Friday , July 30 2021

Ukun An Besik Ona Tinan 20, Komunidade Aldeia Waroana Sei Moris iha Terus Laran

DILI Post (Atauro)-Komunidade Aldeia Waroana, suku Bikeli, Postu Administrativu Atauro, Munisipiu Dili sei moris iha terus laran.

Tanba maske Nasaun Republika Demokratika Timor-Leste ukun a’an besik ona tinan rua nulu, maibe to’o oras ne’e sira la sente ahi eletrisidade nian naroman, la asesu ba estrada ne’ebe di’ak, tenke konsumu udan been, tanba laiha kanalizasaun bee moos, no la asesu ba informasaun, tanba laiha lina telekomunikasaun.

Xefi Suku Bikeli Daniel Martins hateten, problema ne’ebe mak komuidade aldeia Waroana hasoru mak konaba estrada, bee moos, eletrisidade, no lina telekomunikasaun.

Maibe, konaba estrada ne’ebe liga hosi postu mai suku Bikeli komesa di’ak ona, so hosi suku liga mai aldeia Warana mak seidauk iha kondisaun ne’ebe mak di’ak.

“Ami halo ona proposta iha tinan 2019 ami hato’o ba Prezidente IGE, no konsege responde ami nian proposta ne’e sira haruka ekipa mai loke fila fali estrada ne’ebe tasi sobu, ” dehan Nia iha intervista ida iha Akrema-Atauro-Dili foin lalais ne’e

Aliende ne’e, aldeia Waroana mos infrenta problema bee moos, tanba aldeia Waroana durante ne’e komunidade sira utiliza de’it udan been hodi uza ba nesesidade lorloron.

Iha parte seluk, la’os bee moos no estrada de’it mak aldeia Waroana hasoru, maibe problema seluk mak konaba lina elektrisidade.

“Se bele guverno iha perioridade bele dada lina elektrksidade mai iha aldeia Waroana, ” dehan Nia

Xefi suku ne’e mos akresenta iha aldeia Waroana to’o dadaun ne’e laiha lina telekomunikasaun

“Telekominikasaun tolu iha Timor aldeia ida ne’e la asesu liu, ohin ami preokupa Primeiru Ministru nian ekipa mai ne’e oinsa mak bele halo kontaktu, ami haruka ema ba hein iha suku, depois kuandu iha ona informasaun iha ne’eba sira ho motor halai mak fali fo hatene ami iha ne’e, ” nia hateten

Nia hatutan, wainhira atu halo kontaktu tenke ba iha tasi laran, maibe se wainhira tasi boot susar tebes.

Nia hateten, konaba proposta ba lina telekomunikasaun antes iha xefi suku anterior haruka ona proposta ba iha kompaina sira ne’ebe estabelese lina telekomunikasaun, maibe sira haruka fali atu proposta refere diriji direita ba Ministeriu kompetete.

Enkuantu Aldeia Waroana iha total xefi familia hamutuk 145, enkuantu total komunidade hamutuk 572.(mark)

About dilipost

Check Also

Jose Agustinho Sei Simu Pose Iha 16 Agostu

DILI Post – Iha loron 16 Agostu tinan ne’e, Prezidente Komisaun Nasional Elisaun (CNE) Jose …

Leave a Reply

Your email address will not be published. Required fields are marked *