Tuesday , January 18 2022

RESPOSTA CRÍTICA BÁ ARTIGO HUSI ESTUDANTE ISFIT ‘AGOSTO POTO’ HO TEMA “OINSA VALORES CRISTÃOS BELE SAI BASE BÁ DEMOCRACIA”

Husi
Antonio Octaviano Marcelo da Cunha
No. Telefone: +6282119450575
(Estudante do Instituto Superior de Filosofia Católica Led
alero, Maumere, Flores-NTT)

Introdusaun

Artigo husi estudanteISFITAgosto Poto’ nuudar escritor, nebé publika iha mídia Instituto Superior de Filosofia e de Teologia, D. Jaime Garcia Goulart iha dia 24 de setembru 2021. Pessoalmente, tuir hau nia perspetivo artigo ida ne’e hatudu característica da mentalidade husi escritor katak, escritor la konsidera no valoriza pluralismo e indireitamente halo deskriminasaun ba relijiaun sira seluk.

Iha artigo ne’e escritor koko halo tese no anti-tese ida konabá realidade da incerteza Política relasiona ho aktus husi lideransa sira e no fim escritor halo reduksaun bá valores cristãos no foti valores cristãos sai hanesan solusaun ida nebé escritor konsidera hanesan dalan ida hodi bele atinge questão sira hanesan, ignorância, egoismo, discriminação, injustiça, no interesse pessoal ka grupo. Wainhira hau koko haklean artigo ida ne’e, ikus mai mosu pergunta barak iha hau nia kakutak nebé la fasil mai hau hodi komprende konabá essência da verdade husi artigo ida ne’e.

 Pergunta fundamental mak ne’e, oinsá bele hatama valores cristãos iha prática da sistema democracia maibé nasaun Timor Leste forma husi sociedade plural e relijiau oi-oin? Será que democracia ne’e sarani católica mesak nian deit ou povu Timor Leste hotu nian?  Permite ka lae enquantu subtansia da relijiaun kahur ho subtansia política iha nasaun Timor Leste nebé adopta sistema democracia?  Verdade ne’e atu bá los relijiaun nebé, enquanto ita foti valores da relijiaun ida hodi sai base bá demokrasia? Justiça e igualdade ne’e atu hatur iha nebé waihira ita la valoriza no konsidera mos existencia relijiaun sira seluk?  Timor Leste ne’e nasaun democracia ou nasaun Teokrasia?

Pergunta sira ne’e motiva hau hodi halo resposta crítica ida bá belun Agosto Poto nia artigo nebé tuir hau nia perspetivo escritor koalian konabá questão ignorância, egoismo, discriminação, injustiça, interesse pessoál ka grupo maibé indreitamente escritor la konsiente katak nia rasik pratíca hela questão sira ne’e.

Síntese Simples Konabá Artigo husi  Escritor

Agosto Poto hakerek nia artigo ho tema “Oinsa valores cristãos bele sai base bá Democracia” iha artigo ne’e escritor halo nia anti-tese ida dehan katak “Lider sira konsidera poder hanesan objeto oan ida, ou seja, hanesan loloos sasán oan ida, nebé ema bele fo husi liman ba liman de’it.” Belun Agostu kontinua hakerek dehan hanesan ne’e “Aat liu tan hamosu conceito sira babain ita rona “assalta poder ka hadau ukun”, hamlaha no hamrok bá poder ka ambição bá poder.”

 Iha arugmentu ida ne’e, escritor koko hodi hatur nia racionalismo crítico nebé nia rasik konsidera katak nia suposião ne’e rasional no mos aserta ho realidade nebé akontese iha rai doben Timor Leste.

Husi problema sira nebé akontese iha rai doben Timor Leste, ikus mai escritor hakarak halo reduksaun bá valores cristãos, hanesan princípio valores cristão nian ka virtudes cristãos sira, hodi hatama iha pratíca no sai base bá Democracia nebé escritor konsidera katak valores cristãos bele tane as principio moral, no haburas consciência moral hodi bele atinge questão ignorância, egoismo, discriminação, injustiça, interesse pessoal ka grupo.

