Friday , July 30 2021

PM Taur Inagura Postu Akrema, no Husu Tenke Kuidadu Didiak

DILI Post (Atauro)-Primeiru Ministru hanesan mos Ministru Interior Taur Matan Ruak husu ba komunidade iha aldeia Akrema, suku Bikeli, postu administrativu Atauro, munisipiu Dili atu kopera ho Polisia Nasional Timor-Leste (PNTL), liu hosi Unidade Polisia Maritima (UPM) hodi tau matan no halo manutensaun ba postu UPM foun refere.

Iha diskursu Taur hateten, planu atu konstrui postu UPM ida desde komandante PNTL anterior Longuinhos Monteiro ne’ebe hatudu fatin ne’e mai wainhira Permeiru Ministru Taur Matan Ruak sei asumi kargu nudar Presidente Republika TL.

“Ha’u lembra uluk ha’u mai toba iha Akrema sinhor eis komandante PNTL Longuinhos Monteiro mak mai hatudu rai ne’e ba ha’u hodi halo postu UPM iha ne’e, e ha’u sai tiha presidente postu laiha no finalmente tinan barak liu ita bele iha postu ho apoiu hosi TLPDP, ” dehan Nia iha Akrema, Atauro (11/06)

Nia hatutan, TLPDP koperasaun ho PNTL tinan barak, no tinan ida ne’e bele intensifika, no bele ajuda hadia buat ne’ebe mak persija hadia hodi operasionaliza di’ak liu tan prejensa PNTL iha fatin fatin iha Timor-Leste.

“Ne’e primeira Postu ne’ebe tau iha Akrema, tanba ne’e prejensa PNTL nian iha ne’e la’os atu impede joven sira, inan aman sira nian aktividade iha ne’e, pelo kontrariu ajuda, no fasilita aktividade ita bo’ot sira nian la’o di’ak liu tan ba futuru, ” hateten Nia

Nune’e, Taur husu ba Komandante UPM, liliu ba membru sira ne’ebe sei destaka iha postu refere atu servisu hamutuk ho populasaun ho di’ak nune’e bele ajuda sira hodi resolve problema sira ne’ebe mak iha, inklui fasilita sira nian aktividade ho di’ak no kopera malu.

“Ha’u hanesan Ministru Interior no mos Vise Ministru Interior ami kontinua halo buat hotu liliu hosi nivel guverno nian, no mos servisu di’ak ho parseiru sira,” dehan Nia

“Ha’u apela ba inan aman sira para kontinua kopera no kolabora, liliu Australia para melora ita bo’ot sira nian kondisaun sira, maibe favor ida buat sira ne’ebe ita bo’ot sira iha kuidadu ne’e importante, halo manutensaun, ” Nia hatutan.

Enkuantu Komandante UPM, Superintendente Polisia Basilio de Jesus hateten, estabelesementu postu siguransa UPM iha aldeia Akrema para atu bele asegura peska ilegais sira ne’ebe durante ne’e akontese bebeik.

“Ohin ita nian Nai Primeiru Ministru inagura ona ita nian postu siguransa aldeia Akrema, aldeia ida ne’e liga ho ilha Liran Indonezia nian kuaze semana semana aktividade ilegais iha tasi entre Liran ho Akrema ne’e as tebes, tanba ne’e mak UPM haree ba perioridade ba ita hodi bele responde ba aktus de krime sira ne’e liliu ema naok ikan,” dehan Nia

Nia haktuir, ho estabelese UPM Akrema bele ona kontrola masimu aktividades ilegais ne’ebe akontese iha Akrema, Liran, n Alor tama to’o Tasi TL nian.

Atu bele identifika sidadaun Liran ne’ebe halo peska ilegais iha Akrema, maka Komandante ne’e dehan, ho postu sigurnsa UPM foun ne’ebe foin mak estabelese sei koloka membru UPM Ataurooan hamutuk nain hitu hodi bele fo apoiu sigurnsa iha postu ne’ebe mak iha ona.

“Ha’u hatun tiha ona ordem semana ida liu ba, hahu ohin ita inagura postu ida ne’e, e ohin mos komesa sira servisu iha ne’e nain hitu to’o nain ualu hodi nune’e sira bele kontrolu tasi Akrema ida ne’e ba tama to’o parte Alor nian ne’eba, ” dehan Nia

Reprejenta Timor Leste Police Development Program (TLPDP), Philippa Venning hateten, Australia haksolok tebes tanba bele apoiu PNTL hodi konstrui postu UPM, no mos UPF nian.
“Hau haksolok tebes iha dader ida ne’e iha Akrema hodi inagura Postu UPM, embaxador lamemta tanba nia labele partisipa iha sermonia ne’e, ha’u orgullu los hodi reprejenta embaxador no guverno Australia,” dehan Nia

Guverno Australia orgullu atu apoia PNTL, no guverno Timor-Leste hodi harii postu foun sira, inklui postu ida ne’e, no Timor Leste tomak liu hosi programa TLPDP nian.

“Hamutuk ami sei apoia ba konstruksaun postu foun ne’e, inklui postu hat ne’ebe harii ona , hanesan belun, no vizinhu Australia no Timor Leste iha parseira forte, no ita rekunese fronteira seguru mak importamte tebes tanba razaun barak,” hateten Nia

Philippa rekunese katak, siguransa fronteira mak fundamental ba siguransa nasional Timor- Leste nian, no mos ba siguransa iha ita nian reziaun, aliende ne’e, siguransa fronteira mos importante ba rezilensia, no ba dezemvolvimentu ekonomia Timor Leste nian, liliu iha Atauro tanba nudar fatin importante tebes.

Nia fiar katak, UPM sei uja postu ne’e iha Akrema atu piskaliza movimentu bero no ro sira ne’ebe involve iha peska kontra lei.(mark)

About dilipost

Check Also

MKAE Atualiza Prosesu Adezaun Ba Organizasaun Mundial Komersiu

DILI Post- Ministro Koordenador asustus ekonomiku(MKAE) Joaquim Amaral enkontru ho primeiru Ministro Taur Matan Ruak …

Leave a Reply

Your email address will not be published. Required fields are marked *