Wednesday , January 19 2022

RESPONDE BA ESTUDANTE ISFIT IRMÃO DAVID MARTINS SAIDA MAKA MÉDIA NO SAIDA MAKA IDENTIDADE NAÇIONAL?

Husi: Selfiyano. B. Correia
No telephone/Wa: 082236265396
(Estudante do Instituto Superior de Filosofia Católica Ledalero. Maumere, Flores NTT).
  1. Introdusaun.

               Hau la imagina katak iha mehi nebé maka selvagem, primeira vez hau bele hasoru ema nebé maka hanesan irmão David martins nebé maka halo critica ba hau nia artigo ho conhecimento nebé maka brilhante tebes. Wainhira hau lê sugestao no critica nebé maka irmão David Martins lansa ona iha dia 14 de Outubro 2021. Hau konsidera ida ne’e sai nuudar edukasaun ida mai hau nuudar foin sae ida, atu bele maduro liu tan iha parte escrita. Quanto mais perguntas nebé maka bombastico nuudar elemento ironia. Primeira vez le kosar sai no hakarak atu lakon husi mundo intelectualidade ida ne’e. Maske bele hatete katak ita boot nia argumento ne so hakarak atu halo questiona barak buat nebe maka prática iha texto nia laran do que tau matan buat nebé maka compreensivo hodi hamosu crítica nebé maka específico iha escrita nia laran, hodi sai nudar materia nebé maka presija atu tau matan no refleta hamutuk. Ita boot nia observasaun inutil, tamba ho conhecimento nebé maka boot maibe so gosta atu questiona ba buat prática nebé sei akontese ba escritor nebé deit. Gosta liu atu halimar ho liafuan do que tau matan bá esperiensia real ida ne’ebe importante liu, atu ita nuudar cidadão ida nebé iha interese comum hodi consiente no tau matan bá papel da média nebé maka divulga ona informasaun barak konaba condiҫão no situasaun iha ita nia país.

            Ida ne’e maka babain ema dehan dalaruma buat nebé maka nia expressa sai, bele mos liu husi esperiensia rasik, hanesan irmão David nia liafuan capaz nebe hatete katak“uma montanha pariu um rato” katak belun david nia espirito crítico ás teb-tebes maibe atu hahoris deit ideia nebé mak construtivo kiik ida mos la sai. Ho liafuan seluk crítica husi ita irmão David nia ideia ne’e hanesan feto nebé maka estéril (mandul). Tamba ne’e belun serve atu halo comparasaun ho Jokpin (Joko Pinorbo) nia liafuan nebe hatete katak “O tempo em que damos a nascer frases estéreis’. Significa katak tempu to’o ona atu irmão David bele hahoris fila-fali ideia nebé maka iha valor no construtivo ba ema seluk. Tamba durante ne’e irmão David sei estéril (mandul) hela ho arogansia. Maibé ho habilidade nebé maka hau iha koko atu hatan ba perguntas bo’ot husi irmão David konaba “SAIDA MAKA MÉDIA NO SAIDA MAKA IDENTIDADE NAÇIONAL?