Tamba ne’e escritor afirma iha artigo dehan katak: “basea bá tema nebé hau menciona ona iha leten katak oinsá valores cristãos bele sai base bá Democracia; hau hakarak lori ita boot sira bá hare hamutuk oinsa ita hatama valores cristãos iha Democracia nia laran.

Atu nune’e, buat nebé sobresai iha ita nia Democracia mak valores cristãos ita bele hare iha prática nai ulun sira nian….” Frase ida ne’e halo hau senti laran makili no lori hau bá imajinasaun comparativa ida nebé fasil liu mai hau atu bele identífika escritor hanesan ema matan diak ida nebé mak soke moru do que ema matan delek ida mak soke fali moru.

Basá waihira ema matan delek ida soke moru ne’e buat babain ida, maibé waihira ema matan diak ida mak soke moru ne’e quer dizer nia kakutak la la’o ou ao mesmo tempu la’o ho kondisaun dukur ou nia existencia hela iha inconsciéncia. Escritor iha nia Artigo fahe ba parte rua:  primeira parte, koalia konabá SENTIDO NO IMPLEMENTAÇÃO HUSI DEMOCRACIA, no segunda parte koalia konabá VALORES CRISTÃOS IHA DEMOCRACIA.

 Iha parte ida, hau pessoalmente aprecia artigo ne’e, tamba escritor koko hodi halo reflesaun konabá problema nebé akontese dadauk iha ita nia rai doben Timor Leste, no ikus mai escritor hakarak hafanu fila fali konsensia moral lider ka ukun nain sira nian hodi bele presta liu sira nia atensaun bá povu kiik nia moris, tane aas valores da democracia no hametin unidade e fraternidade.

Maibé iha parte seluk, wainhira hau koko halo análise nebé klean bá belun Agosto Poto nia opiniaun, hau enfrenta realidade rua nebé mosu contradição, primeiro escritor presta liu nia atensaun konabá oinsa valores critãos bele sai base da democracia no ikus mai eskritor la konsiente katak sociedade Timor Leste ne’e sociedade plural ida.

Segundo, escritor hakarak tane aas sentido da Demokrasia hodi valoriza ema hotu nia direito, liberdade, no igualdade, maibé eskritor foti valores cristãos hodi sai base bá Demokrasia.

Iha ne’e mosu pergunta fundamental ida katak Demokrasia ne’e se nian? Enquanto Demokrasia ne’e ema hotu nian no la’os deit sarani católica deit, entaun presiza mos konsidera existensia husi relijiaun sira seluk. Tamba ne’e, hau bele livre halo interpretasaun tuir hau nia perspertivo rasik katak opiniaun ida ne’e indireitamente halo deskriminasaun bá grupo relijiaun sira seluk, mesmo em direitamente escritor la hakerek hanesan ne’e.

Escritor questiona konabá aktus real husi ukun nain sira hanesan pratíca aktus ignorância, egoismo, discriminação, injustiça, interesse pessoál ka grupo nebé akontese maibé escritor la konsiente katak nia mos halo hela deskriminasaun iha nia idea ka opiniaun waihira escritor foti valores husi relijiaun ida hodi sai base bá demokrasia nebé iha parte seluk Demokrasia ne’e sai hanesan base da unidade bá sociedade plural.

 Relijiaun ho Estado Tuir Koseptu Teokrasia no Koseptu Secular

Ita presiza atu konsiente katak hanesan ema humano ida ita sempre la’o iha corridor rua; primeiro ita hanesan homo socius no segundo homo Deus. Hanesan homo socius katak ema iha liberdade hodi manisfesta nia natureza hanesan ema humano ida no hanesan homo Deus katak ema iha dever hodi manisfesta nia fiar tuir relijiaun nebé nia kaer metin nudar nia identidade da fé.

Wainhira ita kolia konabá Estado entaun ne’e ita koalia konaba manifestasaun da konkordasaun entre ema ho ema. Enquanto ita koalia konabá relijiaun ne’e katak ita koalia konabá relasaun entre ema ho Maromak nebé manifesta nia fiar liu husi valores husi reljiaun ida tuir konteksto da revelasaun.

