Friday , July 30 2021

Ró Tranship II Susar Atraka, José Agostinho Hein Relatóriu Husi Tékniku

Dili Post- Ministru Transporte Komunikasaun (MTK), José Agostinho da Silva, hein sei relatóriu husi tékniku sira atu aprezenta kona-ba ró Tranship II ne’ebé susar atu atraka iha portu Ataúro.

Iha sesta (11/06/21), ró Tranship II tula Primeiru-Ministru (PM), Taur Matan Ruak ho komitiva ba postu administrativu Ataúro atu inaugura postu Unidade Polísia Marítima (UPM) nian.

Maibé, hafoin to’o iha Portu Ataúro, ró refere susar atu atraka kuaze besik oras nia laran, maibé, konsege iha ró husi kompañia balun nian mak dada husi kotuk hodi konsege atraka.

Ho fallansu ne’e, Ministru MTK, José Agostinho da Silva konfirma, nia parte seidauk simu relatóriu husi tékniku sira.

“Ha’u seidauk hetan kronolojia eskrita husi parte tékniku ne’ebé horseik akompaña ró ne’e ba Ataúro, mas ha’u iha informasoens verbal husi tékniku liu-liu diretor kabutazen no kapitaun ró rasik, ita-nia tripulante sira-ne’e foun ba sira, tanba sira seidauk familiár ho ita-nia medan,” dehan Ministru José Agostinho, sábdu (12/06/21) iha Portu Dili.

José Agostinho hatutan, informasaun verbal ne’ebé remata husi tékniku sira katak, ró Tranship labele atraka iha portu Ataúro sesta ne’e, tanba forsa natureza mak la fó fatin, no mós kondisaun portu mak la favorável ona.

“Konforme saida mak sira relata mai katak, ne’e forsa natureza ne’ebé dehan, velosidade anin speed entre 16 a 20 knots, entaun difikulta tebes ita-nia atrasaun. Segundu ita-nia kondisoens infraestrutura iha ne’ebá ita-bele dehan, ladún favorese ona,” dehan nia.

Hatán ba informasaun husi tékniku operadór ró balun dehan, mákina ida atu fila nian avaria.

José Agostinho rejeita atu fó komentáriu, tanba seidauk simu relatóriu eskrita husi tékniku sira.

Maibé, fó ona instrusaun ba tékniku sira atu esplika kle’an kona-ba fallansu ne’ebé akontese ba ró Tranship II.

Tanba ne’e José Agostinho dehan, bainhira simu ona relatóriu, maka sei aprezenta ba Xefe Governu, Taur Matan Ruak, nu’udar superiór, nune’e bele foti desizaun.

Entretantu, iha sábdu (12/06/21), PM Taur ho komitiva fila husi postu administrativu Ataúro mai Dili ho ró Kay Rala Xanana UPM nian.(ajo)

About dilipost

Check Also

MKAE Atualiza Prosesu Adezaun Ba Organizasaun Mundial Komersiu

DILI Post- Ministro Koordenador asustus ekonomiku(MKAE) Joaquim Amaral enkontru ho primeiru Ministro Taur Matan Ruak …

Leave a Reply

Your email address will not be published. Required fields are marked *