  1.  Saida maka média?
  2. Hau hanoin katak irmão David moris ona ho diçionario iha tinan barak maibé irmão sei toba no falta hela conhecimento barak konabá saida maka média. Irmão bele loke iha diçionario português ensino português no estrangeiro iha página 428 atu irmão bele hatene diak liu tan significado husi média nebe maka profundo. Iha diçionario portuguesa fo esplikasaun barak no halo relasaun ba saida maka hanaran “média (me.di:a) 1. quociente da divisão da soma dos valores considerados pelos numeros deles 2. valor que obtem dividindo soma de todas as notas pelo numero de disciplinar. n.mpl. meios de comunicação social. Em media por volta de; aproximadamente. Tamba ne’e atu hatete deit katak irmão David wainhira estuda konaba língua ida lalikan atu mate deit ho liafuan ida, maibé koko atu curiozu hodi buka significado seluk husi liafuan nebé maka irmão estuda. Exemplo seluk tan husi liafuan portuguesa konaba bonita, iha liafuan sinonimo seluk ne’ebe maka representa liafuan bonita ne’e  rasik hanesan; bela, linda, formosa, etc.
  3. Iha razaun seluk tan nebé maka hau presija esplika ba irmão David katak; hau hakerek ne’e nudar estudante nebe maka eskola iha Indonezia nebé hau bele hatene uitoan katak língua cientifico (bahasa ilmiah) indonezia, mos sei impresta liafuan barak mos husi lian inglesa ho portuguesa ex (kolega, tempo, media nst), iha indonezia significado husi liafuan “media” ema uza hodi koalia kona mos bá “meios de comunicação”. Iha esplikasaun seluk ho língua indonezia “media adalah alat untuk menyampaikan pesan dan informasi”. Dalaruma durante ne’e,  irmão foca liu ba lingua portuguesa, wainhira hau hakerek konabá média halo ita irmão sai confundi liu tan konabá saida maka média? Tamba ne’e atu deklara deit katak maske hau hakerek ho lingua tetum portuguesa maibé sei afeita mos ho língua indonezia. Karik irmão halo perguntas tambasa lakoi hakerek deit ho lingua Indonesia? Hau mos sei hamosu perguntas tambasa irmão mos lakohi hakerek ho língua Tetun terik nebé nuudar lian inan Timor nian? maske ita hatene katak língua portuguesa nuudar lian official ida, maibe Timor-leste mos nudar nasaun república nebé maka la ses án mos liu husi diversidade da lingua. Atu lian dialetus ou lian nebe maka impresta husi rai liur hanesan; lingua portuguesa, inglesa no Indonesia nebé maka Timoroan barak sei uja hodi prática iha moris lor-loron. Hanesan mos exemplo husi irmão nia lian Indonesia iha escrita nebé hakerek fila-fila konabá (kacang lupa kulit ou hau merasa bangga).
  4. Iha mos KBBI (Kamus Besar Indonesia) me-dia/média/ n 1 alat; 2 alat (sarana) komunikasi seperti koran, majalah, radio, televisi, film, poster, dan spanduk; 3 yang terletak di antara dua pihak (orang, golongan dan sebagainya) wayang dipakai sebagai pendidikan; 4 perantara; penghubung; dan lain sebagainya.
  5. Karik irmão sei confunsaun, ida ne’e sai perguntas boot bá irmão nia prezensa nuudar escritor filosofia ida. Tamba filosofia signifika hadomi ba sabedoria, intelectualidade no ciência. Nudar ema nebé maka hadomi bá sabedoria no ciência ita mos presija atu estuda ciência hotu-hotu, nebé maka iha ciência nia laran hamosu mos lingua bar-barak iha neba. Hodi hatan ba Teoria husi filosofo sira nebé husi fatin no lingua nebé maka la hanesan. Hanesan iha Socrates nia liafuan dehan “Filosofia é a sabedoria de todas as ciência”.
  6. Konaba irmão nia esplikasaun termo foun husi Platao ou Aristoteles nebé relata konabá saida maka média tuir data nebé maka ita boot hetan. Ita boot bele lê artigo husi Nathan Dufour nebé maka publika husi Maman Suratman ne’ebe maka relata konabá média iha perspetivo Filosofia nian hanesan “Ketika Para Filsuf Bermedia Social”. Nebé iha nia conteudo hakerek konaba “Woul Plato tweet? The ancient Greek guide to social media. Atu irmão David bele hatene liu tan, oinsa filosofo sira iha tempo grega antiga sira trata konaba média social. Iha mos filosofo pra-Socrates hanesan Xenophanes nebé maka koalia iha contexto nebé maka hanesan. Irmão bele ativo liu husi link nebe hau trasa iha referensia.
  7. Maibe hau respeito nafatin ba irmão nebé maka soe ona tempu hodi responde ba hau nia opiniaun. Cem por cento hau aseita no respeito nafatin ho irmão nia argumento iha contexto língua portuguesa nian, hodi clarifika lolos título nebé maka hau pública ona tuir irmão David nia ponto de vista. Hau sente esperiensia ida ne’e karun no importante teb-tebes, tamba ho idealismo rua nebé maka diferente bele kompleta malu diak liu tan. 
  1. Clarifica ba crítica seluk nebe maka relasiona ho média.