Tamba ne’e iha natureza nebé la hanesan wainhira ita koko hodi reduz natureza ida hodi hatama iha natureza seluk. Relijiaun iha dever atu hanorin konabá konsiensia moral maibé nia nafatin sai hanesan intituisaun ida nebé hamrik mesak no ketak husi estado no la bele kahur ho estado. Tamba ne’e ita senti komik wainhira ema balun koko hodi reduz valores husi relijiaun ida hodi sai base bá Demokrasia.

 Iha parte ida, konsepto konabá estado ho relijiaun ne’e dalaramu determina husi natureza ontologia ema ida-idak nian. Tamba ne’e keta hakfodak wainhira ema balun sai fanatismo e radikalismo da relijiaun nebé to’o ikus mai koko hodi reduz voleres husi relijiaun ida hodi hatama bá sistema Democracia.

 Ne’e problema boot. Oinsá ho nasaun ida nebé forma husi pluralismo da relijiaun bele reduz valores husi relijiaun ida hodi hatama iha sistema Democracia. Indireitamente, ita halo diskriminasaun ba relijiaun sira seluk.

 Ita la konsidera e valoriza existência husi relijiaun sira seluk nebé nia sarani sira mos nuudar sidadaun Timor oan. Tamba ne’e ita presiza hatene konsepto balun nebé koalia mos konabá relasaun entre nasaun ho relijiaun atu nune’e ita bele koloka ita nia konsepto sira tuir ni-nia espaço no nia kontexto ida-idak:

Primeiro, Estado ho relijiaun tuir konsepto Teokrasia katak estado ho relijiaun ne’e buat rua nebé indiferensa tamba ne’e ita la bele haketak ka hafahe, ou seja, estado e religião são uma unidade inseparável, tamba ne’e ukun tuir konsepto Teokrasia katak poder no ukun sempre la’o tuir roman liafuan Maromak nian.

Iha konseptu Teokrasia, vida comunitária ou sociedade no polítika do estado sempre hakruk iha Maromak nia lia fuan no hala’o tuir maromak nia ukunfuan. Relasiona ho assunto estado ka política tuir konsepto ida ne’e, ema sira nebé adopta sistema Teokrasia fiar katak buat sira ne’e hotu nu’udar manifestasaun husi Maromak nia obra rasik.

Konsepto Teokrasia fahe ba parte rua hanesan Teokrasia direita no Teokrasia Indireita. Tuir konspeto Teokrasia Direita, ukun konsidera hanesan beran ka kbiit ida nebé mai husi maromak rasik.

Ho razaun simples deit katak Estado existi iha mundo ne’e tamba Maromak rasik mak hakarak hodi permite no tamba ne’e, sira nebé ukun mos konsidera hanesan Maromak.

Enquanto Teokrasia Indireita, ema sira nebé kaer ukun hanesan liurai ka politico nain sira, konsidera sira hanesan manu ain Maromak nian ne’ebe simu poder ka kbiit husi Maromak rasik hodi hala’o ukun ne’e tuir Maromak Nia ukun fuan.

Segundo, Estado ho relijiaun tuir konsepto Secular. Konseptu secular dehan katak relijiaun ho estado ne’e instituisaun rua nebé diferensa tamba ne’e konsepo secular haketak relijiaun no estado.

 Tuir konsepto secular, sitema do estado la iha ligasaun ho relijiaun. Estado koalia konabá assunto povu nia moris ou simplesmente ita bele dehan katak estado ne’e assunto mundo ninian. Enquanto relijiaun ne’e koalia konabá relasaun personal entre ema ho Maromak.

Tamba ne’e estado ho relijiaun ne’e Instituisaun rua nebé diferensa tebes e ita la bele kahur hamutuk. Iha nasaun secular sira, sistema positvo no lei sira colaca tuir ida-idak nia espaço e haketak husi valores no normas relijiaun nian. Tamba ne’e, Norma legal sira sai hanesaan rezultado husi acordo ka desizaun comum povu ninian, e nunka mais atu hola desizaun ida basea bá valores husi relijiaun sira ou valores husi relijiaun ida, hanesan konsepto Teokrasia.

