Wednesday , August 10 2022

Sei Iha Nesesidade Extende Tan EE

DILI Post-Tuir estudu ne’ebé sala situasaun Sentru Integradu Jestaun Krizi (SIJK) iha ámbitu triazen no vizilánsia sentinela iha territóriu laran tomak hatudu, posibilidade bele extende tan Estadu Emerjénsia (EE) ba fulan ida.

Diretór sala situasaun SIJK, Brigadeiru Jenerál, João Miranda ‘Aluc Descartes’ hateten, desizaun bá extensaun EE ne’e kompeténsia Governu nian liu husi Konsellu Ministru, tanba ne’e dever SIJK nian mak halo estudu ba situasaun covid-19 iha Timor-Leste.

“Husi estudu sala situasaun nian iha nesesidade atu extende tan EE,” dehan Aluc ba Jornalista, hafoin aprezenta relatóriu no proposta estratéjia ba komisaun interministeriál ne’ebé lidera husi Primeiru-ministru (PM) Taur Matan Ruak, iha salaun Ministériu Finansas, Dili, foin lalais ne’e.

Diretór Sala Situasaun SIJK ne’e informa, proposta estratéjia ne’ebé sira hatama ba Governu ne’e, tanba deklarasaun EE hela semana ida tan atu remata ona.

Ne’e duni, nia relata tuir estudu ne’ebé sala situasaun halo posibilidade bele extende tan EE.

Maibé, nia dehan  depende ba desizaun Governu no Prezidente Repúblika no Parlamentu Nasionál nian.

“Ami nia proposta ne’ebe hatama ona ba komisaun interministeriál, agora sala situasaun SIJK hein hela aprovasaun husi Konsellu Ministru, atu extende tan ou atu hakotu ona situasaun emerjénsia ida ne’e,” haktuir Aluc.

Nia hatutan, sala situasaun kontinua tau atensaun ba iha liña fronteira terrestre entre Timor ho Indonézia, nune’e kontrola di’ak liu-tán sirkulasaun ilegál iha fronteira, nune’e labele iha transmisaun virus corona iha komunidade nia le’et.(ajo)

About dilipost

Check Also

Domingos Konsideira Funsiunariu Palasiu Governu “Matan Delek”

DILI Post-Komandante Tranzitu Komandu Polisia Munisipiu Dili, Inspetor Polisia, Domingos Sarmento Gama konsideira funsiunariu Palasiu …

Leave a Reply

Your email address will not be published.