            Primeiro, perguntas husi irmao David “sera que GMNTV, RDTL, TVE, DILI.POST.COM, TIMOR POST, etc sai impacto ba identidade nacional ? Perguntas nebé maka furak teb-tebes. Atu halo análogia simples deit katak irmão nia perguntas hanesan ne’e hanesan  “feto raan nebé maka koko atu atrai hau hodi monu ba laços primordiais”. Antes atu resposta, hau hakarak deklara deit katak irmão David maka hamosu rasik ambiguo iha texto nia laran e depois irmão rasik maka halo interpretasaun ba texto nebé maka hau hakerek, ikus mai irmão rasik maka confusaun hodi halo perguntas.

            Hau espera katak antes irmão halo crítica bá opiniaun ida ne’e, irmão mos lê hotu ona hodi consiente no hatene ona objetivo husi saida maka hau hakerek. Com certeza irmão mos hatene ona konabá contexto saida maka iha texto nia laran. Maibé hau considera katak perguntas husi irmão ne’e nudar perguntas nebé maka pleonasmo tamba irmão hatene ona objetivo husi saida maka hau relata, maibe sei koko atu hamosu fila-fali perguntas. Dalaruma liafuan ne’e presija fo fila fali ba irmão nebé maka hatete katak; ema matan diak ida maibe choque fali moru tan kakutak la lao ou la joga”;  Maibé  ho cinceriedade koko hodi halo esplikasaun nafatin  atu irmão David bele satisfaz hodi bele toba mos hakmatek ho irmão nia confusão nebé maka indígna.

            Dala ida declara bá irmão David karak, iha título nebe maka hau publika ona dalaruma abstratu liu. Tamba ne’e ba ema nebe maka le deit iha nia título bele confunfusaun no hanoin katak Media hanesan GMNTV, RDTL, TVE, DILI.POST.COM, TIMOR POST, maka sai impacto ba identidade nacional Timor-Leste. Maibe iha kedas introdusaun hau fo esplikasaun direitamente katak “Liu husi publikasaun ida ne’e ho objetivo hakarak relata oituan konaba “média husi rai liu-liu iha indonezia” ne’ebe maka fo interpretasaun barak konaba condisaun iha Timor-Leste. No ida ne’e importante tebes mai ita, atu ita nuudar cidadão ida sempre iha interese comum hodi consiente no tau matan ba papel da media nebé maka divulga ona informasaun barak konabá condiҫão no situasaun iha ita nia país”. Tamba ne’e objetivo husi opiniaun ida ne’e laos dun katak media husi Timor-Leste sai impacto ba identidade Timor, maibe media husi Indonezia.

            Segundo, irmão questiona ba buat tolu deit nebe maka hau acesso iha Youtube nebe ho titulo “Jadi negara termiskin, Cadangan minyak kering, Timor-Leste menjadi negara Termiskin di Asia tenggara ho tan “Timor-Leste menyesal Merdeka dari Indonesia”. Irmão David hatete katak ida ne’e “caso tolu oan deit”. Hau sente belun David dalaruma crítica bá opiniaun ne’e iha condisaun ansi án demais. Nebe maka hatudu momos katak irmão David sei falta hela ba informasaun barak liu. Tema tolu nebé maka hau questiona reprezenta informasaun lubun nebé maka ema pública ona iha media indonezia nian. Tamba ne’e belun uza didiak média ou meios comunicação hodi buka took informasaun hirak ne’e tamba sei iha notifikasaun husi video lubun nebé maka sei fo informasaun hodi loke didiak belun nia hanoin no consiencia. Lalikan assisti deit belun nia avo Apati nia video iha tiktok, maibe koko atu sai husi zona titokers hodi buka tuir informasaun hirak ne’e. Pior liu tan maka belun David hatete katak “caso kiik oan hanesan ne’e laos buat boot ida tamba nia relasaun ho meios comunicasaun ne’e buat kiik oan ida nebe linguagem ema jornalista sira nian hanaran fake news, hoaks ou informasaun falsa”. Atu hatete deit katak irmão nia liafuan ne’e nakonu ho arogansia nebé maka halai ses dok husi responsabilidade nuudar cidadão Timor nian. Quanto mais irmão hatete katak “ne hanesan buat kiik oan ida iha liurai feto nia uma liur, nebé la fo oituan influensia ba liu rai feto nia identidade”. Husi liafuan nuudar imagem ida ba irmão David hanesan escritor filosofia ida maibe pensamento klot no consiencia errada. Irmão hanaran Rai Timor ho naran nebé maka furak “Lurai feto” ida maibe na realidade hahalok hanesan traidor. Irmão David hanesan princesa baruk-teen, nebé maka gosta dansa iha uma laran; ho liafuan seluk  princesa nebé maka hatene han bosu deit maibe lahatene atu halo buat ida “cadavel vivo”

            Atu haktuir deit katak “uma nebé qualidade no furak ema sempre halo observasaun primeiro husi nia liur laos nia laran”. Tamba ne’e irmão David dehan informasaun konabá condisaun husi rai liur ne’e problema ne’ebe kiik ida, saugati deit wainhira irmão koalia as konaba comunicação social maibe iha pratika “nihil” zero porcento.  Tamba iha mundo digital ohin loron, fasil atu ema uza oportunidade hodi ataca ita ho maneira nebe maka oi-oin. Tamba ataca ho média nuudar assasinato nebé maka abstrato. Irmão koalia dehan impacto kiik, karik loron ida irmão mai took iha indonezia hodi halo observasaun oinsa ema Indonezia sira nia pensamento konabá Timor-Leste iha ohin loron. Tamba ne’e objetivo husi primeira publikasaun nebé maka hau toca ona, nuudar estudante ida ne’ebe conciente katak informasaun hirak ne’e sai impacto teb-tebes ba rai Timor. Tamba ne’e, hau koko hamoris inisiativo ida hodi halo opiniaun no fo sugestaun ida atu  governo no estado Timor Leste bele fo prioridade no tau matan liu tan bá identidade nacional Timor-Leste nian. Atu governo no estado hamutuk ho povu bele hadia sistema nebé maka diak liu tan iha parte religião, politica, economia, cultura, lingua nomos diversidade sira seluk tan. Atu desenvolvimento hirak ne’e bele sai nudar resposta ida ba média nebé maka hato’o ona informasaun barak ho interpretasaun negativo no publica fraqueza Timor nian iha média. Chave husi hau nia escrita maka oinsa governo no estado fo resposta bá media iha rai liur ho maneira hari sistema no halo desenvolvimento diak liu tan iha Timor-Leste. la significa tem que halo agresaun no ódio vingansa ba media husi rai liur, maibe oinsa husi esperiensia hirak ne’e, ita estuda hodi sai cidadaun no governo nebé iha responsabilidade liu tan hodi hadia ita nia nasaun. Tamba ne’e, “karik hau nia pozisaun mak iha irmão David nia fatin;  nuudar Timor oan hau arrepende no moe teb-tebes, tamba iha maluk ne’ebe maka esforsu hodi hamosu opiniaun, atu ita bele tau matan hamutuk konaba ba média husi rai liur nebé maka ameasa dadaun. Maibe irmão nia prezensa nuudar destroidor ida nebé maka koko atu loke fatin diskusaun nebé maka lai ha valor bá bem comum. 