 Tamba ne’e iha nasaun secular sira, estado fo liberdade bá nia emar sira hodi harii nia fiar tuir relijiaun saida deit, maibe estado la iha intervensaun konabá assunto relijiaun ninian.

 Relasiona ho konsepto ida ne’e ita presiza konsiente mos katak Democracia nuudar konsepto secular ida, tamba Democracia la’os mai husi relijiaun ou existe tamba revelasaun, maibe Democrasia ne’e konsepto rasional ida nebé moris husi ema matenek nain sira ka filosofo sira nia hanoin ka reflesaun.

Opiniaun Ne’be Hatur Iha Inconsciéncia Do Escritor

Iha subtema SENTIDO NO IMPLEMENTAÇÃO DEMOCRACIA belun Agosto Poto koalia barak los konabá definisaun da Democracia no ikus mai halo definisaun ida konabá sasukat da demokrasia katak “Democracia mak IGUALDADE no LIBERDADE.

Igualdade katak, ema hotu-hotu hamrik hanesan iha lei nia oin no ema hotu iha direito no dever nebé hanesan. Liberadade katak, ema hotu-hotu iha direito atu expressa sira nia an no hetán sigurança no proteção ba sira nia direito no dever tuir lei haruka”.

Argumetu husi escritor ne’e hanesan “kancang lupa lupa kulit”. Escritor hakarak koalia konaba ba igualdade maibé na pratíca zero. Escritor la pratíca aktus da igualdade ne’e iha nia opiniaun rasik. Oinsa bele forma tese ida atu halo reduksaun bá valores cristãos hodi hatama iha pratíca da sistema democracia, maibé Nasaun Timor Leste laos nasaun nebé adopta sistema Teokrasia.

 Presiza konsiente no hatene katak Timor Leste adopta sitema democracia no promove kooperasaun ho konfisaun relijioza oioin, ne’ebe kontribui ba Timor Leste nia povu moris diak (artigu 12).

Husi realidade ida ita presiza mos hatur opiniaun nebé fo sentido valorizasaun bá existensia husi relijiaun sira seluk.  Lei inan mos garantia bá ema ida-idak nia liberdade bá konxiénsia, bá relijiaun no bá kultu, no konfisaun relijioza sira ketak hosi Estado (artigo 45).

Iha pontu ida ne’e, ita presiza konsiente katak relijiaun sira ketak hosi estado tamba ne’e, presiza koloka ida-idak tuir nia espaço no konteksto. Aat liu tan waihira escritor koalia konabá sentido da Demokracia antigo husi Atenas nian katak “Democracia ne’e ukun husi povo no povo mak na’in ba ukun.

 Ne’e duni, povo hotu-hotu participa iha decisão política iha sorumotu nia laran.” “Democracia nia hun-abut ne’e tenke hatuur iha “respeita pela dignidade da pessoa humana. Ne’e duni, iha Democracia ne’e tenke halakon discriminasaun hodi habelar fraternidade.”  ho ida ne’e ita bele komprende katak opiniaun ne’e hatur iha inconsciéncia do escritor.

Razaun simples deit katak escritor hakarak sublinha sentido da Democracia no tane aas ema hotu nia dignidade, igualdade no liberdade maibé nia haluha katak nia halo hela deskrimisaun ba grupo relijiaun sira seluk.

Oinsa escritor koalia konba ba igualdade maibé na relidade nia la valoriza existenscia husi relijiaun sira seluk? Escritor hakarak hatama valores cristãos iha Democracia maibé oinsa ho grupo relijiaun sira seluk nebé existe iha Timor Leste e mos exerce sira iha direitu hanesan sidadaun Timor oan.

Polítika ho Relijiaun Tuir Perspetivo John Rawls no Jurgen Habermas

Iha livro John Rawls ho titulo, Political Liberalism, Rawls presta nia atensaun konabá oinsá sociedade plural ida nebé forma husi bakcground nebé la hanesan, diferensa cultura, relijiaun no mos doutrinas sosial nebé ao mesmo tempo doutrina sira ne’e rasional maibé sempre oposta ka kontrario ho dourtinas sosial husi sociedade sira seluk. 

