niki Triste Lere Husik F-FDTL, Lere: Ha’u Sei Tau Matan Nafatin Ba Imi

DILI Post -Komandante Unidade Polisia Militar (PM) Maijor Abel da Costa “Niki” sente triste tanba rejignasaun Xefi Estadu Maior F-FDTL, Tenente Jeneral Lere Anan Timur.
Maske nune’e Jeneral fitun tolu ne’e afirma kontinua tau matan nafatin ba F-FDTL, no lakohi obra ne’ebe nia kaer monu ba rai.

Liu husi diskursu ba aniversariu PM badala 17, Niki hato’o semtimentu triste ne’e ba partisipante ne’ebe marka prezensa iha festa aniversariu PM iha Kintal Boot.

“Ami hato’o mos ami nian lia fuan triste, e lia fuan kontente, tanba ami rona dehan ami nian sua exelensia atu ba vida sivil, hakotu ona misaun iha fulan ida rua tan, maibe nudar oan kuandu ami nian aman ses husi ami nian leet, oan sira sempre triste, ” dehan Niki.

Maske nune’e, parte ida nia sente haksolok, tanba karik Xefi Estadu ba hetan fali fatin dignu nudar oan sente orgullu, maibe esperansa katak aman ida ne’ebe sei mai nafatin tau matan ba Unidade PM.

Iha fatin hanesan, Xefi Estadu Maior Jeral Falintil-Forsa Defeza Timor-Leste (F-FDTL), Tenente Jeneral Lere Anan Timur iha esperansa ba Xefi Estadu ida ne’ebe sei mak kaer F-FDTL.

“Ha’u fiar komandu ida ne’ebe mak mai sei hatutan buat ne’ebe ha’u halo, no kritika saida mak ha’u halo sala. Maibe, hau sei tau matan nafatin ba imi” hateten Lere.

Ne’e duni, nia dehan loron ohin nudar loron ikus nia hamrik hodi fo liafuan iha sermonia aniversariu PM nian, no espera katak komandante ida ne’ebe sei mai kontinua tau matan ba F-FDTL.

“Imi hatene se ha’u sai, se mak sei mai fali iha ha’u nian fatin, ne’e la’os forsa ida ke bo’ot tebes- tebes para imi duvida, imi nia aman Maijor Jeneral Falur Rate Laek, imi nian aman Aluk, Sabika, no Maunana sei laiha ema seluk atu mai troka ha’u, so sira ne’e mak hakarak ka lakohi tenke mai hamrik iha ha’u nian fatin,” afirma Lere.

Nia admite, maske ba fatin seluk sei la haluha F-FDTL, no halo apoiu hotu-hotu ne’ebe iha tanba lakohi haree obra ne’ebe mak lidera husi tinan 2001 monu ba rai, maibe tenke hamrik nafatin ba oin.

“Imi rona katak, ha’u atu kandidata an ba Prezidente Republika, ne’e ultima kareira ba ema ida, mais por kazu sei la iha impedementu, laiha manobras pulitikas ha’u bele sai kandidata ba prezidente, atu sai mos imi nian komandante supremu ba forsa armadas,” nia iha esperansa.

Maibe, Lere dehan ne’e depende ba vontade politika, tanba dezafius barak mak sei hasoru, karik la kandidata an ba Prezidente Republika mas tinan ida ne’e sei ba vida sivil.

Enkuantu dadaun ne’e, Lere hatama ona ninian karta reforma ba Ministru Defeza, Filomeno de Jesus Paixao hodi bele tau ba konsiderasaun, maibe bainhira la hetan aprovasaun nia sei reforsa ho karta rejignasaun. (pogo)

About dilipost

Check Also

Polisia Lá Tolera Ema Kriminozu

DILI Post- Komandante jeral Polisia Nasional Timor-Leste (PNTL), Komisariu Faustino da Costa deklara fo ona …

Leave a Reply

Your email address will not be published.