Saturday , December 3 2022

QUO VADIS O ESPÍRITO JUVENTUDE DA GERAÇÃO ATUAL A PÓS A INDEPÊNDENCIA?


Husi :Naterçia Silveira Pina
(Estudante Escola Secundária Geral Católica Colegio Do Verbo Divino Palaca)

Introdusaun
Historia da Indepêndencia de Timor-Leste hatudu katak juventude desempenha papel importante tebes ne’ebe sai hanesan sasukat ba determinasaun da Indepêndencia de Timor Leste. Juventude sai hanesan abut ba espíritu nasionalizmo e patriotizmo ba luta da Indepêndencia. Realidade ida ne’e, ita bele hare liu husi historia da indepêndencia ne’ebe Juventude ho sira nia espiritu nasionalizmo e patriotizmo, sira berani atu fakar sira nia ran no prontu atu lakon sira nia vida hodi kontribui ba Timor-Leste nia Indepêndencia.

Dia 12 de novembro de 1991 sai hanesan momentu histórico ne’ebe hakerek ona iha ita Timor oan hotu nia fuan no sei relembra husi gerasaun ba gerasaun. Momentu histórico ida nee sai hanesan ‘the unforgettable moment’ ba Timor oan sira katak mate ka moris ukun rasik aan. Prinsipio filozofia “Mate ka moris ukun rasik aan” sai hanesan abut ba Juventude sira nia espiritu da luta. Ita la bele nega katak existência husi juventude sira, fo ona kontribuisaun barak ba luta da Indepêndencia de Timor Leste.

Juventude sira nia luta iha tempu passado sai hanesan pontu culminante ida ne’ebe importante tebes atu ita reflete iha ita nia moris, tamba juventude sira mak ho aten berani atu marka kores ba luta da Indepêndencia de Timor Leste. Tamba ne’e liu husi reflesaun ida ne’e, konvida ita atu hateke fila fali ba kotuk hodi reflete konaba espírito husi Juventude lutadores da Indepêndencia hodi transforma ita nia espírito nuudar Juventude atual a pós a indepêndencia e aumesmo tempu sai hanesan bukae ba ita nia moris.

Espírito dos Jovens Lutadores da Indepêndencia

Massácre da santa cruz sai hanesan evidensia histórica da luta husi juventude ba processo da Indepêndencia de Timor Leste. Ita presiza relembra katak Indepêndencia ne’ebe ita goza dadauk ne’e la’os buat ida ne’ebe fasil hanesan mundu imaginasaun ne’ebe fasil atu existi tuir ida-idak nia hakarak e sem luta ka sakrifisiu aan. Heróis barak mak mate tan deit hakarak luta no sakrifika sira nia moris hodi sosa Indepêndencia. Ita mos konsiente katak luta da Indepêndencia ne’e la hases aan husi papel da juventude iha tempo passado. Waihira akontesimento massácre de St. Cruz iha dia 12 de Novembro 1991 ne’ebe rezulta juventude barak mak mate.

Liu husi akontesimentu ida ne’e, Timor Leste hatudu ona ba mundu internasional katak mate ka moris ukun rasik aan. Hahu kedan iha tempu ne’eba, mundo internasional komesa rekonhese katak Timor Leste hakarak duni atu ukun rasik aan. Espírito husi juventude lutadores sira komesa sai forte liu tan depois hetan ataque husi militares Indonesia.

Espirito juventude lutadores da independensia aumesmo tempo sai hanesan buat ida neebe unlogical, tamba komesa hetan ona ataque husi militares Indonesia maibe sira sei nafatin hakarak atu avanssa contra nafatin inimigo ho liman mamuk, no nunca iha liafuan rende atu hakiduk. Akontesimentu Massácre de St. Cruz sai hanesan mistério ida neebe absurdo. Imagina deit katak, espírito husi juventude lutadores sira nafatin optimismo hodi avansa atu contra inimigo ka colonialista sira. Tamba ne’e, papel da juventude lutadores sai hanesan pontu reflesaun konaba espiritu nasionalizmo e patriotizmo ne’ebe ita presiza atu aprende buat barak husi sira.

