Friday , December 2 2022

Tesi Naimori Nia Ikun ho Lei

DILI Post – Relasiona ho kazu Naimori haruka elementu lori osan sai ba rai liur ho montante boot. Atus ida rihun tolu nulu dolar Amerikanu ($ 130.000) ne’ebe hetan prende husi ekipa konjunta Sevisu Nasional Intelezenjia (SNI), Servisu Informasaun Polisia (SIP), S2 Polisia Militar, Alfandega, J2 F-FDTL ho Polisia Cientifika Investigasaun Criminal (PCIC), iha Aeroportu Nicolao Lobato.

Bazeia ba kazu ne’ebe refere, signifika iha Nasaun ida ne’e komesa husi Prezidente Republika to’o povu ain tanan ou ai-leba, la iha ida maka tur iha Lei nia leten. Maibe, ema hotu-hotu iha Nasaun ida ne’e tenke kumpre Lei.

Ba se de’it uainhira hahalok no lala’ok la tuir Lei ne’ebe vigora, nia tenke tesi tilun ho ikun ho Lei ne’ebe iha. Atu nune’e, ba futuru la iha ema ida maka ‘kebal Hukum,’ nu’udar sidadaun iha Lei nia oin ema hotu-hotu hanesan.

Membru Governu hotu-hotu hatene Lei, tanba ne’e sira la bele hakat liu Lei no tenke hakruk ba Lei. Ida-idak tenke hala’o kna’ar. Tanba, Lei asegura hotu ne’ebe bele hala’o no ida ne’ebe la bele. Kuandu hakat liu Lei, hasoru Lei no hasoru Estadu. Kestaun ne’e hato’o husi Prezidente Parlamentu Nasional (PPN) Aniceito Guterres ba jornalista iha Uma Fukun,Segunda-feira (10/10).

Iha prende osan ne’e hetan intervensaun husi Naimori no membru Governu na’in rua  (2), Vice Ministru Justisa (MJ) inklui Vice Ministru Interior (MI) ho intensaun haruka fo fila osan refere.

Maibe, parte husi SNI, mantein hodi prosesu tuir Lei ne’ebe vigora ona iha Artigu 7 No 5/2013. Koalia konaba prevensaun kombate Brakamentu Kapital no finansiamentu Terorizmu nian.

Ba aktus Intervein membru Governu nain 2 no Naimori, PPN Aniceito husu ba Naimori no membru Governu sira tenke hakruk ba Lei ne’ebe vigora iha Nasaun ida ne’e.

PPN ne’e esplika liu tan,”ha’u hanoin membru Governu sira hatene Lei, sira bele hala’o no labele hala’o. Karik sira intervein iha parte balun, sira sei hasoru parte judisiariu. Sei iha prosesu avaliasaun no informasaun, karik iha kazu ne’e indisius krime ruma, Autoridade Judisiariu hanesan Ministeriu Publiku (MP) hala’o intervein.

Nia husu ba iha entididade hotu-hotu tenke hakruk ba Lei no Estadu. Tanba, Estadu ne’e estadu, interese Estadu iha leten liu. Hotu-hotu tenke tau a’as interese Estadu no tenke hatene an, agora iha kontestu Estadu,”hakotu Aniceto.

Nune’e mos Prezidente Komisaun B assuntu Defeza no Seguransa Jose Agostinho Sepueria ‘Somotxo’ hateten, osan ne’ebe Naimori haruka membru sira tenta lori sai ba rai liur hanesan Brankamentu Kapital. Tanba ne’e, tenke hala’o investigasaun kle’an.

Membru Governu ne’ebe tenta hala’o impede servisu investigasaun, iha Artigu 143, kuandu ema ruma impede Autoridade Publika sira hala’o servisu hanesan freve atu la bele hala’o sei tama kadeia tinan 26. Kuandu hala’o tinan 28 iha prizaun. Maibe, sira hala’o ona entrega ba parte servisu investigasaun hala’o prosesu ba membru Goveenu hirak ne’e.

Nia kestiona liu tana, akontesimentu iha Aeroportu ne’e bolu dehan krime organizadu. Buka na’ok Estadu, lori osan sai. Tanba, akontesimentu iha Aeroportu ne’e, bolu flagrante deleitu, sira lori osan boot.

Sosiedeade hotu hatene, kuandu sai ba liur sempre iha nota ida priense no parte husi Alfandega sira sei husu lori osan hira. Mais, sinku mil ou mais des mil, kuandu osan ne’e liu montante ida ne’e tenke iha dekralasaun husi Banku Sentral. Se kuandu la iha deklarasaun obriga liu de’it ne’e trafikante ida. Lori osan ba hala’o saida, terorizmu ou trafiku droga ou trafiku umanu. Ne’e finansiamentu la bele dehan asaun hirak ne’e normal.

KHUNTO Viola Lei

Dezkonfia membru Partidu Kmanek Haburas Unidade Nasionál Timor Oan (KHUNTO), ne’ebé lori sai osan ho montante $ 130,000. Husi Timor-Leste (TL) ba rai li’ur. Relasiona ho problema hirak ne’e, Asia Justice And Rights (AJAR) husu ba Ministériu Públiku (MP), atu loke prosesu investigasaun kle’an ba Vise Ministru Interiór (VMI) António Armindo no Vise Ministru Justisa (VMJ) José Edmundo Caétano ho Konselleiru Másimu Partidu KHUNTO José Naimori ‘Bukar’.

 Nia dehan, lori sai osan ne’e viola Lei, nu’udar lideransa máximu Partidu KHUNTO, nu’udar membru Konsellu Estadu, nu’udar Vise Ministru sira ne’e iha responsabilidade boot atu hala’o oinsá ema hotu kumpre Lei. MP tenke loke investigasaun ba Vise Ministru na’in rua no Konselleiru máximu KHUNTO.

Tanba, sira ba defende loos osan ne’e tenke foti sai, osan ne’e nu’udar objetu krime tenke iha prosesu la bele para fali iha klaran. Agora ema hotu hein hela bainhira lori ba Tribunál no MP loke investigasaun ba boot na’in tolu ne’e. Tanba, sira iha indikasaun forte, komete iha krime hotu. Deklara Diretur Ezekutivu AJAR José ba jornalista sira iha Palasiu Prezidensiál Bairru-Pite, Segunda-feira (10/10).

Nia hatutan, agora sira rasik viola Lei ida ne’e la hatudu ezemplu ne’ebé di’ak. Ne’e iha indesus forte ba krime. Ne’ebé ema ida lori osan bele hatene osan mai husi ne’ebé.

Nusa la transfere husi Banku no tenke lori osan cas de’it tenke dezkonfia bele komete kazu money loundry ou bele komete kazu kontra bandu sira seluk. Tanba, tuir Lei bainhira atu lori osan liu 10 mill, tenke hetan surat autorizasaun husi entidade ne’ebé refere.

Agora ba entidade refere iha ne’e banku Sentrál tenke fó surat. Agora nusa sira la ba husu surat iha Banku. Tanba, Banku Sentrál maka kontrolla sirkulasaun osan iha TL.

Nia haktuir, osan serial ne’ebé serkula iha TL diferente osan serial ne’ebé serkula iha Indonézia, osan ne’e tenke kontrolla depois evita tama money loundry ne’e krime.

Nia hatutan, se ida lori osan ne’e bele dehan sira komete krime, agora sira na’in tolu interven iha kazu ne’e ita bele konsidera sira ne’e komplisidade iha krime ne’e, sira mós tenke hetan investigasaun kriminál, tanba aktu ne’e krime.

Nune’e, hein to’o iha ne’ebé Polísia partisipa kazu ida ne’e ba Tribunál, hein to’o iha ne’ebé MP deteta kazu ida ne’e. Hodi loke investigasaun ba membru Governu na’in rua no Konselleiru Estadu. Tanba, iha indisiu sira komete krime komplisi. Enkuatun, tuir públikasaun Media Sosial iha pájina Facebook CNRT media center publika, KHUNTO tenta lori $ 130,000 sai husi Aeroportu.

Militante Partidu KHUNTO ne’ebe sai hanesan liman los ba Konseleiru Naimori tenta lori sai osan ho montante $ 130,000 husi Aeroportu PR Nicolao Lobato. Autoridade Aeroportu prende osan refere no oras ne’e hala’o hela investigasaun atu hatene objetivu lori sai osan refere husi TL.

Antes ne’e, Vise Prezidente Parlamentu Nasional (VPPN) husi KHUNTO, Luis Roberto relata, ema na’ok nia osan ho montante $ 12,000 iha nia rezidensia. CNRTMC husu ba MP, KAK no PCIC atu hala’o investigasaun kle’an ba insidente ne’ebe hatudu indikasaun Krime Brankamentu Kapital no Fraude Fiskal. Viva TL Abaixu Furadores Korruptu.

Enkuantu, to’o notisia ne’e publika jornal ne’e seidauk hala’o konfirmasaun konaba kazu Brankementu Kapitais husi Partidu KHUNTO.(al/lx)

About dilipost

Check Also

Deskonfia MJ Iha ‘Mafia’ Ba Rai

DILI  Post—Reprezentante povu iha Uma Fukun Parlamentu Nasionál (PN) deskonfia iha ‘Mafia’ Konaba rai disputa …

Leave a Reply

Your email address will not be published. Required fields are marked *

Advertisement

Advertisement

Advertisement

Advertisement

Advertisement

Dili Post Channel

Advertisement

Advertisement

Advertisement

Advertisement

Advertisement

Advertisement

Advertisement