Thursday , December 2 2021

PolTranz Kada Fulan Hatama Osan Ba Estadu, Maibe Laiha Kareta No Motor Apoiu Servisu

DILI Post-Komandante Polisia Tranzitu (PolTranz) Munisipiu Dili, Inspetor Polisia, Domingos Sarmento Gama hateten, dadaun ne’e kareta hat (4) no motor sanulu resin mak kondisaun aat total.

Ho situasaun nee, sira labele halao sira nian aktividade hodi kontrola siguransa rodaviaria, no atende asidente sira ne’ebe mak akontese iha kapital Dili semana ida ona.

“Atu fo sai ba publiku katak lamentavel ho ami nian atendementu ba asidente trafegu kadaves atendementu tarde, ba parte siguransa rodaviariu nian mos kadaves ita nian kontrolu ladun masimu, ho razaun tanba kondisaun transporte neebe mak polisia tranzitu iha kuaze totalmente aat, laos avaria, maibe aat total,” dehan Sarmentu ba jornalista, iha knar fatin, Kaikoli-Dili (22/11).

Ne’e duni, nia dehan ho kondisaun ne’ebe mak dadaun nee PolTranz munisipiu Dili infrenta, maka afeita ba aktividade loron-loron tenke paradu.

Maibé, nia hatutan iha situasaun balun mak kontinua ezekuta, maske tenke husu apoiu transporte hosi Komandu Dili.

“Ami desaraska, meius ida neebe mak ami halo hodi bit lao ba iha fatin asidente,” tenik nia.

Tuir nia, iha tranzitu Dili iha kareta pick up hat maske nunee kondisaun aat hotu, no durante nee aguenta deit ho prado ida neebe doasaun hosi tribunal rekursu hodi atende asidente sira, maibe evidensia sira labele tula, tanba tula la diak.

“Laos polisia mak laiha vontade atu bele halao servisu, maibe tanba kondisaun trasporte mak la suporta atu bele atende asidente sira,” dehan Domingos.

Ho kondisaun ida nee, nia lamenta ho governu nian planu neebe dehan perioridade ba iha siguransa roda viaria, no ida seluk mak polisiamentu komuniktariu, maibe realidade rezultadu siguransa roda viariu nian mak nunee nafatin.

Nia admite, Komandu PNTL munisipiu Dili halo ona esforsu hodi hatoo pedidu ba iha Komandu Jeral, maibe dalaruma tanba problema iha orsamentu, nune’e too ohin loron seidauk iha resposta.

Nia dehan tan, situasaun sira hanesan nee tuir lolos labele akontese ba iha kapital nasaun, tanbá wainhira siguransa roda viariu mak la konsege kontrola ho diak nee sai problema boot.

“Iha kapital Dili mak ninian situasuan real hanesan nee problema bo’ot ida ba ita, se movimentu rodaviariu mak ita la kontrolu ho diak, hau hanoin kapital nee bele deskontrolu, ho siguransa roda viariu,”nia lamenta.

Maske kondisaun limitadu, PolTranz kontinua halao servisu hodi servi povu no nasaun. Miabe, durante nee seksaun tranzitu Dili mos konsege hatama osan ba kofre estadu ho kuantidade makas.

Enkuantu, tuir dadus neebe relata hosi Komandante katak, motorizada sanulu resin mak a’at ona, no kareta hat neebe hetan iha tinan 2007 no 2009 kondisaun aat hotu, no dadaun nee laiha kareta foun ida hosi governu
(MrQ)

About dilipost

Check Also

UEP-UPF Kaptura Joven Ida Hatama Tabaku Joker Karon 5 Ho Ilegal

DILI Post– Unidade Espesial Polisia, liu hosi Kompañia Operasaun Espesial (COE) patrulla konjunta ho Unidade …

Leave a Reply

Your email address will not be published. Required fields are marked *