Depois liu husi prosessu luta neebe naruk, no periode orde baru neebe lidera husi Soeharto remata. Liu husi enkotru reunião de governo de gabinete de transição, B.J.Habibie decidi hodi fo status especial ba Timor Leste hanesan área autonomia. Desizaun ida ne’e hetan responde positivo husi ONU ho Portugal ne’ebe marka liu husi enkontru iha New York iha dia 04 até 05 Agustus 1998. Depois iha dia 27 de janeiro 1999, Habibie decidi hodi fo opção rua, hanesan automia especial no referendum. Liu husi enkontru neebe lança iha dia 05 de Maio 1999 iha New York neebe hetan assina akordu husi tripartit entre Indonesia-ONU-Portugal, hodi realiza loron consulta popular. Tamba ne’e, Conselho de seguransa da ONU estabelece misaun da paz liu husi UNAMET (United Nation Mission For East Timor) ne’ebe toma responsabilidade atu fasilita loron konsulta popular neebe realiza iha dia 30 de Agostu de 1999 (Suhartono: 2008, 101).

Konsekuensi husi opsaun rua neebe B.J.Habibie hasai, hatudu katak, maioria povu Timor Leste rejeita status outonomia no hili referendum ka independensia. Tamba ne’e, liu husi rezultadu elisaun ne’ebe fo sai husi ONU iha dia 04 de setembro 1999 hatudu katak votus maioria ho total (78,5%), povu Timor Leste decidi atu haketak aan husi Indonesia; no votus hotal (21,5%) mak decidi hodi hili autonomia ka nafatin integrasaun ho Indonesia; no (1,8%) inválido ka cancelado (Julio Tomas Pintu: 2015, 11). Iha mos razaun ne’ebe maka motiva povu Timor Leste atu haketak aan husi Indonesia; realidade ida nee ita bele hare liu husi ação violencia no injusitça neebe milateres Indonesia halo ba povu Timor Leste. Injustiça no ação violensia mak hakas povu Timor Leste hodi luta mate aan atu haketak aan husi Indonesia. Tamba nee iha dia 05 de Maio de 2002, Timor Leste formalmente hetan reconhese husi ONU no mundu internasional hanesan nasaun indêpendencia ida ho naran República Democrática de Timor Leste.

Mesmo agora Timor Leste hetan ona nia Indepêndencia ona, maibe laos katak ita hanesan juventude la iha responsabilidade. Ita hanesan juventude la iha ona espírito da luta. Precisamente ita hanesan juventude buat barak mak ita presiza halo hodi prenche ita nia valores da independensia. Tamba nee ita hanesan juventude atual, funsaun saida mak ita sei realiza hanesan ita nia papel hodi prenche valores da indepêndencia de Timor Leste.

Quo Vadis o Espírito da Juventude Atual a pós a Indepêndencia?

Hare ba espiritu husi juventude lutadores neebe marka ona historia ba luta da Indepêndencia. Tuir lolos sai hanesan pontu da conciência ida neebe hafanun fali ita nia espiritu da luta hanesan juventude atual neebe presiza ita nia sakrifika aan hodi serbisu no kontribui ba dezemvolvimentu rai doben Timor Leste. Juventude ohin loron presiza atu reflete fila fali ita ida-idak nia aan, katak oinsa ho hau nia espíritu da luta hanesan juventude atual atu bele kontribui ba hau nia rai. Seraque ita hanesan juventude atual neebe goza no senti ona valores da indepêndencia husi joventude lutadores da indepêndencia ne’ebe oferese gratuita ona mai ita. Saida mak ita tenki halo hanesan papel da juventude atual hodi kontribui ba dezemvolvimentu.

Gerasau Juventude ohin loron diferente ho juventude lutadores da Indepêndencia. Tempo passado, juventude lutadores sira lori forsa fizíku no kilat atu kontra no funu hasoru inimigo ka kolonialista sira. Lori ema barak halo demonstrasaun atu hatudu ba mundu tomak katak Timor Leste hakarak ukun rasik aan. “Ami Timor oan lakohi ema seluk nafatin sama ami no ukun nafatin ami.” Ida nee lian halerik husi juventude sira no nafatin luta atu sai husi ambiente ne’ebe nokonu ho terus no injustiça.

Susar tebes ba juventude lutadores sira atu goza sira nia liberdade hanesan ita juventude atual a pós da indepêndencia. Juventude lutadores sira nia dever no direito sempre em limitado. Sira la hetan oportunidade hanesan ita atu goza sira nia direito no dever. Juventude lutadores sira só bele prenche sira nia realidade moris ho mataben neebe suli tun husi hasan no nafatin fo esperança ba sira katak loron ida Timo Leste sei ukun rasik aan no gerasaun foun sei la halerik no terus tan hanesan ami. Maibe na realidade, saida mak akontese depois da indepêndencia; juventude barak mak estraga rasik sira nia moris hanesan la kohi eskola, envolve aan iha drogas, mete arte marsiais, cria grupo konflito, halo abuso seksual, no seluk-seluk tan. Ida ne’e mak realidade neebe ita la bele nega katak, akontese dadauk iha ita nia rai doben Timor Loro sa’e.

Imagina deit katak, karik oras nee ita nia heróis sira asisti hela realidade ida ne’e, certamente sira sei tristi no tanis tamba sira senti katak sira nia sakrifisiu no luta ne’ebe lori tempu naruk no oferece sira nia isin no ran hodi sosa independensia; afinal na realidade saugati deit no gerasaun foun la aproveita oportunidade da Indepêndencia atu kontribui ba Timor Leste nia dezemvolvimentu.

Gerasau juventude atual presiza halo revolusaun mental atu transforma valores negativo sai valores positivo neebe bele lori influencia positivo ba sociedade no mos ba desemvolvimento. Gerasaun juventude atual tenki konsiente ho ita nia herois sira nia luta atu nunee ita bele kuda espirito foun neebe bele kontribui ba ita nia povu no nasaun. Juventude ohin loron tenki nafatin luta ba povu no nasaun mesmo ho maneira ne’ebe mak la hanesan.

Tamba ne’e, dalan ida ne’ebe sai hanesan instrumentu ba luta mak dezemvolve povu no nasaun liu husi edukasaun no lideransa. Liu husi edukasaun sei forma no produz rekursus humanus neebe kualidade. Edukasaun mak sai hanesan instrumento ne’ebe importante tebes hodi alkansa kondisaun bem comum. La iha dalan seluk tan, se la liu husi dalan ida deit katak hadia kualidade da edukasaun.

Tamba ne’e, hanesan juventude atual, tempo to’o ona atu ita konsidera no valorza ita nia herois sira nia sakrifisio no mos ita nia história luta da Indepêndencia. Ita nia Heróis sira luta ho espírito nasionalismo neebe boot tebes, nem hanoin sira nia aan rasik até prontu hodi lakon sira nia isin no klamar tan deit hakarak Timor Leste bele hetan Indepêndencia. Pergunta mai ita gerasau foun no liliu ba ita juventude atual mak ne’e; saida mak ita halo ona ba ita nia rai hanesan apreciação ida ba ita nia herois sira nia luta ba Indepêndencia? Kontribuisaun saida mak ita oferese ona hodi prenche valores da Indepêndencia ohin loron?

Juventude sai Baze ba Unidade, Paz no Estabilidade

Tempu to’o ona atu juventude sira desempenha sira nia papel hanesan agent of change hodi lori povu ba moris diak; cria unidade, paz no estabilidade. Hanesan juventude, presiza halo inovasaun ba sociedade no hadia situasaun no kondisaun ne’ebe sociedade hela ba, katak contribui no halo diak ba sociedade ho ita ida-idak nia kapasidade ne’ebe iha. Tamba chave ba nasaun ida bele sucesso ka lae, depende ba juventude sira nia partisipasaun no kontribuisaun.

Timor Leste manan ona nia independensia, maibe sei presiza ita hotu nia koloborasau atu tane aas valores husi ita nia luta da independensia ne’e rasik. Juventude sai hanesan pontu determinasaun ba nasaun ida nia destinu, katak juventude sai hanesan tulang punggung Negara. Tamba ne’e, desemvolivmentu husi nasaun ida depende mos ba saida mak juventude sira halo hodi kontribui ba nasaun.

Kontribuisau boot ne’ebe juventude sira presiza desempenha iha sira nia papel mak luta hodi kria paz, estabilidade no unidade. Tamba ne’e, atu alkansa buat sira ne’e, juventude sira presiza kuda espírito nasionalizmo iha sira nia aan rasik katak sira tenki senti no konsiente katak nasaun Timor Leste nee sira nia nasaun rasik. Juventude sira tenki iha sense of belonging ba sira nia rai. Enquantu mentalidade do nasionalizmo no patriotizmo metin ona iha sira nia fuan, maka domin ba nasaun mos sei sai konkreto, katak sira bele halo buat ruma atu kontribui ba sira nia rai doben Timor Lorosa’e. Tamba ne’e, desemvolvimento nasaun Timor Leste presiza ita hotu nia kolaborasaun hodi servisu hamutuk.

