Saturday , December 4 2021

PR Lu Olo Konkorda Fo Apoiu Finanseiru Ba Sira Ne’ebe Mate Hafoin Simu Vasina

DILI Post – Prezidente Repúblika (PR) Francisco Guerres ‘Lu olo’ konkorda fó apoiu finanseiru karik sidadaun ruma mate ka hetan inkapasidade hafoin simu vasina hasoru Covid-19.

Tuir karta komunidade ne’ebe Dili Post asesu husi Casa Civil iha Palasiu Presidensial, Sesta (3/9) ohin.

Mensiona katak loron 2 fulan Agostu liu bá, PR simu husi Governu diploma ida (Dekretu –Lei) kona-ba dever Estadu nian atu fó apoiu finanseiru (indemnizasaun) ba ema vasinadu, karik mate ka hetan inkapasidade hafoin simu vasina, iha ámbitu planu nasional vasinasaun, atu prevene no kombate moras Covid-19.

Hanesan baibain akontese ho diploma ne’ebe de’it (Lei ka Dekretu-Lei), PR iha kbiit konstitusional atu promulga ka veta (la asina). Bele mos veta ho motivu polítiku.

Bainhira konsidera katak Lei ka Dekretu-Lei ruma la haktuir Konstituisaun RDTL, PR haruka ba Tribunal Rekursu no instánsia ida ne’ e mak deside inkonstitusional ka lae.

PR la hili dalan haruka Dekretu-Lei ne’ e ba Tribunal Rekursu tanba haree katak matéria ne’e monu ba iha ámbitu responsabilidade civil extrakontratuál Estadu nian ne’ebé tenke hatuur ho lei ida.

Maibé, to’ o ohin loron Timor-Leste seidauk iha lejislasaun ne’ebé regula responsabilidade sivíl kontratuál Estadu nian ka entidade públika sira nian ba ezersísiu atividade jestaun públika.

Tuir Konstituisaun RDTL haruka, Parlamentu Nasional mak iha knar lejislativu ba matéria ida ne’e.

Parlamentu Nasional bele mós fó autorizasaun lejislativa ba Governu atu prepara lei kona-ba responsabilidade sivíl Estadu nian.

“Biar inisiativa di’ak ida, Governu la halo ho autorizasaun lejislativa Parlamentu Nasional. Tanba ne’e mak Prezidente Repúblika veta Dekretu-Lei ne’e,” relata iha komunikadu ne’e.

Prezidente Repúblika la’ ós kontra Estadu fó apoiu finanseiru bainhira ekipa médika avalia no komprova katak vasina anti-Covid mak kauza ema mate ka hetan inkapasidade.

Aliende ne’e PR haruka ona mensájen ba Governu tansá mak la promulga Diploma ne’ e.

Hein katak iha tempu badak Parlamentu Nasional mak haruka diploma ne’e ka fó autorizasaun lejislativa ba Governu hodi hato’o proposta-lei atu regula responsabilidade sivíl Estadu nian no submete ba apresiasaun PR nian.(Lya)

About dilipost

Check Also

PM Partisipa Serimónia Ritual Perfurasaun Mina Matan Iha Covalima

DILI Post-Primeiru Ministru (PM) Taur Matan Ruak partisipa serimonia ritual perfurasaun mina matan iha Munisipiu …

Leave a Reply

Your email address will not be published. Required fields are marked *