Tamba ne’e la fasil atu bele aplika valores da relijiaun ou doutrina sosial husi sosiedade ida iha Estado de direito nebé forma husi sociedade plural, tamba komponente sira ne’e sempre sai hanesan obstáculo ida hodi bele bá alkansa desizaun colectiva no mos konsesus da verdade.

Husi realidade empírica sociedade plural, Rawls rekomenda ninia ponto de vista normativa ida katak wainhira ita koalia konabá buat sira nebé konstitusional, estado de direito, ou política do estado; kada individu ida-idak só bele hato’o nia-nia opiniaun ou perspetivo política nebé hatur iha konseptu da justiça no livre husi doutrina social husi sociedade hotu-hotu no valores da relijiaun.

Tamba waihira política kahur ho volores da relijiaun ou doutrina social husi sociedade ida bele hamosu problema no kria situasaun política nebé hamosu deskriminasaun.

No fim Rawls afirma tan katak relasiona ho debate sira nebé iha ligasaun ho assunto da relijiaun tenki koloka nia tuir ninia fatin e haketak nia husi agenda política.

Tamba ne’e Rawls hakerek dehan “wainhira komponente balu nebé haketak ona husi agenda política, ne’e katak sira la envolve ona iha agenda política no konsidera sira hanesan buat nebé la los ba desizaun política mesmo liu husi dalan votasaun nebé hatudo katak sira nia rezultado nebé mais votos” (Nader Hashemi, 2011: 42). 

Husi ponto de vista normativa Rawls, hau koko hodi halo análisa crítica ba opiniau husi Agosto Poto, nebé iha parte ida ne’e hau sei foka liu iha subtema VALORES CRISTÃOS SAI BASE BÁ DEMOCRACIA. Iha subtema ida ne’e escritor cita constituição RDTL, artigo 1,  nebé afirma konabá identidade nasaun Timor Leste nian nuudar Estado de direito democrático, soberano, independente e  unitário, baseando na vontade popular e respeito pela dignidade humano.

Escritor afirma tan katak “Ida ne’e, mak principio fundamental iha ita nia filosofia política” no escritor hato’o nia sugestão ba liderança sira; lider partido político sira, nai ulun sira, ukun na’in sira, lider antigo sira, lider foin sa’e sira, atu la bele halakon principio moral, kaer metin consciência moral no responsabilidade ba ita nia fiar hodi hatuur principio valores cristão nian iha Democracia.

Iha parte ida ne’e, hau pessoalmente aceita no la questiona. Iha parte seluk, hau questiona pontus balun nebé tuir hau nia perspetivo katak escritor la hatene koloka kontexto ida-idak tuir nia espaço no escritor mos la hatene hodi iterpreta kontexto sira ne’e uza language of public reason or public common-sense language.

Tamba ne’e ita bele hare iha subtema ida ne’e VALORES CRISTÃOS SAI BASE BÁ DEMOCRACIA.’ Escritor, dala barak uza liafuan doutrina da relijiaun Católica hodi koalia konabá kontexto publico nebé forma husi sociedade ida nebé plural.

Ita bele hare exemplo balun hanesan tuir mai ne’e: “Ita tenke hanoin didi’ak katak wanhira ita simu ona baptismo ne’e automaticamente ita sai ona membro da Igreja hodi hola parte ona iha santidade Maromak nian. “Todos os Cristãos estão chamados a santidade. Todas as vocações cristãos (leigos, padres, religiosos) têm a mesma dignidade são caminhos da santidade” (espiritualidade Cristã, p, 25). Ita hotu-hotu hola parte iha Maromak nia santidade, no santidade ne’e Maromak nian, tan ne’e ita ema tenke haka’as an atu moris iha doutrina Igreja nian, liu husi prática valores cristãos nian.

Timor-leste ne’e católica barak liu iha Asia, maibé católica praticante ne’e ita bele sura ho liman fuan de’it, no cristão “napas” de’it, alias critão natal no Pascoa de’it.

