Saturday , December 3 2022

Rekruta F-FDTL Nakonu Ho Nepotizmu

DILI Post- Atu haboot liu tan Instituisaun FALINTIL-Forsa Defeza Timor-Leste (F-FDTL) ninia kna’ar, loron 15 Jullu 2022, Ministériu Defeza (MD) liu husi Komisaun Rekrutamentu F-FDTL hasai nota numeru 20/COREC/QG-FALINTIL-FDTL/O1 konaba Divulgasaun Prosesu no Kritériu Rekrutamentu F-FDTL 2022.

Nakonu ho politika nepotizmu ou sistema familiarizmu. Tanba, tuir faktus no evidénsia balun ne‘ebé MUSA hetan husi kandidatu sira no lista rezultadu teste no avaliasaun la tuir kriteriu ne’ebe iha. Ho nune’e, MUSA dezkonfia prosesu rekrutamentu ne’ebé hala’o husi Komisaun rekrutamentu F-FDTL la iha transparénsia no nakonu ho iregularidade ou espesifiku liu.

Ba publiku liu husi Diretiva numeru 009/CEMG F-FDTL/2022 hodi hala’o rekrutamentu ba membru militar foun 2022 ho natureza la tuir kriteriu ne’ebe iha. Deklara husi portavoz Movimentu Universitariu Sachal (MUSA) Noe Bernardino Ximenes ba jornalista iha kampuz Central UNTL, foin lalais ne’e.

Noé sublina, F-FDTL nu’udar Instituisaun militar ne’ebé responsabiliza Defeza Estadu Republika Demokratika Timor-Leste (RDTL) no sai mos liman kro’at povu Maubere tuir Konstituisaun RDTL. Parte dalimak Artigu 146 haruka ninia kna’ar prinsipal atu garante Independénsia Nasional, Integridade Territorial no Seguransa Externa.

Rejime jeral atu fo oportunidade ba joventude Timor oan tomak, feto no mane atu hola parte iha fileira Forsas Armadas ho vontade Nasionalista no Espiritu patriota husi Joventude Timor oan feto no mane ne’ebé aplika.

Komisaun rekrutamentu F-FDTL 2022 konsege simu kandidatus hamutuk ema na’in 1.423 ne’ebé kompostu husi feto kuaze ema na’in 152 ou 10,75%. Husi numeru total kandidatu sira ba mane kuaze ema na’in 1.271 ou 89,25%.

Husi numeru total kandidatu ne’ebé simu husi komisaun, enkuantu ema na’in 2 husi numeru total ne’ebé pasa la kompleta kritériu jeral. Tanba ne’e, numeru total kandidatu husi ema na’in 1.423 tuun ba 1.421. Kandidatu ne’ebé pasa bazeiandu ba kritériu tolu diferente hanesan kritériu Jeral, kompostu husi dokumentu formais aplikante. Diploma abilitasaun literaria, deklarasaun komprovativu husi Suku, kartaun Eleitoral aplikante, kritériu espesifiku, kompostu husi idade minimu aplikante. Alturas aplikante, aptidaun fizika no orijen Nasionalidade no ida seluk kritériu eliminasaun ba aplikante sira. kompostu busi prosesu hitu (7) ne’ebé aplika ba aplikante husi komisaun rekrutamentu F-FDTL 2022.

Depois de komisaun rekrutamentu F-FDTL hala’o teste ba aplikante sira tuir prosesu kritériu tolu (3) ne’ebé iha no hala’o avaliasaun durante fulan ida. Hahu husi 25 Jullu-25 Augustu 2022. 

Rezultadu teste no avaliasaun anunsiu iha loron 6 Setembru 2022. Husi rezultadu ne’e fo sai ba publiku iha kandidatu na’in 600 pasa hodi ba tuir rekrutamentu no treinamentu hodi sai membru militar.

Kandidatu ne’ebé pasa kompostu husi feto hamutuk ema na’in 65 ou 10,5% husi numeru total kandidatu ne’ebé pasa no mane hamutuk ema na’in 535 ou 89,5% husi numeru total kandidatu ne’ebé pasa.

Tanba, rezultadu teste no avaliasaun fo sai ba publiku hamosu preukupasaun lubuk ida husi kandidatu ne’ebé la pasa. Kandidatu barak la satisfas ho rezultadu refere.

Hafoin rona preukupasaun husi kandidatu ne’ebé la pasa no MUSA hola inisiativa hodi afirma pozisaun tuir Artgu 40 Konstitutsaun RDTL haruka konaba liberdade informasun hodi manifesta tuir Artigu 42  konaba liberdade reuniaun no manifestasaun atu komunika ba publiku.

Kandidatu balun la iha diploma Ensinu Sekundariu ou la kompleta kritériu jerél. Maibé, sira bele tuir kritériu espesifiku no kritériu eleminasaun ba aplikante sira no ikus naran sai iha rezultadu avaliasaun teste final.

Kandidatu balun elimina tiha ona iha teste tuir kritériu espesifiku teste saude. Maibé, naran sai iha rezultadu avaliasaun rekrutamentu final la iha. Nune’e mos kandidatu balun elemina tiha. Naran sai iha rezultadu avaliasaun rekrutamentu final ho numeru kandidatu seluk nian.

Tanba ne’e,”ita konsidera kandidatu balun sira submete dokumentu tuir kriteriu ne’ebe iha no rekrutamentu etapa 2020. Maibé, naran sai iha rekrutamentu etapa 2022 no ikus naran sai mos iha rezultadu avaliasaun rekrutamentu final no kandidatu balun kompleta dunik kritériu hotu-hotu. Husi kritériu jeral, espesifiku no kritériu eliminasaun ba aplikante sira. Naran la sai iha rezultadu avaliasaun teste final,”deklara portavoz MUSA.

