Tuesday , October 19 2021

TDD Aplika AP Ba Sidadaun Nain 5 Ne’ebe Hatama Sigaru Joker Ho Ilegal

DILI Post-Tribunal Distrital Dili (TDD) aplika ona Aprezentasaun Periodika (AP) ba sidadaun nain lima (5) ne’ebe kaptura loron 31 fulan Agostu tinan ne’e husi Unidade Polisia Maritima iha area Kristu Rey.

Sidadaun hirak ne’e komete krime kontra bandu hodi hatama sigaru joker hamutuk kaixa 40 ho illegalmente, liu hosi via maritima.

Iha intervista ho Defeza husi parte Arguidu, Marito da Silva hateten sira halo ona primeira interogatoriu Kinta -feira horseik no ohin rona ninian kontinuasaun ba desizaun.

“Prosesu ne’e Ministeriu Publiku akuza ba kliente konaba kontra bandu ne’ebe ke prejistu iha kodiku penal 316 ninian, investigasaun ne’e lao too ba iha primeira interogatoriu ida ne’e, Ministeriu Publiku husu medida ida ne’ebe adekuadu ba iha arguidu sira mak aprezentasaun periodika,” dehan nia ba jornalista, iha TDD Sesta-feira ohin.

Nia haktuir, iha aprezentasaun periodika ne’e aplika ba iha Timoroan nain hat semana ida dala ida, no sidadaun Indonezia Ministeriu Publiku husu atu ba iha prizaun preventiva. Maibe, hare ba sirkuintasia maka tribunal foti medida seluk aprezentasaun periodika ba semana ida dala rua Segunda no Sesta.

Aliende ne’e konaba evidensia sira, nia dehan tribunal apura tiha ona no sei iha prosesu nian laran. Hafoin intrega hikas ba nain.

“Prosesu ida ne’ebe ke agora dadauk nee, medida deit fo ba sira, para prevene, mais prosesu ne’e sei kontinua,” tenik defeza ne’e.

Nia mos relata konaba sidadaun indonezia seidauk bele deporta ba ninian nasaun, tanba sei iha hela prosesu investigasaun laran.

“Dadaun ne’e sidadaun estrajeiru ne’e sei iha kuerantena, hafoin remata tempu kuerantena ba hela iha familia para akompaina nafatin prosesu investigasaun,” relata Marito.

Entertantu sidadaun nain lima ne’e kompostu hosi timoroan nain hat no Indonezia nain ida komete iha aktividade kontra bandu.

Nune’e, Unidade Polisia Maritima kaptura no sita mos kareta rua, motor ida, ro ida, inklui sigaru Joker kaixa 40.(mark)

About dilipost

Check Also

Naimori Bukar Hetan Suspensaun Pedidu Husi Tribunal Distrital Baucau

Dili Pos – Konseleiru Másimu Partidu Kmanek Haburas Unidade Nasionál Timor Oan (KHUNTO) José dos …

Leave a Reply

Your email address will not be published. Required fields are marked *