  1. Saida maka Identidade Nacional?

                   Primeiro, uluk nanain hau apresia tebes ho irmão David nebé maka toca ona konaba saida maka identidade nacional? Nebe foti referensia livro neen (6) husi sua ex. Nicolau Lobato, sua ex. Sr. Kayrala Xanana Gusmao, Bispo Belo nst.  Nebe irmão uza nuudar referensia fundamento básico ida hodi halo relata konaba significado husi identidade nacional. Iha neba irmao hatete katak tuir referensia nebé maka irmão lê husi livro neen (6) ne’e, irmão la hetan Identidade nacional so hetan deit maka libertação nacional, unidade nacional, desenvolvimento nacional, simbolo nacional, bandeira nacional. Hau nia perguntas maka ne’e “será que libertacao nacional, unidade nacional, interese nacional, desenvolvimento nacional no bandeira nacional laos parte ida husi identidade nacional nasaun ninian? Irmão foti metodologia husi língua barak konaba saida maka identidade husi liafuan inglesa to francesa uitoan tan bele halai to liafuan arabia, maibe irmão rasik la komprende ba saida maka irmão hakerek. Iha termo portuguesa “a palavra identidade vem da lingua inglesa, que tem um sentido literal; característica, sinal/simbolu ou identidade ligada com uma pessoa, grupo ou coisas que o distingue de outros. A palavra nacional refere ao conceito de nacionalidade”. hau hakarak halo comparasaun kiik ida; wainhira irmão ba halo discurso ruma iha rai liur irmão David lori bandeira nacional Timor Leste sai nuudar sinal ou simbolu hodi representa Timor-nia naran, será que bandeira nacional ne’e laos sai identidade nacional Timor Leste?hanesan irmão rasik maka esplika katak “identidade ne’e nudar qualidade de identico; conjunto dos elementos que permitem saber quem pessoa e”. Bandeira nacional mos nuudar qualidade de identico ida husi nasaun ida-idak, ne’ebe maka sai nudar ida hodi reprezenta nasaun nia naran. Parte ida ne’e, iha mos buat lima nebé maka irmão toca ona iha leten, nebé maka hatudu katak nasaun ida-idak iha nia característica identidade rasik nebé maka diferente ho nasaun sira seluk. Comparasaun seluk tan hanesan “Libertasaun Nacional”, atu hatudu katak iha libertasaun nia laran ita nia rain iha nia história rasik konaba luta, nebé maka relasiona ho data ou akontesimento iha lutasaun nia laran. Parte husi historia nacional ida ne’e sai nuudar ita nia identidade nacional rasik konaba libertasaun, signifika katak historia nebé ita luta diferensa husi historia libertasaun nasaun sira seluk nebe maka hanaran identidade nacional ou liafuan indonezia (ciri khas) husi nasaun ninian. Maske iha livro neen (6) nia laran, la relata konaba identidade nacional maibe elemento hirak ne’e reprezenta ona identidade nacional Timor ninian. Tamba ne’e irmão tem que iha conceito “metáfora”, hodi bele analisa didiak ba referensia ou ba buat nebe maka irmão lê ona. Maibe hau fo apresia nafatin katak iha parte escrita irmaão nia referensia fundamentos no profundo teb-tebes konaba identidade nacional. Maske irmão la halo reflesaun didiak bá saida maka ita boot hakerek, maibe irmão so tau tomak deit no obriga atu ema seluk bele komprende.

            Segundo, hau hakarak fo imagen badak konaba identidade nacional nebé relasiona ho (IT), (IE), no (IN). Identidade nacional nasaun nian hanesan buat comum ou termo boot nebé maka iha nia laran inclui mos elemento hanesan artigo ou constituisaun nebé maka hari husi nasaun rasik.  iha identidade nacional nia laran representa husi artigo ou constitusaun barak husi nasaun ninian, nebé maka sai nudar característica nebé maka diferensa no único husi nasaun sira seluk. Parte ida mos maka hanesan irmão nia esplikasaun nebé maka furak no profundo konaba buat nebe maka identíco hanesan; Identidade Timorense (IT), identidade do Estado (IE) no Identidade Nacional (IN). Tamba ne’e irmao lê hodi buka identidade nacional iha (IE), (IT) no (IN), hau sente ida ne’e so irmão rasik maka bele halo constituisaun no artigo foun maka bele. Maibe la significa katak saida maka irmão relata konaba ba buat tolu ne errado, hau considera conteudo husi buat tolu ne’e verdade no la presija atu halo diskusaun, tamba irmão hakerek kompletu ona konaba constituisau, artigo no elementos nebé maka brilhante teb-tebes.

            Terceiro, será que media la sai impacto ba (IT), (IE), (IN)?

  • hanesan irmão David nia esplikasaun katak iha parte identidade Timorense no Identidade buat nebe maka hau toca ona konaba media husi rai liur la sai impacto boot bá identidade nacional tamba fake news, hoaks ka informasaun falsa, nebé  nuudar foer kiik nebé bele dasa lakon tiha no haluha lakon tiha. Irmão David mos relata katak buat nebé sai impacto boot maka exemplo; halo mesa parlamento rahun, koalia lian portugues ulun ain sae, ukun illegal, asalto poder, furador da constituisaun, nst. Hau sente irmão salah paradeiro loos. Irmão nia esplikasaun ne koalia koanaba problema nebé maka interior (problema nebe maka iha nasaun laran). Wainhira irmão lê didiak hau nia opiniaun iha primeiro publikasaun koalia momos konaba ba média nebé impacto husi liur, oinsa ema indonezia sira hato’o informasaun falsa konaba kondisaun Timor. Hanesan iha introdusaun haktuir katak “Liu husi publikasaun ida ne’e ho objetivo hakarak relata uitoan konaba média husi rai liu-liu iha indonezia ne’ebe maka fo interpretasaun barak konaba condisaun iha Timor-Leste. Ida ne’e importante tebes mai ita, atu ita nudar cidadão ida sempre iha interese comum hodi consiente no tau matan ba papel da média nebé maka divulga ona informasaun barak konaba condiҫão no situasaun iha ita nia país.