Husi  faktus ho evidénsia hirak ne’e, MUSA afirma pozisaun ho ninia ezsténsia tuir Artigu 43 Konstituisaun RDTL haruka konaba Liberdade asosiasaun hateten ba povu Maubere tomak. Liu-liu Orgaun kompetente hanesan Prezidente Republika (PR) ne’ebé sai mos hanesan Komandante Supremu Forsa Armada nian, MD hanesan Orgaun Ezekutivu ba Politika F-FDTL, liu-liu Xefe Estadu Maior Jeneral F-FDTL.

Kontra Konsagarasaun Konstituisaun

Exelénsia Tenente Jenerél Domingos Raul ‘Falur Rate Laek’, aktu irregularidade ne’ebé mosu iha rekrutamentu ba militar foun F-FDTL, tinan 2022 kontra ona konsagrasaun numeru 2 husi Artigu 49 Konstituisaun RDTL haruka konaba Defeza Soberania. Tanba, la hala’o servisu militar tuir Lei haruka, inklui kontra mos Artigu 146 Konstituisaun RDTL haruka konaba Forsa Armada. La respeita Orden Konstitusional no la hala’o tuir Lei haruka no rona de’it Orgaun Soberanu kompetente maibé utiliza fali nepotizmu iha prosesu rekrutamentu.

Bazeia ba preukupasaun hirak ne’e, MUSA ho naran Joventude Loriku Asuua’in no povu Maubere tomak, husu ho ezijénsia tomak ba Komandante Supremu Forsa Armada, Exelénsia Prezidente RDTL Dr.Jose Manuel Ramos Horta, ba Exelénsia MD Sr. Filomeno Paixdo de Jesus ho Xefe Estadu Maior Jeneral F-FDTL, Tenente Jeneral Domingos Raul ‘Falur Rate Laek’ atu responde ho lalais no foti medida rigorozu tuir ezijénsia hanesan tuir mai. Husu ba Komandante Supremu Forsa Armada, Exelénsia PR Ramos Horta atu hare kle’an irregularidade hirak ne’ebé dezkonfia akontese iha prosesu rekrutamentu. Tanba, bele hamonu kredibilidade Instituisaun F-FDTL iha Povu Maubere tomak nia matan no hamosu dezkonfiansa ba F-FDTL hanesan liman kro’at povu Maubere.

No husu ba Exelénsia MD Sr. Filomeno atu avalia politika sira iha Instituisaun F-FDTL ne’ebé nakonu ho irregularidade balun.

Liu-liu prosesu rekrutamentu, atu bele hatu’ur di’ak kredibilidade Instituisaun F-FDTL no respeita ba Orden Konstitusional no hala’o tuir Lei haruka no rona de’it Orgaun Soberanu kompetente no fokit sai aktu nepotizmu iha prosesu rekrutamentu.

Husu ba Tenente Jeneral ‘Falur Rate Laek’ atu forma ekipa investigasaun ida, bele husi interna Instituisaun F-FDTL no akompana husi Orgaun Soberanu kompetente atu buka hatene no investiga irregularidade iha prosesu rekrutamentu hodi fo sansaun rigorozu ba membru F-FDTL ne’ebe komete tur Estatutu no Lei Organiza Insutursaun F-FDTL.

Husu mos atu Tenente Jeneral buka tuir militares foun ne’ebé pasa ona iha teste, ne’ebé dezkonfia manan liu husi nepotizmu ou sistema familiarismu.

 Hodi prosesa tuir no karik bele hasai sira nia direitu ba rekrutamentu no treinamentu atu sai membru militar foun.

Kandidatu Prienxe Kriteriu 

Presiza buka tuir kandidatu ne’ebé prienxe kritériu teste no hetan valor di’ak atu rekruta fila-fali karik iha disponibilidade, hodi bele responde interese joventude ne’ebé iha hakarak sai servidor Estadu liu husi sai membru militar.

 Tanba, membru foun ne’ebé ninia antesedénsia istorika iha ligasaun direta ho Indonézia, dezkonfia iha membru foun balun foin fila husi Indonézia hanesan sidadaun Indonézia. Hetan ona identidade tuir administrasaun Timor ninian mezmu seidauk prienxe rekizitu tinan 5 tur Lei haruka.

Atu antesipa aktu hanesan labele akontese iha futuru, husu ba PR ho MD atu hari’i ekipa kontrolu hodi bele hala’o kontrolu ba rekrutamentu bainhira F-FDTL hala’o rekrutamentu ba militante foun.

Hodi nune’e, bele fo oportunidade ba joven Timor oan tomak atu bele sai militar hodi servi nia Estadu tuir interese no espiritu ne’ebé sira bele. Ikus liu MUSA hakarak esklarese ba publiku, objetivu prinsipal husi komunikadu imprensa mosu, tanba ho hakarak atu armoniza nafatin Instituisaun F-FDTL nu’udar Instituisaun transparente ne’ebé durante ne’e hetan konfiansa maximu husi povu Maubere tomak.

Garante nafatin sistema transparente, onestu no justu hodi fo oportunidade hanesan ba joventude Timor oan tomak iha futuru hodi bele hola parte ba Independénsia Nasional, integridade territorial no seguransa esterna liu husi hamahon-an iha Instituisaun F-FDTL. (Merjho)

About dilipost

Check Also

Polisia Eskuadra Kristu Rei Hala’o Servisu Iha ‘Kakuluk Dodok No Sen Fruzen’ Nia Okos

DILI Post-Efetivus Polisia Nasional Timor-Leste (PNTL) hamutuk lima nulu resin lima (55) dadaun ne’e kontinua …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement