Tuesday , October 19 2021

Timor Leste Lutu Nasional Loron Tolu Ba Jorge Sampaio Nia Mate

DILI Post-Timor-Leste Lutu Nasional durante loron tolu ba eis Prezidente Repúblika Portugeza Jorge Sampaio nia mate.

Governu delibera ona atu dekreta Lutu Nasionál ba antigu Prezidente Repúblika Portugeza Jorge Sampaio nia mate, Segunda-feira (13/09) ohin, liu husi sorumutu ne’ebe halao iha Palasiu Governu.

Ministru Prezidénsial Konsellu Ministru, Fidélis Magalhaes hateten lutu nasional ne’e iha teritóriu nasionál laran tomak, ba períodu loron tolu, to’o tuku 07.59 loron 16 fulan-Setembru tinan ne’e.

“Durante períodu lutu nasionál, bandeira nasionál sei hasa’e to’o klaran de’it ka meia haste iha país laran tomak, iha fatin sira uzu obrigatória nian, inklui misaun diplomátika sira,” dehan Ministru Fidélis.

Jorge Sampaio, mate iha loron 10 fulan-setembru, ema ida ne’ebé maka relevante tebes hodi defende povu no valór konstitusionál Timor nian.

Primeiru Ministru, iha loron Sesta, afirma katak Jorge Sampaio hanesan Prezidente ida ne’ebé kontribui maka’as ba Restaurasaun Independénsia Nasionál, iha ne’ebé nia mai nu’udar konvidadu da onra iha serimónia ne’ebé hala’o iha loron 20 fulan-maiu tinan 2002.

Xefe Governu mós hateten tan katak eis Prezidente Jorge Sampaio sei lembra iha Mundu nu’udar figura boot iha kauza no liberdade no rekoñese nu’udar Belun Boot Timor-Leste no timoroan nian.

Iha tinan 2016, Jorge Sampaio simu Grande Kolar Ordem Timor-Leste, nu’udar rekonesimentu ba ninia solidariedade no apoiu ativu iha luta ba independénsia ita-nia país.

Kondekorasaun ne’e entrega husi Primeiru Ministru atuál ne’ebé iha momentu ne’ebá hanesan Prezidente Repúblika, Taur Matan Ruak, iha Lisboa.

Iha okaziaun, Taur Matan Ruak manifesta rekoñesimentu kle’an ba umanizmu, espresaun solidariedade ne’ebé barak tebes no apoiu ativu durante tinan barak, fó-moris ba luta ba liberdade, autodeterminasaun no independénsia Timor-Leste nian. (niki)

About dilipost

Check Also

PM Taur La Partisipa Reuniaun KM Tanba Afetadu Pozitivu Covid-19

DILI Post – Primeiru Ministru , Taur Matan Ruak, la partisipa reuniaun Konsellu Ministru (KM) …

Leave a Reply

Your email address will not be published. Required fields are marked *