            Quarto, Iha perspectiva seluk hau hakarak halo esplikasaun konaba média sai impacto bá identidade nacional liu-liu iha parte (IT), (IE), (IN). 

  • Parte positivo postivo; iha libertasaun da pátria nia laran, ita labele nega katak iha jornalista barak husi rai liur nebé maka fo contribuisaun, ajuda halo informasaun barak hodi publika iha média konaba iha situasaun funu nia laran entre invasores indonezia tama mai iha Timor to’o hetan libertasaun. Jornalista sira ne’e maka hanesan “Max Stahl, husi nasaun Inglatera nomos jornalista nain lima (5) ho naran; Brian Peters, Malcolm Rennie, Greg Shackleton, Tony Stewart no Gary Cunningham. Jornalista nain lima (5) ne’e maka iha loron 16 de Outubro 1975 hetan oho husi forsa husi Indonesia (TNI) iha Balibo. Iha mos jornalista seluk tan nebé maka fo contribuisaun boot teb-tebes. Jornalista hirak ne’e maka publika informasaun hodi mundo consiente, nebé ikus mai, nasaun barak mos fo apoio hodi halo manifestasaun konaba tragedia ne’ebe maka akontese iha Timor-Leste nian. Ikus mai testemunha hirak nee to’o duni iha ONU (Organizasaun Nações Unidas), hodi hare katak buat nebe maka invasores indonezia sira halo ba povu Timor-Leste contra lei direitos humanos.
  • Iha média seluk tan nebé maka foca informasaun barak konaba, oinsa Igreja mos iha tempo colonial, iha religioso/a barak nebé maka dedika sira nia-an, envolve hodi haklaken espírito fiar nian ba sarani católica sira, hodi tau nafatin esperansa no fo prioridade katak ho fiar católica nian sei lori povu ba hetan libertasaun. Ita mos bele hare contribuisaun husi media hodi hato’o informasaun iha 12 de Novembro 1991 (tragedia Massacre St. Cruz), nebé maka jornalista barak ho barani akompanha informasaun hirak ne’e. Maske ita asiste iha média, jornalista barak hetan baku husi milísia ate balun hetan oho; maibe ho sira nia contribuição liu husi média mos maka ema husi nasaun seluk bele hatene katak Timor-Leste ho populasaun catolica 99%.
  • Iha tempo ohin loron, media sai promosaun ba ita nia religião, politika, cultura, economia nomos desenvolvimento seluk tan iha rai laran. Liu husi media mos ajuda Timoroan maka expresa sira nia talento nebe maka hatudo katak Timor mos ativo diak ona iha mundo digitalizasaun. Exemplo; Timor mos agora iha ona transmissao rasik hanesan GMNTV, RDTL, TVE, DILI.POST.COM, TIMOR POST, etc. Timoroan barak mos maka uza media nudar fatin hodi expressa sira nia intelectualidade. “Hanesan mos irmão David nebé maka gosta hakerek barak hodi publika iha Dili.Post, Timor Post, STL news nst. Maske irmão rasik la consiente katak husi media ajuda ona irmão hodi publica ona escrita nebe maka furak. Tamba ne’e irmao dehan media la sai impacto fali ba identidade nacional Timor nian ne’e, irmão ne’e moris ona iha tempo globalizasaun maibe irmão nia pensamento sei clasico(kuno).
  • Parte impacto negativo, iha parte ida ne’e hau hakarak hakerek facto nebé maka iha primeira publicasaun konaba impacto husi media indonezia nebé maka tuir hau nia analisa katak informasaun ne’e sai nudar informasaun falsas (fake news), nebé maka objetivo atu provoca no hafoer Timor nia naran. Iha contexto ida ne’e, hau mos sei hatudu facto balun husi media nebé maka ema Indonezia sira publika ona, nebé maka iha relasaun mos ho Identidade Timorense (IT), identidade do Estado (IE) no Identidade Nacional (IN).  Actualmente viral dadaun iha redes sociais no pública ona Informasaun konaba situasaun iha Timor-leste nebé maka divulga ona ho língua indonezia liu husi youtube ho título ne’be maka bombástico. (Kondisi Timor-Leste 22 tahun pisah dari Indonesia, Kesombongan Pemimpin Timor-Leste, Merindukan sang Mantan, Secara illegal rakyat Timor-leste masuk Indonesia, Singapura melarang Timor-Leste bergabung dengan Asia, Kasian Timor-Leste, Alasan cerdas lepas dari Tim-Tim, Keadaan makin krisis hidup rakyat Timor-Leste makin begini).Titulo hirak ne’e representa informasaun barak liu tan nebé maka ita bele asiste iha youtube, google, twiter no instagram.  Hau sugere ba irmão David atu bele hare tan video seluk nebé maka iha relasaun no Identidade Timorense (IT), identidade do Estado (IE) no Identidade Nacional (IN).  Laos atu asiste liu husi video deit maibe bele lê iha comentario oinsa ema husi rai liur halo flabemias iha coluna comentario konaba Timor.