Juventude hanesan pontu sentral ba desemvolvimento, tamba juventude mak sei kontinua atu luta hodi desemvolve nasaun Timor Leste ba oin. Tamba ne’e hanesan juventude, buat sira neebe ita presiza atu halo hanesan expresaun sentimimento gratidaun do patriotizmo ba desemvolvimento nasaun nian mak hanesan tuir mai ne’e:

Primeiro, atu alkansa moris pobreza, ingnorância no desemprego. Ita hanesan gerasau foun, presiza sai juventude ne’ebe inteligente, no iha kapacidade atu domina no acompanha nafatin desemvolvimento da ciência no teknologia ho diak. Katak ita bele uza buat sira ne’e hodi desemvolve ita nia sociedade no mos bele compete ho ema seluk mundo internasional. Tamba nee la iha dalan seluk atu ita bele alkasa buat sira ne’e hotu, enquanto ita la badinas atu estuda no prepara ita nia aan ho diak, liu husi edukasaun. Tamba ita hotu hatene katak edukasaun mak sai hanesan base fundamental mai ita tamba liu husi edukasaun ita bele hatene buat ne’be ita la hatene. Ita bele acessu edukasaun husi parte oi-oin, liu-liu iha parte formal no informal. Edukasaun sai hanesan fonte importante ida atu ajuda ita bele forma no konhese ita nia karakter no abilidadee ne’ebe mak ita iha tiha ona no ajuda mos ita atu dezenvolve abilidade sira ne’ebe mak iha ona. Edukasaun mos bele ajuda konstrui ita nia mentalidade atu hasoru loron ne’ebe sei mai.

Segundo, atu labele akontese konflitos entre cores do grupo ka ras ida ho sira seluk, maka ita hanesan juventude atual presiza, hametin unidade, no tane aas relasaun amizade, katak ita mesak Timor oan deit, ita hotu mai husi familia ne’ebe hanesan, moris husi cultura ne’ebe hanesan. Tamba nee ita presiza respeito malu no valoriza ita hotu nia cultura, tradisaun, custumes; no ikus liu ita buka atu komprende malu.

Terceiro, atu labele akontese, korupsaun, nepotizmo no coluzaun, maka ita hanesan juventude ne’ebe sei sai lideransa gerasaun foun ne’ebe mak sei kontinua luta ba ita nia nasaun Timor Leste nia destino, ita presiza forma mentalidade ne’ebe fo benfisiu ba bem comum, aprende honesto ho ita nia comportamento rasik, no tenki kuda sense of belonging iha ita nia aan rasik, atu nunee ita sempre iha domin ba maluk sira hotu katak ita presiza servi ema hotu no hakarak ema hotu bele goza sira nia direito no dever hanesan.

Konkluzaun

Hau taka hau nia opiniaun ho pergunta ontologia nebé dehan katak: loron ba loron ema sempre husu: Ita mai husi nebé? Ita atu ba nebé? Atu halo saida? Pergunta ontologia ida ne’e lori ita ba konsienten konaba ita ida-idak nia existência no essência. Liga ho kotexto QUO VADIS O ESPÍRITO JUVENTUDE DA GERAÇÃO ATUAL A PÓS A INDEPÊNDENCIA, ne’ebe sai nuudar realidade ida ne’ebe ita la bele haketak husi sociedade nia moris iha nasaun ida Timor Leste nia laran, maka dalan ne’ebe los maka ita presiza konsidera no valoriza ita nia herois sira nia luta no mos ita nuudar juventude atual, ita presiza konsiente hodi explora ita nia kapasidade no potensia sira hotu ne’ebe ita iha, liu husi edukasaun atu ita bele mos kontribui ba ita nia rai doben Timor Leste. (**)

About dilipost

Check Also

Makna Bahasa Cinta

Oleh: Yohanes Mau.Penulis Misionaris SVD.Sekarang sedang bertugas di Regio SVD Zimbabwe-Afrika. “I belong to my …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement