Tuesday , October 19 2021

Taquino Lori Maudoko FC Husi Jakarta Mai TL

DILI Post – Tomas Taquino Gonçalves Soares, hanesan na’in ba Futeból Klube (FC) Maudoko, hateten iha tinan haat liubá foti desizaun hodi fila hosi Jakarta Indonezia mai Timor Lorosa’e tanba hakarak ba dezenvolve area desportu.

Iha Inisiu bainhira nia hanoin ona hakarak dezenvolve area desportu iha nasaun Timor-Leste, tanba hadomi tebes desportu maski iha ema balun hatete a’at maibé ida ne’e la halakon hau nia espíritu luta hodi kontribui ba desportiva Timor Leste.

Maski dala barak hosi ema nia ko’alia aat hamosu baruk iha nia neon maibé nafatin koko no forsa nafatin liuhosi orasaun ne’ebé hasa’e ba aman Maromak haraik nafatin grasa hodi bele liu situasaun difisil ida ne’e.

Tuir mai intervista badak ho jornalista Dili Post Rosalia Lemos Soares oinsá bele realiza mehi hodi kontribui ba dezenvolvimentu nasionál liu hosi area desportu.

“Iha 2017 ha’u ho kolega na’in rua lori Maudoko mai Timor, hahú husi zero,maibe komesa rekruta rekursu umanu ho estrutura, ho esperiénsia ne’ebé iha ami halo atividade sira ne’e iha pozitivu.

Atividade futeból jogu ne’ebé hala’o uza kampu estádiu maibé utiliza sorin ka meiu kampu ba dala uluk halo iha Timor no atividade ne’e hetan support hosi kompañia hanesan SMB Travel ho Eureka,” Taquino ba Dili Post iha kna’ar fatin Delta,Sesta (10/09).

Nia haktuir tan, antes Clubu Maudoko muda mai Timor Leste, sira hahú uluk eksebisaun ne’ebé servisu hamutuk ho artista Indonézia. Intensaun atu hatudu ba sira katak ezisténsia Timoroan iha Jakarta no atu halakon perspetiva ema nian katak Timoroan ne’e idéntiku ho brutalismu no la halo buat di’ak hodi kontribui ba paz no dezenvolvimentu.

Nia dehan buat hotu tenki hahu hosi zero,mehi labele sai mehi de’it maibé tenki realiza duni mehi ne’e sai realidade.

“Ita ema moris dala barak sai problema ba ema balun hodi politiza no ko’alia aat maibé nia nafatin firme ho fuan boot simu no konsidera ida ne’e sai hanesan lisaun no esperensia atu avansa nafatin ba futuru” nia konta

Tomas Taquino Goncalves Soares moris iha Jakarta, 14 Agostu 1987, oan hosi aman (matebian) Mateus Virgílio Soares, hosi Munisípiu Manatutu, Postu Administrativu Laklubar, no inan Filomena Gonçalves hosi munisípiu Ermera, postu administrativu Atsabe.

Nia akresenta tan moris iha ema rain tanba avó iha ne’ebá no nia aman no inan mós iha hotu ne’ebá tanba eskola iha Bandung, ho ida ne’e nia ultrapasa moris to’o boot iha ema rain.

“Hau hahú eskola hosi eskola primaria to’o ba Universidade iha Jakarta, maibé la konsege finaliza (gradua) tanba moris independente entaun hau involve a’an iha organizasaun duke fokus liu ba estudu,” afirma nia

Nia konta tan Clubu Maudoko iha 2015, momentu ne’ebá embaixada Timor Lorosa’e iha Indonézia hala’o eventu desportiva ho objetivu halibur Timor oan sira iha ema rain hodi selebra komemorasaun loron restaurasaun independénsia 20 Maiu.

Liu hosi eventu ne’e nia hamutuk ho kolega na’in 11 harii Clubu Maudoko hodi partisipa mós, maibé iha momentu ne’ebá Clubu ne’ebé sira harii sai problema uitoan liuliu ba públiku Timor oan sira iha ne’ebá ho idade 40 ba leten tanba liafuan Maudoko ba sira hanesan lia mal ida.

Maibé ho esplikasaun ne’ebé klaru ba inan-aman no públiku maka hahú kedas iha ne’ebá Maudoko sai trend to’o ohin loron.

Nia sublina alende partisipa tiha eventu ne’ebé embaixada Timor Lorosa’e selebra, embaixada mós kontinua support no rekomenda ba Maudoko atu partisipa mós iha eventu internasionál hanesan Street Soccer iha Jakarta, kona-ba apoiu finanseiru hodi Maudoko FC bele partisipa iha eventu ne’e mai hosi empreza Indonézia oan ida ne’ebé laran osan mean ho naran Prio nu’udar na’in ba kompañia Eureka.

Iha eventu refere Maudoko FC hetan Kintu lugar hosi partisipante 32 ne’ebé hala’o iha ANCOL Jakarta 2016.

Ikus liu atu hakotu nia husu ba maluk Timor oan sira hotu labele pesimista, maibé tenki optimista nafatin, bainhira iha abilidade no koñesimentu ba area ida labele para de’it iha mehi realiza ho susesu.

“Ha’u nia mensajen ba Timoroan hotu ne’ebe sente iha talentu tenki hatudu lalika moe. Maibé ho buat ne’ebe foun no diferente ho ema seluk,no susesu ho ita nia dalan rasik” hakotu nia.(cal/ros)

About dilipost

Check Also

Antes Lori ba Laleia, Ma’hunu Sei Hatoba Iha Muzeu Rezistensia

DILI Post-Tuir planu Domingu (26/09) aban, saudozu Jose Antonio Gomes da Costa kodiku Ma’hunu Bulerek …

Leave a Reply

Your email address will not be published. Required fields are marked *