Monday , September 27 2021

PR Lu Olo Dekreta EE Ba loron 30, Variante Delta Impoin Taka Fronteira

DILI Post – Dekreta Estadu Emerjénsia (EE) husi Prezidente Repúblika (PR) Francisco Guterres ‘Lú Olo’ ba loron tolu nulu (30) tan.

Relasiona ho Variante Delta husi SARS-Cov-2 impoin taka fronteira terrestres Timor Leste ho Republika Indonezia.

Nune’e, liu husi dekretu PR númeru 56/2021, 27 Jullu, dekreta EE ba loron 30, hahú husi tuku 00.00 iha 1 Agostu 2021 (domingu) no termina tuku 23.59 iha 30 Agostu 2021 (Segunda-feira).

Variante kontajiozu liu, Delta to’o ona nasaun viziñu Repúblika Indonézia, ne’ebé Timor Leste fahe nia fronteira terrestres hamutuk. Iha Indonézia, rejista kazu foun diariamente barak liu fali kompara ho India.

Tuir previzaun hateten posibilidade iha loron ida nia laran Covid-19 sei bele hadaet ba sidadaun 200 mil ou liu tán.
Timor Leste presiza fó atensaun liután tanba iha ona ema na’in-haat ne’ebé tama mai territóriu nasionál iha fulan juñu nia rohan no inísiu jullu 2021 kontajiozu ho variante Delta husi SARS-Cov-2.

“Adosaun medidas importante sira ba prevensaun no kontrolu importasaun variante foun husi SARS-CoV-2 atu la tama no hadaet ba populasaun liu husi impoin taka fronteira,”relata liu husi Komunikadu Imprensa Casa Civil iha Palásiu Presidensial Bairru-pite, Kinta (29/07).

Iha komunikadu ne’e mos sita kona ba sidadaun estranjeiru sei tama territóriu nasionál bainhira autoriza husi Sentru Integradu Jestaun Krize, estabelesimentu regras ba distansiamentu sosiál, impozisaun ba teste atu hatene infesaun, izolamentu ema moras, infetadu no suspeitu infesaun, konfinamentu domisiliáriu no determinasaun serkas sanitárias.
Estensaun no deklarasaun ba EE mai ho fundamentu iha subsisténsia ba situasaun kalamidade públika.

PR dekreta EE hafoin pedidu estensaun aprova iha Parlamentu Nasionál. Molok ne’e, Konsellu Superior Defeza no Seguransa no Konsellu Estadu husu PR haruka pedidu autorizasaun ba Parlamentu Nasionál estensaun EE.

Tuir Ministériu Saúde, iha 28 jullu, iha nivel nasionál kazu konfirmadu ho Covid-19 ho númeru akumuladu hamutuk 10 535 dezde Narsu 2020, kazu ativu 736 no rejista mate na’in-26. Estadu kontinua foti medidas prevensaun no kombate kontájiu virus SAR-CoV-2. Deklarasaun EE sei abranje territóriu nasionál tomak.

EE sei parsialmente suspende direitus ba sirkulasaun internasionál, liberdade sirkulasaun no fixasaun rezidénsia, direitu reuniaun no manifestasoins, liberdade ba kultu, direitu ba edukasaun no direitu propriedade, direitu ba rezisténsia, no inisiativa ekonómika privada.

Dezde fulan marsu 2020, hafoin rejista kazu konfirmadu ida ho SARS CoV-2 Timor-Leste implementa kedas estadu emerjénsia atu fó kbiit ba Governu atu foti medidas prevensaun no kontrolu hodi hases sidadaun hotu-hotu husi kalamidade públika ne’ebé bele mosu husi moras Covid-19.(Lya)

About dilipost

Check Also

PR Lu Olo Konkorda Fo Apoiu Finanseiru Ba Sira Ne’ebe Mate Hafoin Simu Vasina

DILI Post – Prezidente Repúblika (PR) Francisco Guerres ‘Lu olo’ konkorda fó apoiu finanseiru karik …

Leave a Reply

Your email address will not be published. Required fields are marked *