            Quinto, iha conclusaun irmão David taka ho filosofo Leibniz nia teoria, nebé maka irmão haktuir katak; iha identidade nacional ne’e hanesan unidade ida no iha unidade nia laran iha monada rua, nebé maka irmão uza hodi halo sasukat ba identidade Timorense no identidade do Estado. Atu hatete katak Leibniz nia teoria nudar “verdade absoluta” ida. Tamba ne’e desizaun husi Leibniz konaba identidade nudar desizaun nebé maka absoluta. Husi escrita ne’e hatudu momos katak  irmão laos estuda ba Leibniz nia teoria maibe halo idolatria ba Leibniz nia teoria.  Irmão considera teoria ne’e nudar “Deus para todo conhecimento”. Tamba ne’e ita boot laos estuda konaba filosofia maibe sai escravos ba filosofia. 

  1. DAVID MARTINS, O PARANÓICO.

            Finalmente, iha contexto debate ida ne’e, hahu husi irmão David Martins nia primeira escrita to conclusaun hau esforso ona hodi bele hetan Sophos (Sabedoria) ho liafuan seluk “Efforts to Reach Wisdom” iha escrita nia laran. Maibe ba hau so bele hetan escrita nebé maka furak maibe mensagem nebé maka la iha moral. Iha debate nia laran hau so bele sente “ argumento ad hominem” bele dehan mos (ataque pesoal). Dalaruma irmão David hakerek ho kondisaun emocional ou lanu nia laran, deskulpa karik hau dehan hanesan ne’e. Tamba hau so hetan liafuan estranho maka barak do que atu fo sugestao ou crítica nebé maka construtivo. Atu hatete deit katak ema tanis door ida maka le irmão nia kritika nia tanis kedas. Tanis laos tamba escrita ne’e diak maibe tamba conteudo husi escrita hanesan feto nebé maka rakut malu.Tamba ne’e atu hatete deit katak irmão David ne’e agora iha condisaun Paranóia nia laran do que Parrhesiast nebé maka haktuir husi Focault. Tamba ne’e hau maka presija tem que komprende barak ba Irmão David hodi fo apresia iha parte ética no epistemológico. 

            Iha parte seluk hau bele dehan belun David ne’e nudar agente sumidade no foin sae nebe maka maduro iha parte crítica nian. Na realidade irmão David consegue esforso ona hodi halakon ona conhecimento nebé maka contradisaun iha média liu-liu ba crítica konaba informasaun nebé maka hau toca ona.  Hau bele dehan katak irmão David ne’e nudar gerasaun foun nebé sai nudar alicerce basico ba ita nia nasaun atu ita bele firme nafatin hodi protégé ideología nebé maka destrutivas. Irmão David serve atu tama iha categoria ida ne’e, tamba gosta atu duni tuir hodi halo crítica ba buat nebé maka prítica do que relasiona ho bem comumMaske sei sai mos perguntas ida será que irmão nia conhecimnto so atu buka tuir deit salah husi liafuan media hodi critica ho esplikasaun nebe maka hiperbola? Quanto mais halo analógia nebé maka belun trasa mensagem nebé maka la iha valor moral. Husi irmão nia crítica hau so bele hetan ideologia proseletísmo no apologética hanesan feto menstruasaun nebé maka estranha. Hau bele simu no rai didiak ita boot nia sugestaun konaba liafuan média nebé maka contrário ho nia conteudo, maske hau nia objetivo ne’e bele dehan loos, tamba hakarak koalia konaba meios de comunikasaun husi rai liur ou liafuan media nebé maka irmão corige ona nebé maka sai impacto ba ita nia identidade nasaun nian. Quanto mais wainhira ita boot halo comparasaun tama to belun nia avo Apati, halo hau confunsaun boot hodi hanoin katak “ema ne’e escritor filosofia ou tiktokers nebé maka viçio ba liafuan nebé maka laiha vantagen.

            Atu dehan deit katak ita boot iha espírito intelectualidade maka boot teb-tebe, maibe ita boot nia maneira responde hanesan iha vingansa (dendam) nebé maka la fo imagen nebé maka diak nudar ema filosofia ida, buat nebe maka hau hetan nudar agressivo intelectualidade nebé laiha ética. Hau hakfodak wainhira lê irmão nia crítica konaba hau nia artigo, atu hatete deit irmão bele “relax” hodi hakerek ho língua nebé maka cientifico atu hau bele komprende no satisfeito. Tamba língua nebé maka irmão toca ona la saudavel ba ema seluk. irmão so bele pasa espírito nebé maka negativo ba ema seluk liu husi irmão nia escrita. Karik irmão halo perguntas atu hau bele deklara factos saida maka hatudu katak liu husi irmão nia escrita fo mensagem nebe maka laiha moral. Hau sugere irmão atu bele le fila fali ba irmão nia artigo, no wainhira sei la hetan nafatin maka irmão parte husi ema nebé maka consiencia mate.

            Hau sugere belun atu diak liu la lika tan uza análogia ou liafuan metáfora hanesan ne’e, hau sei kontente se wainhira irmão fo comparasaun ho língua nebé maka científico atu hau mos bele estuda husi buat nebé maka irmão expressa, selae ita hare hanesan crianças nebé maka halimar brinquedos.  Critica ne’e só fo afeita hodi hamosu ambiente nebé maka la saudavel iha diskusaun nia laran. Quanto mais ita boot hakerek iha média ho liafuan nebé maka babain labarik kikoan sira uza lor-loron hodi goja malu. Ikus liu ida ne’e hanesan sugestão kiik ida ba irmão David. Maibe hau mos agradese no respeito nafatin, tamba husi irmão nia crítica hau bele estuda no hadia tan buat barak iha parte escrita.

  • Fontes:

Mauludi, Sahrul. Socrates Inspirasi dan Pencerahan Untuk Hidup Lebih Bermakna. Jakarta:                     Penrbit: PT Elex Media komputindo, 2016.

Kebung, Konrad. Filsafat Itu Indah. Jakarta: Penerbit: Prestasi Pustaka, 2008.

Poto Editora, Dicionário Português Ensino Português no Estrangeiro. Portugal, 2011.

Suratman, Maman. Ketika Para Filsuf Bermedia Sosial. Ed. Nathan Dufour. 15 de Outubro 2021 https://nalarpolitik.com/ketika-para-filsuf-bermedia-sosial.

Carvalho Reis, Joana. “Timor foi o primeiro país a ganhar a independência através dos meios audiovisuais. 20 de fevreiro, 2019 <https://www.tsf.pt/sociedade/timor-foi-o-primeiro-pais-a-ganhar-a-independência-atraves-dos-meios-audiovisuais-10597887.html.>

Tysara, laudia. Media adalah alat untuk menyampaikan Pesan dan Informasi, Ketahui Jenis-Jenisnya. 27 de janeiro 2021 http://m.liputan6.com/hot/read/4467850/media-adalah-alat-untuk-menyampaikan-pesan-dan-informasi-ketahui-jenis-jenisnya?utm_source=Mobile&utm_medium=whatsapp&utm_campaign=Share_Top.

CMS (NB): KBBI Daring, s. v.”kamus”, asesu iha 17 de Outubro 2021, https://kbbi.kemdikbud.go.id/entri/media.

About dilipost

Check Also

VALORES CRISTÃOS VS DEMOCRACIA: DEFESA DE HONRA BÁ CRÍTICA HUSI BELUN AGOSTO POTO HO DAVID MARTINS

    Husi António Octaviano Marcelo da CunhaNo. Telefone: +6282119450575(Estudante do Instituto Superior de Filosofia Católica …

Leave a Reply

Your email address will not be published. Required fields are marked *