Friday , May 20 2022

PM Inagura Ro Berlin Ramelau

DILI Post- Primeiru Ministru (PM) Taur Matan Ruak ho ksolok boot hamutuk ho povu Timor inagura ro Berlin-Ramelau.

PM Taur informa katak loron ohin loron ksolok boot ida no selebrasaun ba povu timoroan.

“Daudaun ne’e ita inaugura ró transporte pasajeiru foun ida (Ferry) ne’ebé hanaran ‘Berlin-Ramelau’ hodi haforsa konektividade marítima nasionál nian no permite ba sidadaun hotu-hotu atu halo viajen ho seguru no konfortavel, tantu iha vizita ba família sira, no mós iha dezenvolvimentu atividade ekonómika iha kosta marítima nasionál,” dehan nia liu husu diskursu iha Portu Dili, Kolmera, (20/12).

Xefi Guverno ne’e hato’o, parabéns ba interveniente sira hotu iha realizasaun projetu ida-ne’e, liuliu Membru governu sira, pesoál tékniku, konsultór sira no empreza konstrutora DAMEN.

Aliende ne’e, kumprimenta liuliu ba ekipa téknika APORTIL nian, ne’ebé, iha jestaun di’ak ba projetu konstrusaun, kumpre ona ninia misaun ho forma ezemplár, ho kontratu inisiál ne’ebé asina ona husi Governu, iha fulan-maiu tinan 2019.

PM Taur manifesta, lori Governu no Povu Timoroan nian naran, hato’o agradesimentu ne’ebé kle’an ba ita-nia ko-finansiadór, Governu Alemanha, liuhusi ninia Banku Dezenvolvimentu Alemanha (KfW), ne’ebé fó apoiu euro millaun 7.8 esensiál ba konkretizasaun projetu ida-ne’e.

Konsellu Ministrus atribui ona naran ba “Berlin-Ramelau” hodi fó onra ba lasu amizade no kooperasaun husi povu Timor-Leste no Povu Alemanha nian.

“Ohin loron Istóriku ida! Ró-Ahi “Berlin-Ramelau” ne’ebé dezeña espesialmente atu halo operasaun iha tasi sira Timor-Leste nian no konstroi ona tuir padraun mundiál nian ne’ebé aas liu ba seguransa no efisiénsia navegasaun nian,” dehan nia.

Tuir nia espesifikasaun téknika sira, hato’o ona mai ha’u katak ró ida-ne’e sertifika ona atu halo viajen iha kualkér kondisaun marítima no lokalizasaun jeográfika, liuliu iha tasi feto, tasi mane no bele halo viajen internasionál sira, karik presiza.

Maibé, nia dehan Berlin-Ramelau, sarani ho naran foho ne’ebé aas liu iha Timor-Leste, nu’udar símbolu espirituál povu nian, ne’ebé iha foho tutun harii estátua Nossa Senhora nian, nune’e reprezenta liu fali ró ida.

Berlin-Ramelau hanesan mós símbolu kapasidade no rezisténsia povu timoroan nian, espresaun másima husi esforsu umanu hodi servisu hamutuk ba objetivu ida de’it, ba ita-nia Nasaun nia di’ak.

Projetu ida-ne’e enfrenta kondisaun lojístika no administrativa ne’ebé difísil tebes, ne’ebé afeta husi krize mundiál Pandemia COVID-19 no husi ita-nia situasaun difisil rai-laran nian.

Maibé, Berlin-Ramelau konsege navega no hakat-liu dezafiu no difikuldade sira-hotu, tanba ohin loron, iha ita-nia oin, ró modernu ida, prontu atu serbí povu Timoroan.

Iha biban ida-ne’e, nia hato’o respeitu ba membru tripulasaun sira ró ne’e nian, ne’ebé marka prezensa, ba dala uluk, maka kompostu husi mariñeiru Timoroan sira ne’ebé ho kualidade aas, sertifikadu no treinadu hodi manobra ba tipu embarkasaun ida-ne’e, tuir prátika internasionál sira ne’ebé di’ak liu.

Ne’e nu’udar sinál progresu ida, ba kapasidade no superasaun ne’ebé hatudu husi rekursu umanu sira, tuir Polítika VIII Governu Konstitusionál, ne’ebé ho ninia objetivu atu implementa indústria marítima nasionál ida ne’ebé maka kompetitiva no emprendedora, ne’ebé sai mós ezemplu ba setór privadu iha investimentu no valorizasaun traballadór marítimu sira rai-laran nian.

“Ba ró no tripulasaun ne’e nian, tasi la’ós ona fronteira ka obstákulu ida, maibé biban ida atu estabelese Timor-Leste nia ligasaun foun sira ho Mundu, hodi reforsa kriasaun dalan foun sira ba dezenvolvimentu no ba integrasaun rejionál no internasionál”tenik PM Taur.

Nune’e, nia enkoraja ba entidade hotu ne’ebé prezente atu haree rikusoin sira tasi nian ho forma hanesan, liuliu, iha itasi territoriál sira no zona marítima eskluziva, hodi poténsia futura kandidatura ida ba esplorasaun ita-nia plataforma kontinentál.

Tasi hanesan fatór dezenvolvimentu ida ba territóriu iha tempu pasadu, nune’e mós, ba ohin loron no ba futuru.
Berlin-Ramelau nu’udar instrumentu hosi asaun governativa ne’ebé iha folin boot, ne’ebé bele kontribui ativamente ba pasajeiru no ba família sira-nia bein-estar, hodi haforsa konektividade nasionál no hasa’e diversifikasaun ekonómika iha ambiente ida ne’ebé seguru ba pás no toleránsia. (Javel)

About dilipost

Check Also

Virgilio Reativa Dispensaun Prezidente KI

DILI Post–Prezidente Konsellu Imprensa (KI), Virgilio Guteres halo reativasaun ba dispesaun durante fulan tolu nia …

Leave a Reply

Your email address will not be published.