Wednesday , June 16 2021

TL-Amerika Diskuti Koperasaun Bilateral Iha Area Seguransa

Embaixador Estadus Unidus Amérika iha Timor-Leste, Charles Kevin Blackstone

Dili Post — Primeiru-Ministru (PM) Taur Matan Ruak ho Embaixador Estadus Unidus Amérika (EUA) iha Timor-Leste (TL) Charles Kevin Blackstone, diskuti kooperasaun bilateral iha área seguransa no defeza nian inklui reabilitasaun aeroportu Baucau.

“Ami mós halo diskusaun kona-ba bilateral lubuk ida inklui pur-ezemplu reabilitasaun ba kampu aviasaun Baucau, ha’u kontente Primeiru-Minsitru reafirma fali ninia apoiu ba kooperasaun iha área seguransa entre Timor-Leste no estadus unidus,” haktuir Embaixador Kevin Blackstone ba jornalista, hafoin remata enkontru ho PM Taur iha rezidénsia Farol-Dili,Tersa (08/06).

Kevin Blackstone afirma, kooperasaun bilateral iha setór seguransa ne’ebé halo ho Timor-Leste hetan kolaborasaun di’aik tebes husi governu inklui militár sira.

“Ha’u fó hanoin fila-fali ba Primeiru-Ministru, kooperasaun iha área seguransa hotu-hotu halo ho Timor-Leste iha kolaborasaun besik ho governu no mós militár Timor-Leste nian. Hafoin ami-nia diskusaun ohin, ha’u optimísta teb-tebes katak, ita parte rua ne’e sei hetan akórdu kona-ba reabilitasaun aeroportu Baucau iha tempu besik,” hateten Diplomata EUA ne’e.

Nune’e mós durante enkontru, Embaixador EUA mós informa ba PM Taur kona-ba negosiasaun ne’ebé sei la’o hela kona-ba arrendamentu propriedade ne’ebé daudaun ne’e embaixada EUA utiliza iha área Paitai-kelapa, Dili.

“Ha’u mós reafirma fila-fali kona-ba resiprosidade iha negosiasaun ida-ne’e, estdus unidus onra teb-tebes prinsípiu ida-ne’e no mós iha kontextu ida-ne’e ami hein ba oin hametin liután kooperasaun ho Timor-Leste,” tenik nia.

Atu hametin liután relasaun entre EUA ho Timor-Leste, maka embaixada EUA presiza fatin apropriádu, nune’e bele dezenvolve ba oin di’ak liután.(ajo)

About dilipost

Check Also

Ema Deskunesidu Oho Joven Ida Iha Maumali-Ritabou

DILI Post-Ema deskunesidu oho joven ida ho naran Costodio Antonio de Fatima Pascoal iha area …

Leave a Reply

Your email address will not be published. Required fields are marked *