Maibé, Jesus Cristo tatoli moos katak “bem aventuranças” (Mt 5,12) só ema nebé ki’ak iha espirito mak hatene buka dame, tan sira Maromak oan, “rahun di’ak bá sira nebé buka dame, tan ema sei hanaran sira Maromak oan” no seluk-seluk tan. Husi deklarasaun ida ne’e,  hau nudaar ema católica ida hakarak afirma katak doutrina igreja católica la sala.

Igreja iha dever atu hanorin konaba conciencia moral, caridade, honestidade, justiça e verdade; maibe escritor mak la hatene hodi coloca konsepto doutrina ida-idak tuir nia fatin. Escritor koalia konabá sentido Democracia maibé sidauk komprende klean konabá kontexto Democracia.

Escritor koalia konaba questão deskriminasaun maibé escritor mos sidauk hatene hodi interpereta doutrina da igreja uza language of public reason or public common-sense language nebé bele cria situasaun tolerância ba sociedade plural no relijiaun hotu-hotu.

Relasiona asunto Estado ho relijiaun, Otto Gusti Madung cita Carr nia ideia iha nia opiniaun nebé dehan katak: Religion and the Principle of Tolerance The religion which takes its place in the public arena as well as having the potential of translating into the language of public reason, can strengthen solidarity in a modern pluralist society (Otto Gusti Ndegong Madung 2022: 282-283) Tamba ne’e, problema hanesan sectarismo, intolerância no fundamentalismo ita bele ultrapassa liu husi dalan language of public reason (bahasa nalar publik).

Iha sociedade nebé pluralbele permite valores tolerância existe equantu cada valores da relijiaun nebé hakarak hatama bá arena pública bele interpreta ho language of public reason.

Iha kontesto language of public reason or public common-sense language, valores da relijiaun la konsidera ona hanesan polemika ka problema ida tamba language of public reason bele promove valores da relijiaun ho lianguagem nebé ema hotu bele komprende no simu e mos la diskrima relijiaun ida por ida.

Relasiona ho konteksto ida nee, Juergen Habermas afirma katak:  Post-secularism gives a venue for tolerance to be realized in a process of mutual learning between religion and secular reason. Common-sense should not be a biased judge of religious truths. It should, rather listen to religious claims in the public arena.

 So that they can be heard and understood in a pluralist public domain, religions need to be able to translate their doctrines into public common-sense language (Habermas, 1996). Habermas describes the process of mutual learning of religion and secularism in this way: “The religious bloc must acknowledge the authority of ‘natural’ common-sense as being the result of work done by the scientific institution which can be falsified, and the principals of universal egalitarianism found in law and morality. On the other side, secular common-sense should not position itself as a judge of truths of faith, despite there being evidence that common-sense only considers a statement to be rational as far as that statement can be translated in an open discourse for the public.” (Habermas, 2008)

Conclusaun

Hau taka hau nia opiniaun ho pergunta ontologia nebé hau cita husi belun Agostu Poto nia opiniaun katak:  loron ba loron ema sempre husu: Ita mai husi nebé? Ita atu ba nebé? Atu halo saida? Pergunta ontologia ida ne’e lori ita ba konsienten konaba ita ida-idak nia existência no essência. Liga ho kotexto política ho relijiaun nebé sai nuudar realidade rua nebé ita la bele haketak husi sociedade nia moris iha nasaun ida nia laran, maka dalan nebé los maka ita presiza konsidera no valoriza mos existência no essência sociedade plural, igualdade no relijiaun hotu-hotu nuudar riku soin ba nasaun Timor Leste no mos ba Demokrasia. (**)

About dilipost

Check Also

VALORES CRISTÃOS VS DEMOCRACIA: DEFESA DE HONRA BÁ CRÍTICA HUSI BELUN AGOSTO POTO HO DAVID MARTINS

    Husi António Octaviano Marcelo da CunhaNo. Telefone: +6282119450575(Estudante do Instituto Superior de Filosofia Católica …

Leave a Reply

Your email address will not be published. Required fields are marked *