Tuesday , September 28 2021

Xefe Suku Bikeli Husu PM Taur Dada Ataúro Nia Osan Husi RAEOA

ATAURO (DILI Post) — Xefe Suku Bikeli, Daniel Martins, husu Primeiru-Ministru (PM), Taur Matan Ruak, atu kria lei ida hodi dada fali osan Ataúro nian ne’ebé prevé liu husi orsamentu Rejiaun Administrativa Espesiál Oe-cusse Ambenu (RAEOA) nian.

Tanba tuir Xefe Suku Bikeli ne’e katak, durante Ataúro nia osan tau hamutuk ho RAEOA, Ataúro sai vítima hela de’it, tanba dezenvolvimentu iha Ataúro la la’o, maske prezidente RAEOA troka ba dala tolu ona.

Oras daudaun Ataúro nia osan hamutuk $ 10.000 mak blokeia hela iha RAEOA ne’ebá.

“Deputadu sira dehan, Ataúro nia osan ne’e $ 10.000 dólar blokeia hela, ne’e loos ga la’e.? Se loos karik, ami husu Primeiru-Ministru se karik osan ne’e sei iha bele halo lei ida par dada fali osan Ataúro nian iha RAEOA ne’e antes tama bá munisípiu espesial,” dehan Xefe Suku Bikeli, Daniel Martins, intervensaun, hafoin partisipa iha diálogu komunitáriu ho PM Taur, no Ministru Administrasaun Estatal (MAE), Miguel Perreira de Carvalho iha salaun administrasaun postu Ataúro, sesta (11/06).

Autoridade lokál ne’e sujere ba governu sentrál entrega fali osan ne’e ba komisaun instaladora, nune’e bele prepara kondisaun hodi hatán ba estabelesimentu Ataúro sai munisípiu espesial.

Ataúro Administrativamente tama ba munisípiu Dili, maibé Parlamentu Nasionál (PN) ho governu kontinua integra orsamentu Ataúro nian iha RAEOA.

“Maibé liga bá administrativu, Ataúro ne’e administrativamente ba munisípiu Dili, maibé, kuandu governu sentrál liu husi Parlamentu aprova orsamentu RAEOA Ataúro nia naran mós tama iha ne’ebá, ne’e hatudu katak, Ataúro nia osan ne’e temi de’it iha surat tahan, osan ne’e iha banku ga, iha RAEOA ga iha ne’ebé,” lamenta nia.

Hatán ba preukupasaun ne’e, Ministru, Miguel Perreira rekoñese, Ataúro nia orsamentu tama iha duni hamutuk ho orsamentu RAEOA nian, tanba ne’e governu sentrál komunika ona ho rejiaun Oe-cusse atu haree kestaun ne’e.

“Resposta ba ita-nia dúvidas ne’e, osan ne’e iha duni, la’ós laiha la’e, MAE semana rua ona kontaktu ho RAEOA jatamente atu ko’alia kona-ba orsamentu ne’ebé iha hela rejiaun que nia distinu ne’e mai Ataúro,” dehan Ministru Miguel.

Ne’e duni, nia lakohi divulga montante espesífiku orsamentu Ataúro nian iha konta RAEOA, maibé osan refere iha duni RAEOA.

Orsamentu ne’e atu halo duni dezenvolvimentu ekonomia iha zona illa Ataúro, liu-liu kria kondisaun infraestrutura sira.(ajo)

About dilipost

Check Also

Komunidade Comoro Selebra Loron Falintil Ho atividade Feira Oioin

DILI Post-Komunidade Suku Komoro, Postu Administrativu Don Aleixo, selebra loron ezistensia Falintil ba dala 46 …

Leave a Reply

Your email address will not be published. Required fields are marked *