Tuesday , June 28 2022

O Nia Votu Mak O Nia Futuru


Hakerek nain : Adolfo Martins de Deus
Estudante Universidade Katolik Widya Mandira, Kupang

Loron haksumik a’an ba’a dau-daun iha kalohan loro-monu. Tasi mos dahur nakfunan simu loron. Hau beila sira temi, kalan sei mosu mai husi nakukun be’e hafalun rai, halo rai nakaras.

Udan mos monu rai, habokon lolon sira no buras buat moris hotu. La hanesan bai-bain, hau tur mesak no hare hau Inan be’e hafahe fini sira ba’a rua, soe tiha balun no halot tenik balun seluk .

Hau laran la hakmatek, hau duvida basa fini hirak be’e iha, rai tinan barak ona, maibe tan sa hau inan tenke hili balun no soe seluk.. Hau la hatene tamba sa? Besik tiha hau inan, ho lian kman hau husu, “Mama tansa tenke haketak tan fini sira be’e iha. Basa sira hotu fini nebe hanesan, ku’u no hatur iha fatin be’e hanesan mos.

Maibe tamba sa balun deit mak mama hili balun seluk lae?
Hau Inan tur nonok no nafatin hamos fini sira. Hau sente laran triste basa hau Inan hatan hau ho lian laek. Hau hanoin barak no sai duvida liu tan. Maibe hau hela iha minutu duvida nia laran.

Udan mos tau rai, hau ho hau aman kesi metin lutu, hau inan fali sunu duut aat be halibur ona. Oras besik loro kraik, hau ho hau aman bolu hikas hau feto-alin sira hamutuk ami fila uma. Hare ba’a hau aman be’e leba ai maran hau mos lori tuir nia. Ida ne’e mak hau nia dinamika moris wainhira tempu kuda to’o mai.

Liu tiha loron hirak nia laran hau inan foti hikas fore keli no no fore rai hodi hamos. Hau inan nafatin hafahe sira ba rua. Hau inan hili liu ida be’e diak no soe hikas sira be’ e a’at. Bei-beik hau la satisfas.

Hau buka tuir hau aman. Hare nia tur mesak, hemu no lulun hela tabaku iha hadak leten be iha uma sorin mai. Besik tiha no tur iha nia sorin hau hahu husu. ” Hau papa dehan tok mai hau, tamba sa hau mama hafahe fini sira ba rua, sira seluk soe ba ahi, seluk fali halo’ot didiak”. Hau aman mos nonok no husik hau haknanu mesak ho pergunta “molik” ne’e. Hau la hatene tamba sa mak tenke tarde nune’e, hau nafatin hela iha duvida.

Liu tiha minutu balun, hau mos hiit a’an no husik hela hau aman mesak. Molok atu hakat ain hau aman bolu hikas. “Hau oan tur ba’a, rona mai.” hau aman haktuir, ” nudar ema toos nain, ita hela iha ciklu nia laran.

Ita la ses husi certesa no incertesa, maibe ita sempre hela iha kadunan esperansa nian.” frase ne hatahan hau i’is no habosu hau kakutak. Hau sente hau la komprende maske lian ne’e furak tebes.

Husik tiha nia kafe, hau aman kontinua, “Hau oan tamba ita hela iha ciklu certeza no incerteza ita presija justo hanesan RAI, hela iha ninia realidade: nia buras wainhira udan wen habokon maibe sei sai maran dekor se kuandu hela de’it ihan loron matan nia ukun.

Nune’e mos UDAN, nia mai ho ninia realidade, la promete loron no oras, maibe nia sei mai. Tamba ne’ e ita mos tenke justu, hili fini ne’ebe diak no kuda fini ne’ebe kualidade, basa ita presiza ku’u fuan be’e diak mos.” haktutan hau aman ho neon malirin.

Hau fuan nakfila no hau duvida lakon iha kalohan be’e hakous loron ba’a dau-daun. Hau matan mos no neon nakloken.
Husik tiha hau aman hau mout mesak iha silensiu nia laran. Hau hanoin hikas lian beiala sira dadoli hela, “Quidquid agis, prudenter agas, et respice finem.” (Halo buat hotu ho spiritu sabedoria no tetu didiak ninia konsekuensia ikus).

Hau komprede ona, moris laos deit atu buka ida nebe fasil, buat hotu tenke halao ho justu no hela iha prosesu. Husik sentimentu hotu, no kore a’an husi Kultura, lian, Fatin, grupo nebe hanaran politika identidade.Ita tenke justu, hodi fo fiar ba ema nebe serve duni sai fini diak ba nasaun. Ita laos de’it hanoin kona ba osan, han hemu uma laran nian nebe mohu iha biban nia destinu. Maibe koko hatur futuru ida iha certeza no justu nia laran hodi lori diak ba’a ema hotu.
Ho nune’e ita nia festa Demokrasia laos deit sai momentu atu bosok no lohi malu maibe koalia hamutuk, hasasin ba malu, hatur futuru ida diak ba TIMOR.

VIVA TIMOR LESTE E VIVA O FUTURO CERTEZA

Hau rain hau nain mak ukun, hau nain mos mak tenke deside. Laos deit hau ho nia, maibe ami hotu, ita hotu, povu hotu ran Timor nian. Hau lakohi halerik tan, lakohi mos tanis tan no sai atan ba’a “ukun maten”, maibe sai nain ba ukun nebe progresivu hodi lori roman foun no futuru nebe certu no certeza. O Nia Votu Mak O Nia Futuru.

About dilipost

Check Also

HABURAS SISTEMA DEMOKRASIA LA BELE ADOPTA TULA LIMAN

Hosi: Moisés Vicente Analiza kona-bá kandidatu Prezidente Repúblika (PR) ba períodu tinan 2022-2027. Iha sistema …

Leave a Reply

Your email address will not be published.